Ubadaiya 1 - Ngudradreadrekadhane Ka Sisiu 魯凱語聖經

¹ Kai lebe yai drele ki Ubadaiya ka maburusi, ka vaga ki abebeelengenga ka Tamatama patharukai ki swa Idume. Ku Tamatama siakawlu ki sasiakawlu belenge pamwa sanaka kuni; kialalra nai ku takelane pelaela ki sasiakawlu belenge. Kwi lasu amia kai: Ngidrakala makanaelre! Lri makakaruburuta ki swa Idume!

Ku Tamatama lri pathavungu ki swa Idume

² Ku Tamatama amia kai ki swa Idume: Lri paturamuraku muswane ikai ki sanaka kuni; sanaka umawmase lri tudrekase muswane.

³ Kwini ngikalrilrigwanesu watavuvulrucunga muswane. Kwi madraadrawnga ka cekelesu niarakaiyane ku alrisapesape tusaravadrane ki cekele; ku daanesu yakai ki abeelenge ka lregelrege. Ngwalai kikai la iyasu kai ngikakawriva: Aneane ku lri dulru malra nakwane bilibili pulebe?

⁴ Adravane ngimiasu ki takanga mubelenge ngipalai, si malra ku daane pasutelrai pikai kabicelrakane ki latariau, lri tuthadaalranaku malra muswane bilibili pulebe.

⁵ Lu kela ku tarakupawpa, ku sadre takamaungane muelebe ki lrawlrawdru si mudaane, kwini lalasu wamalra ku urikaai lini ku lawbubulu sikakathane; lu kibudubudu ku umawmase, kwi lalasu lri surwana ku bekeelane; ai ku badhasu lri malra demeedeme ku lamanemanesu.

⁶ Lamwabaibalrithi ki Isau, kwi tacekecekelanesu kiaravasenga.

⁷ Kwi matutalragisu la tavuvulrucu muswane makanaelre; kwi lalasu pakatwase muswane ki kunisu. Kudra taelresu si makathaithaithariri ka laumawmase, kaiasanenga wadrepetenga muswane; kudra taelresu kanekane ka latalragilragisu, watukulru tulilisi muswane. Kwi lalasu mwalralrakai muswane, iya kai: Yainu ku lrigilanesu?

⁸ Ku Tamatama amia kai: Luka tapathavunganeli ki swa Idume kwini ki vai, lri amudaku ku lrigilane lini, lri mwalraku patuelre ku thingalane lini.

⁹ Ku kwapingi ki swa Temange lri amamikacane ukuludru, ku garagarange ka kwapingi ki swa Idume lri pacai ki takikaruburane.

Ku tangwaladhane si kipathavungu ki swa Idume

¹⁰ Amani sa pakiangeangesu turamuru kabebetethe ki betakanesu ka Yakubu, lri kiarubwanesu, lai lri kipakamudusu palralrauthunga.

¹¹ Ku badha saka taicengecengane buruku ki lrawlrawdru ki cekele, kaisu twamanemane. Ku maelane ka zuku sa malramalra ka Yerusalrime, si mavalavala ku tacekecekelane, ngitatu maneemanenga, twapapalrasu liniane.

¹² Ku retesanesu ka swa Yuda sa icengecenge matikurukuru, nai kaisu lengethe drele. Saka takamudane lini ka vai, nai kaisu ngwalai ku tamatikurwane lini si kiragai. Kwi lalasu sa icengecenge kipakwalrialri, nai kaisu ulralrakai.

¹³ Kai kawkawluli sa icengecenge kipakwalrialri, nai kaisu mudaane ki lrawlrawdru ki cekele lini. Sa icengecenge kipakwalrialri, nai kaisu drele siavavava lu kwalrialri. Kwi lalasu sa icengecenge kipakwalrialri, nai kaisu ravase ku lawbubulu lini.

¹⁴ Nai kaisu acegecege ikai sapauvavagai, si ruthuku kudra ki mwabebere ku laumawmase. Sa icengecenge kipakwalrialri kwi lalasu, nai kaisu malra kwidra ki lawaudripi ka umawmase si baai ki badha.

Ku Twaumase lri saibange ki sanaka kuni

¹⁵ Ku vai ku asaibanganeli ka Tamatama ki sanaka kuni lri kelanga. Swa Idume, lri kibilrisu singikai ku tapianesu, ku tatumananesu, lri tara kibiilrisu.

¹⁶ Kai kawkawluli ikai ki lregelregeli waungulunga ku mapalili ka yakupwane. Sanaka ngwadadeethe ka kuni lri ungulu ku madradrau ku mapalili ka yakupwane, kwi lalasu lri demeedeme ungulu, ala lri kawlrau si kakadruuanga.

Akaci kai swa Iseraylri

¹⁷ Ai ku yakai Ziyungu lregelrege lri tara ikaai ku mwabere; kikai lregelrege lrika saniangenga ka lregelrege. Kai laumawmase ki Yakubu lri malra sawlri ku sakwa ka kadaengane lini.

¹⁸ Kai tai Yakubu lri amadrareange ka apwi; kai tai Yusepe lri akelrabe; kai lalasu lri lama pakamudu ki tai Isau, mia ki walama ki sangukimugiane. Ku mwabaibalrithi ki Isau kadrwa kulri abalu. Tamatamaku, ka amia kikai pelaela.

¹⁹ Ku yatali kai lrawdru ka swa Yuda lri ravase ki swa Idume; ku yatali talriwgane ikai ki tangadrane ki lregelrege lri kikaruburu si malra ki swa Pelisitine. Ku swa dradha ka Iseraylri lri malra sikadaengane ki swa Iparaime si swa Samaria; kai swa Biniyamingi lri malra ki swa Gileade.

²⁰ Kai mwabere ka lakwapingi ki swa tali dradha ka swa Iseraylri lri kainganai siwlri si pamalebe malra ki swa Puinicia, pakeela ki swa Zarepathe. Ku twalai Yerusalrime mubere si mwa ka Saradi ku umawmase, lri siwlriwlri kela pamalebe si malra ki lacekele talikai lrawdru ki swa Yuda.

²¹ Kudra la akaci ka umawmase lri mwa ka Yerusalrime, si twalai kwini rathudu ki swa Idume. Ku Tamatama lri ngikakamaani atalialalai.