Wabulru 1 - Ngudradreadrekadhane Ka Sisiu 魯凱語聖經

Ku takaungawngavane ki tapanianianiakane

¹ Nipacasane ka vaga ki yakai Yerusalrime atalialalai, lalake ki Davidi, taradindu.

² Ku Taradindu amia kai, ungawngau, ungawngau, kai tapanianianiakane ungawngau, patueelre yai ungawngau.

³ Kai umawmase ku tapanianianiakane makalawtu ikai tailebe ki vai kauawngu kwalrialrialri, yakai ku manemane ku akaesadhane?

⁴ Kai kawmasane thadaalrane, ngialribate ku vaeva ka zidai, la kela ku vaeva ka zidai.

⁵ Ngiabwale ku vai, la lriwgu ku vai, kiararimu katwase siwlri mwa ki tatwaladhane, la peela twalai kwini kainganai.

⁶ Ku valrigi papia tali lraudru valrigi, la ngibangulu papia tali dradha, kai reteretege ku angipalrivaevangane, si ngibawbawbangulu.

⁷ Kai kadravane papia ki laveke mwaludru, ai kai laveke kai swaetete; kai acilai siaulri mwa ki tatwaladhane, la mwalwaludru kai kadrekadrekare.

⁸ Sanaka awngane matibakiakisalre, ka kaika adulrwane madu maka iya patuelre. Kai maka pakamia lu drele ku maca; kai maka ngwalwadhane lu kilalra ku calringa.

⁹ Ku tangimianenga lri peelana ngimia; ku nipianenga ku awngane lri peelana pia. Ikai tailebe ki vai sanaka awngane kadrwa ku bavane.

¹⁰ Yakaiyana ku manemane ku adulrwane ki umawmase iya kai, “Drela, kikai yai bavane”? Kai lri maka dulru! Sa kaita kitulalakeana yakaiinga.

¹¹ Ku nasiaswalane kadrwa ku umawmase ku la ngwalringalringau; kikainga ku la tangimiane laka kadrwa ku umawmase ku pwalringau.

Tangilribatane ki Taradindu

¹² Amaniaku ku taradindu; atalialalainga naku ki swa Iseraylri ikai Yerusalrime.

¹³ Malrithethenga naku ku arakai ku lrigilane kisilape, mwa drele ku tangimiane patueelre kai kawmasane. Ku baai ki Twaumase ku amece ki umawmase matelrege turamuru!

¹⁴ Wadrelenga naku kawmasane sanaka manemane; patueelre yai ungawngau, ka pwalralra ki valrigi.

¹⁵ Ku kilrukilrungu ku lamanemane kai lri maka kadringelrese; ku kai yakai italuvaivai ku lamanemane kaidu wadulru asipi.

¹⁶ Ngiaiyaku kai, “Saniangaku ka umawmase, ka malrilrigilinga naku ki sanaka warathudunga Yerusalrime. Wathingalaku ka manemane kai lrigilane, ka manemane kai thingalane.”

¹⁷ Malrithethaku ku athingalane pauvagai ki lrigilane si kulrungane, thingalane si wacapange ka kadrwa ku kelele. Ai wadrelaku kikai yai mialri ka pwalralra ki valrigi.

¹⁸ Lu aru kakalra ku lrigilane, arwa mwadringi ku kwalriane ki awlru; lu aru kaadrau ku thingalane, arwa kateelrege ku thekelrane.