Titu 3 - Ngudradreadrekadhane Ka Sisiu 魯凱語聖經

Tangivelevelane ki la Kirisite

¹ Kusu pakipapawlringava makanaelre, pasalaladha ki maerece ki kunkwane si magagemegeme ku puku iya liniane, la kilaalra paluludu ku drekase si pia ku mathariri ku awngane.

² La pakipapawlringau ku kaika atulilisiane ki palrapalra, madha kawriva, kasulrapela kisudalru, ngitatu alebe paacepe sanaka umawmase iya.

³ Kuta kunadruma namiyaiyata ka kadrwa ku thingale, wabaebalre, si amuli, amanita ku duri ki makaelaela ka murikai ki beate si angulwadhanane kiragai si panianianiaketa ikai ki ngialisiane ka sapapacai si pathalrane, si makababadha.

^4-5 Ai, ku Takipalribulribulaneta ka Twaumase padrelanenga ku sakialibakeini, pangukai ki Siri pabanau ku apelane kitulalake si aru kabavane, palribulunga mitane, kikai kai ngwalai ku yakai ku tharirane ku kakwakudhaneta, ngwalai ku kalithane mitane.

⁶ Ngwakai ki Takipalribulribulaneta ka Yesu Kirisitu, ku Twaumase la malra ki Siri pasuete pikai ki kinawmasaneta,

⁷ ngwalai ku migemini, la makakadalruta ki Twaumase, si malra kudra nisidramadramane ka palralrawthu ka niake.

⁸ Kai vaga kai matiasudralru. Anatumane la pawkalrivilisu tukucingalre kilakikai, kudra la masalrunga ki Twaumase ku umawmase ani kisamula pia ku mathariri, kilakikai mathariri patuelre, papia ki umawmase yakai ku akaesadhane.

⁹ Kidaila ki kadrwa ku thingalane ka nimadrikidrikisane ka vaga, si pangukai ki tamacucungulane ka lanagane si hulrice maakulisi; kilakikai patuelre kadrwa ku vai, kadrwa ku kucingalrane.

¹⁰ Papia ki tarabeabeabekace ku rivwane ku umawmase lu sangubekele kingipusale pakipapawlringau, luka bilrilinga la madha mangulatataatadre kisudalru.

¹¹ Wathingalesu, ku ngimiyaiya kai ku umawmase yai maburau; ku pasalrivaneini ngiapapelaela ka paamama.

Bibiilrilinga ku tapelaelane

¹² Siakawlaku ki Aretemase ki Tikiku mwa muswane kwini, tara mwa Nikepuli kikawriva nakwane, asi lwiyane lri ikaiyaku kwini pangilribate ki kalakecelrane.

¹³ Pakisamula sateatedre pukadalranane ki binkusi ka Zina si Apuluse, paraluba liniane, lani kakadrwa ku kawrame lini.

¹⁴ La pelaela ki umawmaseta, ikai ki mwalecege ki awngane pakisamula, si baai ku urikai lini ikai ki tapanianianiakane lini, madha kamanimani ku masasalrai kakadrwa ku vai ku takaumawmasane.

¹⁵ Kai yakai nakwane taelre kai laumawmase aii amiamia muswane. Aii iyaiyanga kudra la thadalrane ku salrwane ka laretesaneta. Ku Twaumase ani baai ku migemi numiane makanaelre!