Titu 2 - Ngudradreadrekadhane Ka Sisiu 魯凱語聖經

Kiatulrepenge ka sabulrwane

¹ Papia muswane, ku bulrusu ani mamamwa ki kiatulrepenge ka sabulrwane.

² Pakipapawlringava ki tarudrawdrange, kapapedrenga iya liniane, si ikai ku mathariri ku kakwakudhane, la ngiraruthuku, pikaiya ku kiatulrepenge ku salrwane, ku sakialibake, si sakiadiadili.

³ La pakipapawlringava ki labaibai ka tarudrawdrange, dradreela ki kakwakudhanesu iya. Madha kawrivariva ku angilisianane ki palrapalra, madha aduriduri ki bava. Atakitwalravana ka mathariri,

⁴ pudriadringadha bulru ki yacengecenge ki labaibai, pakicawcakwane ku atungimiyaiyane kilibake ki taelrelre si lalalake,

⁵ ku wathingale ngiraruthuku, alrivilrivi ku takaababadhane, ngithingale marasikai ki awngane tavanane, si pasalaladha ki taelrelre ka sawvalai, amani lu kitulilisi ku vaga ki Twaumase.

⁶ Thadaalrane, kusu pakipapawlringava ki yacengecenge, ngiraruthuka iya liniane.

⁷ Ala kusu, adravane ikai ki maneemanenga tara pikaiya ku mathariri ku kakwakudhane, atakitwalravane ki palrapalra. Lu bulrusu ki umawmase kapatengatengana, si kapapedrenge,

⁸ la tutakekelretane ku vaga, ani kakadrwa ku atakaiyane kawriariva ki umawmase. Lukamiyaiya kai, kudra la kiatubadha ku umawmase, lri ngwalai ku kaika makakidringai ku tapamamaneta, lai nguvagaanenga si kirimu kainu.

⁹ Pakipapawlringava ki aduri, ku apasalaladhane ki tawki lini, si ka tapakiragaadhane ki tawki, kai tubaebalre liniane,

¹⁰ la madha kupawpa, sanaka maneemane pakaelrea ku kidremedremesu, ikai ki tatwatumananesu patuelre, lani kitukucingalre kisusu ku ngwakai ki Takipalribulribulaneta ka Twaumase ku sabulrwane.

¹¹ Asi lwiyane ku sapalribulane ki Twaumase ki sanaka umawmase ka migemi athingalanenga.

¹² Kikai migemi pakiacawcakwane mitane cilri ku kakudhane ki kai mwasakene ki Twaumase si ngipapakaesadhane ki ngwakawmasane, ikai kawmasane la ngiraruthuku, kadringelrese, si usakesakene ki Twaumase ku tapanianianiakanesu,

¹³ si ukalava ku sidramata kudra akelane ku akipalribulaneta ka vai, lukamaninga kwidra. Ku lrigu ki matiusaesakenenga ka Twaumaseta si takipalribulribulane ka Yesu Kirisitu lri utaluvaivai.

¹⁴ Ku Kirisitu pasiakai mitane ngipapatarumara, si palribulu mitane pakidaili ki ngialisiane patuelre, la kamaningata ku mabula ka umawmaseini, ka swakainga iniane, si kisamula pia ku mathariri.

¹⁵ Kusu matikaiya pelaela kilakikai, si pakaelre arakai ku puku ki awnganesu pasapukwane ki umawmase kaelaela ki umawmase, madha kitudreadreadrekase ki umawmase.