Tapelane Drekase 7 - Ngudradreadrekadhane Ka Sisiu 魯凱語聖經

Kawkawlu ki Tamatama

¹ “Ku Tamatama ka Twaumase numi lri sangiluku numiane mudaane kwini ki adrikisane numi ka kadaengane; lri pakatwase kwidra ki taikalra ka laminzuku. Lu aru cucubungu numi, lri pakatwase ku taipitu ku sapupukwane numiane ka minzuku, amani kwini swa Hite, Giregasi, Amuri, Kanange, Perizi, Hivi si Yebuse.

² Ku Tamatama ka Twaumase numi lri malra kikai ki laminzuku si baai numiane. Kunumi lri pamalebe numi, si pakisalru amudu liniane, madha kakurukuru, la madha kiketeketekete liniane.

³ Kunumi madha mwamwa liniane karudrange; ku lalake numi ku labaibai madha pamwamwa liniane karudrange, ku lalake numi ku sawvalai madha malramalra liniane sitaelrelre;

⁴ asi lwiyane kwini lalasu lri lrilrigili numiane pakidaili ki Tamatama, mwa sukubu ki drumane ka latwaumase. Lwiyasi la kidaili numi ki Tamatama, lri papia numiane kaelaela, si lri makakaai amudu numiane.

⁵ Lakamani kwidra, kunumi malra pakalalisi kwini tapatarumaramarane lini, si cacwake kwini twaumase lini ka sadrengedrenge, thiabe si kadrulu kwini ababai ka samiamiange ka Asera, lama kwini ki samiamiange.

⁶ Kunumi swakai numi ki Tamatama ka Twaumase numi ka saniange ka kawkawlu; kunumi tara pangimia kikai. Amanini ka patwalai ki mapapangale pilri numiane amapapangale iniane.

⁷ “Ku Tamatama kialibake numiane, pilri numiane, kaika pakai ku takakalra numi ki druma; ku patengatengane yai, titikianenga numi ka kuni ikai kawmasane.

⁸ Kialibake numiane, pakai ku akatapikaiyane numi kudra papia ki cucungulane numi kiketekete. Arakai ku pukuini palribulu numiane, patwalai ki takituduriane numi palribulu numiane pulatadre, si la kidailinga numi ki alrima ki talialalai ki swa Izipiti.

⁹ Lakamani kwidra, kunumi wathingale numi: Ku Tamatama ka Twaumase numi kathaneini tangeangea ka Twaumase. Sanaka kialibake iniane, si pasusu ku drekaseini ku umawmase, lri tara pangimia ku takiketeketaneini, arakai ku kai lri kaela ka sakialibake marasikai liniane, pakeela ki lagagane lumamilringi.

¹⁰ Ai ku malrase iniane ku umawmase, lrika kadrwa ku lrikilrikane si pathavungu liniane, si amudu liniane.

¹¹ Lakamani kwidra, kunumi tara pudriadringadha pasusu kikai pelaelali numiane kikai patuelre ka hulrice si drekase.”

Ku pasusu ku padradrekase lri kisubulrubulru

¹² “Lwiyasi la kilalra numi kikai lapadradrekase, ka patengatengane pasusu, ku Tamatama ka Twaumase numi lri tara pangimia ku kiketeketeini ki cucungulane numi ku vagaini, si pangimiya ku takiketeketaneini liniane, lai lri arakai ku kai lri kaela ka sakialibake marasikai numiane.

¹³ Kialibake numiane, subulrubulru numiane, la pangiradhekane numiane, ikai kwini puvagangaini baai ki cucungulane numi ka kadaengane subulrubulru numiane, la lri paedhale ku lagagane numi, pacebe ku lataleke, bava, ulrive si thathatha ku lwange si kiu.

¹⁴ Ku tarumara numi ku akaesadhane silrialribateana ki drumane sanaka zuku kai kawmasane. Adravane numi adravane ku lalwange kiu numi kadrwa ku kai lri tulalake.

¹⁵ Ku Tamatama lri palakebe numiane ki sapapacai ki lacaemane, kai lri pakisaelanga numiane kwidra matiaukuludru ka sapapacai ka lacaemane sa ikai numi Izipiti; kwini sapapacai ka lacaemane lri pamwa ki kinawmasane ki labadha numi.

¹⁶ Ku Tamatama ka Twaumase numi kwini baaini pwa ki alrima numi ka laminzuku, kunumi tara pakamuda liniane, madha kakurukuru liniane. Kunumi madha sukusukubu kwini ki twaumase lini, asi lwiyane kwini lrika amani ku wadawlu ku palrealrebane ku atubiane numi matisalregesege.

¹⁷ “Kunumi anika tapapangale mitane kai laminzuku madha iyaiya, si kai kirimu pakatwase liniane.

¹⁸ Madha mukulukuludru liniane! Kunumi tara pulringava ki Tamatama ka Twaumase numi ku tapangimianeini kiecebe ki talialalai ki swa Izipiti si mapapangaleini.

¹⁹ Kunumi patakamacamaaca numi drele kwidra lasapapacai, ka pinangu Twaumasane ka puku, palrealrebane ku takaungane. Pulringava, ku Tamatama ka Twaumase numi arakai ku maadrau ku puku mukerenge palribulu numiane. Ku tapangimianeini amudu ki swa Izipiti, lri pangimia amudu kwini ki mukulukuludru numi ka laminzuku.

²⁰ Lri pakathathiburu pakalrithavulu liniane, adravane ka mwabere, kialepenge, lri amudu.

²¹ Lakamani kwidra, kunumi madha mukuludru kikai ki laumawmase, asi lwiyane ku Tamatama ka Twaumase numi lri tapalra numiane. Amanini ku sanianiangenga, lri tara kimusakene.

²² Lu arwakai numi, lri parwakai pakatwase kwini ki laminzuku. Kai numi lri makakaai amudu liniane, amani lwiyasi pangimia numi kikai, lri aru edhale ku lawaudriwdripi, si lri pamatikuru numiane.

²³ Ku Tamatama lri malra kwini ki labadha si baai pwa ki alrima numi, si pakathathiburu pamama, pakeela ku taamudane numi liniane.

²⁴ Lalri malra kwini ki talialalai lini pwa ki alrima numi; kunumi papacadha amuda liniane, lani kai thingalenga ku laumawmase ku nagane lini si kikarimurunga. Lu papacai amudu numi liniane, kadrwa ku lri maka kiecebe.

²⁵ Kunumi lri lama numi kwini ki samiamiange lini; madha akulikuli karau kwini yakai ki samiamiange ka kingi ka gingi, la kibubuli paasuru, amani lwiyasi pia numi kwini lri dawlu ku atubiane numi pakanabilrili asi lwiyane ku Tamatama malrase ki samiamiange.

²⁶ Madha iluku ku sanaka samiamiange putavanane, lu pia numi kwini, lri tara malra numi kwidra akipuswane kai ki lasamiamiange. Kunumi tara pakisalrua kalrase, kavalracevace kai ki lasamiamiange; kikai la samiamiange amani ku kiapusu ki Tamatama.”