Wabulru 10 - Ngudradreadrekadhane Ka Sisiu 魯凱語聖經

¹ Ku wapacai ka alralregele pasangwabaalrenga ki yadidilrungane ka sangwalreme; ku tikiyane ka kulrungane mabebetethenga ki lrigilane si kiwsakenane.

² Ku ngiathingale ka umawmase mwalecege ku kakwakudhane; ku makulrungu ka umawmase makawli ku kakwakudhane.

³ Ku kulrungane ki makulrungu ka umawmase adravane ka la walribalribate ka umawmase wadrele thingale; kwi lasu pathingale makanaelre ku kulrunganeini.

⁴ Alaiyasi kalisi muswane ku amani ku magagemegeme ku puku, madha katwatwase ki takauawnganesu; alaiyasi kasulraelraapele kwi kidremedremesu, adravane kaadrau ku tapasalrivane lri dulru kipacepe.

⁵ Wadrelenga naku kai kawmasane ku taingeane ku kaika niaparamaramavane, ka pamama ki amani ku warathudu:

⁶ Ku makulrungu ka umawmase yakai ki abelenge ka taetalane, si magagemegeme ku maadrau ku kindri; ku maesaesaesai ka umawmase la kisidrekase.

⁷ Wadrelaku ki laduri ku ngwarigirigi, ku lalake ki talialalai la mia ki laduri dadadavace.

⁸ Ku walruku ku lrubange, ngiakakamani mulrubangane; ku waburuku ku balingibingi, kiakace ki sulrau.

⁹ Ku watupuru ki lrenege, kiadrepete ki lrenege si kadula; ku pwalebe ki angatu, kiapungupungu ki angatu si kadula.

¹⁰ Ku kumugu lu kailruthunga la kai twadreme, lri aru puku. Ku paswala kikake yai, amani ku ngiathingale ka umawmase.

¹¹ Ku wathethethengete ki sulrau, aswala kikace ki sulrau, lri tumaneana thethengete ki sulrau?

¹² Ku lavaga ki ngiathingale ka umawmase mailuku ku lrigu; ku lavaga ki makulrungu ka umawmase ngiadadawlu ku amatikurwane.

¹³ Ku makulrungu ka umawmase arakai ku kulrungane ku vaga pathagili, la arakai ku ngikarakacanane ku vaga tulrepenge.

¹⁴ Kwi lasu tavitavitaviitane kai icelrecelrebe. Kadrwa ku umawmase ku wathingale lukabibilrili, laka kadrwa ku umawmase ku lri dulru yugingi ku lrika angimiane lu pacainga.

¹⁵ Kathaane kudra makulrungu adravane ka papia tavanane ku kadalranane kai pwalringalringau ka umawmase kalri kauawngu pakela ki wapacai.

¹⁶ Luka vavalake ku talialalai, ku la tabebelenge la ngiakaekaekaneane kirararagai talealealeare, kwini yai amatikurwane ki kuni.

¹⁷ Lu kasulialivate si pangimia lu kaungu ku talialalai, ku lasasiakawlu la singi zikange kane, si dulru tutakekelretane, la kai kabusubusuku, kwini kuni yai lri kaesai.

¹⁸ Ku masasalrai ka umawmase lu tudrutudru ku daane kai mwatudrutudru, laka cukare ku talrugulrugane, si kaburuku ku daane.

¹⁹ Lu kaadrau ku tangiakaneanane kiaragai ku laumawmase, ku malimeme sangusai ka bava pakiaragai ki umawmase, ai kikai taidrusane atara arakaiyane ku paisu.

²⁰ Madha kawriariariva ku tangitumanane ki talialalai, adravane ka akalisiane pikai ki kidremedreme madha iyaiya. Madha kawriariariva ku tangitumanane ki sapaiswane ka umawmase, adravane ikaiyane tapeapecane maadha kawriariariva. Ku yabelenge ngipapapalai ka adhadhame alau lrika amani ku pasasarau kwini vagasu.