Tapelane Drekase 9 - Ngudradreadrekadhane Ka Sisiu 魯凱語聖經

Kai pasalaladha ki Tamatama ku swa Iseraylri

¹ “Swa Iseraylri, kilalra! Kaikameane lri talubalre numi kadravane Yuredange, si drikisi kwini kadaengane ki sapupukwane numiane ka laminzuku. Ku cekele lini taswadradrau turamuru, wadaruru ki ememe ku abelengane ki alradre ki cekele.

² Kwini laumawmase lini laka taelrelrenge si ka tadradrau, ka mwabaibalrithi ki tadradradrau ka swa Anake ka zuku ka umawmase; kialalrana numi lu matikaikai liniane ku laumawmase, kadrwa ku naaneanenga kulri maka kiecebe liniane.

³ Ai kaikameane, kwini maca numi lri drele ki Tamatama ka Twaumase numi, mia ki kelrabe dadavace ngucacucubungu numiane. Lu aru cucubungu numi dadavace, lri pamalebe liniane, lai lri apasuswane numi kwidra ki puvagangaini lecege pakatwase ki labadha, la malra amudu liniane.

⁴ “Ku Tamatama ka Twaumase numi pasiakai numiane pakatwase ki labadha, kunumi madha kidredredreme amani nai ka ngiailuku si drikisi kikavai la kadaengane iyaiya, naika akibadhane nai iya! Ini! Kikai amani sangilisiane turamuru kwini swakai kwini ku laumawmase lakamani ku pakatwase ki Tamatama liniane;

⁵ kikai yai kaika ngwalai ki tharirane numi, mulecegane ku kakwakudhane numi, ku Tamatama ala pamwa numiane drikisi ki kadaengane lini. Ku pakatwase ki Twaumase liniane, amani sa ngilisiane kikai laumawmase, si la lrika pangimia ku palraingingaini ku vagaini ki cucungulane numi ka Aberahame, Isake si Yakubu.

⁶ Lakamani kwidra, lutuumane kaika ngwalai ku tapangitumanane numi, ku Tamatama la malra kikai mathariri turamuru ka kadaengane patarumara numiane, ku tangimiamiane, amani numi ku makelrathe turamuru ka kawkawlu.

⁷ “Madha karimurimuru ku tasukubane numi ki samiamiange ka kingi ka lwange si pakagirimucu ki Tamatama ka Twaumase numi ikai calragulragu. Ku takatwasane numi Izipiti pakeelanga kaikameane, kai numi watelrai ku abaebalreane numi iniane.

⁸ Adravane sa ikai kavai lregelrege ka Hurebe, la pathaele numi iniane, la pasana pakamudunga numiane.

⁹ Kwini kwidra la mwaku lregelrege tarumara kwidra drusa ka lrenege ka alibi ka nipacasane ku tamakaketeketane ki Tamatama numiane. La ikaiyaku lregelrege maka masupatele ku vai ku awngane, kai kane, kai ungulu ku acilai.

¹⁰ Sakabilrilinga, ku Tamatama la baai nakwane kwini drusa ka lrenege ka alibi. Kikai drusa ka lrenege ka alibi la arakai ku dadiputhaneini ngipapacase ku vaga, ka amani sa isarubu numi ka vai, ka vagaini patuelre ikai lregelrege ki kelrabe ka apwi.

¹¹ Sa ngilribatenga ki nimaka masupatelane ku vai si maungane, ku Tamatama wamalra kwini nipacasane ikai ki drusa ka lrenege ka alibi ka samakaketeketane si baai nakwane.

¹² “La pacungulu, ku Tamatama pelaela nakwane, ‘Lu kirimwa mulrawdru, asi lwiyane kwini patwalaisu Izipiti iluku ka mapapangale kiapakilringaunga ngilisiane, wacilringa nakwane. Kwi lalasu kiadailinga ki drekaseli liniane ku angukakaiyane ka kadalranane, si ngipapasikai darepe ku samiamiange.’

¹³ “Ku Tamatama la kawriva nakwane, ‘Wathingalaku kikai lamapapangale makelrathe turamuru.

¹⁴ Lri amudaku liniane, lai lri kakadrwanga ku umawmase kulri ngulringau liniane; kusu madha ruthuruthuku nakwane. Lri pacegecegaku muswane ka amani ku tama ki kuni; ku kunisu lrika sapupukwane ki kuni lini.’

¹⁵ “Ala malraku kwini nipacasane ka samakaketeketane pikai ki drusa ka lrenege ka alibi, la ngibangulu katwase mulrawdru ki lregelrege; kwini lregelrege la kelrakelrakelrabe ku apwi.

¹⁶ Wadrelaku numiane la pasalriunga numi ki Tamatama ka Twaumase numi, si ngidadarepe ku tikiyane ka lwange ka samiamiange, kidailinga ki drekaseini numiane ka kadalranane.

¹⁷ Lakamani ku pwali cagecage pucakena kwini drusa ka lrenege ka alibi picucubungu numiane, la kapapici kaciperake.

¹⁸ La pelana naku guruthungane icucubungu ki Tamatama, maka masupatele ku vai ku maungane kai kane kai ungulu ku acilai. Kikai ngwalai sapia numi kwini ngialisiane si pasalriu ki Tamatama, pakagirimucu iniane.

¹⁹ Mwakuludraku ku sakaelaelane ki Tamatama, asi lwiyane ku sakaelaelaneini lri pakamudu numiane. Ai ku Tamatama peaelana kilalra ku takitubianeli.

²⁰ Ku Tamatama pasana papacainga ki Arungu ikai ki sakaelaelaneini, sakamani kwidra la pasikaiyaku iniane kitubi.

²¹ La malra kikwini darepe numi kwini papasalriu numiane ka kingi ka lwange verevere pwa ki apwi lama, si cwake pawtatiki, la silribu paalamenge, la sabulu pwa kwini ki mwalwaludru singi lregelrege ka acilai.

²² “Sa ikai Tabira, Masa si Kiberuthe Hatava, mialri numi pakagirimucu ki Tamatama.

²³ Wadrekase numiane ikai Kadise Barania mwa drikisi iya kwini ki apatarumarane numiane ka kadaengane, kunumi la kirimulringa numi baebalre iniane, kai sudralru iniane, kai kilalra iniane.

²⁴ Twalai ku tathingalaneli numiane, kunumi tabaebalreane numi ki Tamatama.

²⁵ “La guruthunganaku icucubungu ki Tamatama makamasupatele ku vai si maungane, asi lwiyane wathingalaku ka nau amudu amiamia numiane ku kidremedremeini.

²⁶ La kitubia ku, ‘Abebeelengenga ka Tamatama, kiatubiaku madha amwamudu ki kawkawlusu. Amani lini ku arakaisu ku maadrau ku pukusu patwalai Izipiti palribulu liniane.

²⁷ Kiatubiaku ngulringava ki sasiakawlusu ka Aberahame, Isake si Yakubu, si kai drele ki kelrathane ki ngilisianane si pasalrivane ki kawkawlusu.

²⁸ Amani lwiya kai muswane ka swa Izipiti, amani sa kai tali dulrunga sangiluku liniane mwa ki puvagangaini ki abaadhane liniane ka kadaengane iya. Kwini lalasu lri iya kai, malrasesu kagirimucusu ki kawkawlusu, si sangiluku liniane mwa calragulragu, pakai ku apakamudane liniane.

²⁹ Kikai lamapapangale amanilringa ku pilrisu ngitatu kawkawlu, ka arakaisu ku maadrau ku puku sangiluku mulatadre patwalai ka Izipiti.’ ”