Tapelane Drekase 8 - Ngudradreadrekadhane Ka Sisiu 魯凱語聖經

Lri tarumara ku mathariri ku kadaengane

¹ “Kaikameane kai pelaelali numiane patuelre kai hulrice, kunumi tara pasusua, lanu maka panianiake, edhale ku umawmase, si malranga ku puvaga ki Tamatama ku kadaengane.

² Kunumi siwlriwlria ngulringau, sa ikai numi calragulragu acaicaicali taramasupatele ka caili, ku Tamatama ka Twaumase numi luka pangiatumane sangililuku ki kadadalranane numi. Arakai ku akwalriane kilrialringau numiane, la ngitatualebe numi, nau thingale ku takidremedremane lini iya, dredrele luka mwabangalre numi pasusu ku padradrekaseini.

³ Ku Tamatama pakasilrau numiane, ala patarumara ku mana numiane kwini kadrwa ku naneanenga ku cucungulane numi ku wakanenga kwini taleke, arakai kikai bulru numiane ku apanianiakane numi kaika lri sataalu ki akaneane sikathane, lri satalu ki sanaka vaga ki Tamatama.

⁴ Kikai nitara masupatelane ka caili, kai numi pakapurici ku laimai numi, ku drapale numi la kai ngithabucu.

⁵ Kunumi ngulringava, ku Tamatama ka Twaumase numi wabulrubulru numiane, mia ki tama ka wabulrubulru ki lalakeini.

⁶ Lakamani, kunumi dradrela pasusu ku padradrekase ki Tamatama, la paluludu ku hulriceini, si usakene mukuludru iniane.

⁷ Ku Tamatama ka Twaumase numi lri sangiluku numiane mwa ki karawmane ka kadaengane; ikai kavai yakai ku drakerale, tuturu si ngwadriadringi ka acilai ku sapwaciladhane ki valrwalru si sisiane;

⁸ ikai kavai wacebe ku madradrau ka mugi, titikiane ka mugi, budu, icizike, nginanavate, ulrive si valu.

⁹ Kainu lri kasilraunga, kai lri kawramenga. Ikai kavai ki alrisapesape yakai ku laadreme, lregelrege yakai ku lalriwlu.

¹⁰ Lri kabucuku numi, si kiaseasene ki Tamatama ka Twaumase numi, asi lwiyane wabaai numiane ku karawmane ku kadaengane.”

Pakiapapawlringau ki mapapangale ku kaika akarimurane ki Tamatama

¹¹ “Kunumi dradrela, madha karimuru ki Tamatama ka Twaumase numi; madha sidrekadrekase kikai pelaelaini numiane kaikameane sanaka hulrice si padradrekase, ka amani kikai baaili numiane kaikameane.

¹² Lu kabucubucuku numi, sakaesainga ku daane numi,

¹³ lu edhaedhalenga ku lwange kiu numi, kingi gingi si la tacekecekelane numi,

¹⁴ dradela, madha kadhawdhawmu, si sakawlraunga ki Tamatama ka Twaumase numi. Napalribulu numiane pakidaili kwini ki takituduriane numi ikai kavai Izipiti,

¹⁵ la sangiluku numiane ngukai ki swaadrau, ubulane ka makalra ku siduduku ka sulrau si apapase ka calragulragu. Ikai kwini ki meameale ka kadaengane, patwalai ki alrisapesape paberai ku acilai baai pangu kadhamane numiane.

¹⁶ Ikai calragulragu, wamalra ku mana, ka kaika kaneana numi si cucungulane numi ka akaneane, baai liniane. Ku Twaumase paswalana arakai ku makuciingalre kilrialringau numiane, ku lrika angitatwalebeane numi, ala arakai ku mathariri ku lamanemane baai numiane.

¹⁷ Lakamani, satalu nai ki puku nai si kaesai madha iyaiya.

¹⁸ Kunumi pulringalringava, amani ku Tamatama ka Twaumase numi ka wabaai ku puku numi, ala kaesai numi. Ku tapiane kai marasikai numiane, asi lwiyane pakela kaikameane pangiamiamia ku tamakaketeketaneini ki cucungulane numi.

¹⁹ Kunumi madha karimurimuru ki Tamatama ka Twaumase numi, madha katwatwase papia ki drumane ka twaumase, si sukubu marasikai liniane. Kaikameane pwadriadriingadhaku pakipapawlringau numiane, lwiyasi cilri numi ki Tamatama, lri tara kipakamudu numi.

²⁰ Lwiyasi la kai numi pasalaladha ki Tamatama, lri tara kamudu numi, mararaamau sakatwatwase numi padrumulru ku tapangimiane amudu ki la drumane ka laminzuku.”