Wabulru 11 - Ngudradreadrekadhane Ka Sisiu 魯凱語聖經La tatwatumanane ki ngiathingale ka umawmase 1 Ku paisusu cukinga pwa ki asiwbadhane mwa ki sakamaelanane. Lri tara ikaai ku vai ku patulalakane. 2 Apakaelaela ku tapikaiyane, patalu kaalrale cukingi, asi lwiyane kaisu lri thingale kai kawmasane lu lrika manemane ku akipadradresengane ku amulisiane. 3 Kai angatu adravane papinu mukadrulu, yakaai kwini mukadrulu. Kai alrekane ki ememe lu suetenga, waudale. 4 Alaiyasi lri mukalavasu lu udalenga iya, lri kaisu maka sabulu ku sapaivai palralrawthu, lai lri palralrawthusu kai maka kitaleke. 5 Kaisu lri maka thingale kai bavane ka niake ku tangimiane ikai ki barange ki tawbaliri lu kadradrau; lai lri kaisu maka thingale kai amani ka wabekace sanaka manemane ka Twaumase lu tungitwatumane lu kaungu. 6 Luka mialrealre lukamaungu lri sabwabulusu ku sapaivai; asi lwiyane kaisu wathingale kwini nisabulane kwi sapaivai lulri dulru cebe lutumane, la kaika athingathingalane ku nisabulane luka mialrealre ka mathaithariri ki nisabulane lukamaungu. 7 Kai ledra matiapusamalra turamuru, ku wadulru kisupilri ki ledra kiaragai turamuru! 8 Pasikaiya ki nitara cailane ku caili kiaseasene. Adravane ka tara thainusu panianiake ikai kai kawmasane, ngulringava, kai apacadhane yai mawlawlai. Kudra lrika angimiane ungawngau patuelre. Sapakipapawlringavane ki layacengecenge 9 Layacengecenge, kiraragadha ngilribate ku taicengecenganesu! Sa icengecengeananasu kiraragadha! La ngisasingikaai pia ku nau pia iyasu! Ai pulringaava, ku Twaumase lri singikaai ku kakwakudhanesu saibange muswane. 10 Sanaka maneemane madha pakawpupungu muswane, si pakwalri muswane; asi lwiyane ku taicengecengane madu kai lri kawlai, ungawngau. |