Tapelane Drekase 6 - Ngudradreadrekadhane Ka Sisiu 魯凱語聖經

Madradraunga ka padradrekase

¹ “Ku Tamatama ka Twaumase numi wadrekase nakwane malra kikai lahulrice si ladrekase tusabulrwane numiane, lanu maka pasusu ikai kwini ki lrika adrikisane numi ka kadaengane.

² Kunumi si lagagane numi makalawtua mukuludru musakene ki Tamatama ka Twaumase numi, patupapalra kikai pangukaini nakwane si cunu numiane ka hulrice si padradrekase. Lu mia kikai, kunumi lri maka dulru numi kawlai panianiake.

³ Swa Iseraylri, kunumi kicacaligira, si tara pasusu. Lu mia kikai, lri maka pasusu numi ku pukawnunga ki Tamatama ka Twaumase ki cucungulane numi, si kasulivate ku takaungane numi, ka amani ku makeecenge ka kuni, si sutelrai ikai kwini ki mwalwalwaludru ku mireke si valu ka karawmane ka kadaengane.

⁴ “Swa Iseraylri kicacaligira! Ku Tamatama yai Twaumaseta; kathaneini ka Tamatama.

⁵ Kunumi pakaelrea ku kidremedreme, pakaelrea ku gathimi si pakaelrea ku puku kilibake ki Tamatama ka Twaumase numi.

⁶ Kaikameane kai pelaelali numiane kai padradrekase, malra pikai ki kidremedreme numi,

⁷ la kageteme bubulru ki lalalake numi. Adravane ikai numi tavanane mulatadre numi, lu isadra numi ku mauawngu numi, madha reteretege ku akicawcakwanane kikai lapadradrekase.

⁸ Kunumi malra kikai lapadradrekase sikalathe la siedrete tusapatuthingalane,

⁹ pacasa pikai ki taibelengane ki lrawlrawdru si lrawlrawdru.”

Pakiapapawlringau kudra ki wabaebalre ki drekase ki Twaumase

¹⁰ “Ku Tamatama ka Twaumase numi lri singikai ku palraingingaini ki cucungulane numi ka Aberahame, Isake, Yakubu, sangiluku numiane mudaane kavai ki kadaengane. Kavai tangiradhekanane ka cekele kai numi ka amani ka twadaane,

¹¹ kwini nipasuteane ki daane ku lamanemane la kaika rubu numi kaika sekete numi. Kavai taciladhane ka dralremedreme kaika lruku numi; ku babudwane, maulriwlrivane kaika lredreke numi. Ku Tamatama sasangiluku numiane mudaane, la pakabucuku numiane,

¹² kunumi dradrela, madha karimurimuru iniane, ku siaswalane ku Tamatama palribulu numiane patwalai ki takituduriane numi ikai Izipiti.

¹³ Kunumi musakena ki Tamatama ka Twaumase numi, kathaneini ku asukubane, pangwakai ki naganeini kiketekete.

¹⁴ Madha sukusukubu kwini ngiathalringulu ki lakuni ka twaumase.

¹⁵ Lwiyasi sukubu numi kwini ki drumane ka latwaumase, ku lisiane ki Tamatama lri thamukulu numiane, asi lwiyane kwini watapalra numiane ka Tamatama ka Twaumase numi kai lri besere palraingi kwini kiaecebe iniane ka latwaumase.

¹⁶ “Kunumi madha pangialralrau saikai numi kavai Masa kithiathingale ki Tamatama ka Twaumase numi.

¹⁷ Kunumi kipapawlringava pasusu kwini pelaelaini numiane ka hulrice.

¹⁸ Kunumi pangimia kwini mwalecege si mathariri ku tadrelane ki Tamatama, lri kasulivalivate ku awngane numi. Si kunumi lri mwa numi drikisi kwini ki pukawnungaini ki Tamatama baai ki cucungulane numi ka karawmane ka kadaengane;

¹⁹ kunumi lri singikai numi ki drekaseini pakatwase ki labadha.

²⁰ “Lukabibilrili, ku lagagane numi lri kivaga numiane, ‘Ku Tamatama ka Twaumaseta ani drekase mitane paluluda patuelre kikai hulrice si padradrekase?’

²¹ Kunumi pelaela liniane iya kai, ‘Nayakai nai Izipiti aduri ki talialalai ki swa Izipiti, ai ku Tamatama arakai ku maadrau ku puku palribulu naiane.

²² Patakamacamaca nai drele iniane ikai ki swa Izipiti, icucubungu ki talialalai ki swa Izipiti si latabebelenge ka lasasiakawluini, pia ku maadrau si matiaukuludru ka pinangu Twaumasane ka puku si matiasamali ka awngane.

²³ Ku Twaumase singiakai ku tapalrainganengaini ki cucungulane nai, palribulu naiane katwase Izipiti, si sangiluku naiane kela kikai, la malra kikai kadaengane si baai naiane.

²⁴ Sakabilrilinga, ku Tamatama ka Twaumase nai wadrekase naiane ku apaluludane kikai hulrice patuelre, si ukuludru musakene iniane. Lwiyasi la kilalra nai, lrika tapalakebane naiane, lai ngiradhekane nai.

²⁵ Lwiyasi laka tengatengane nai paluludu kikai padradrekase patuelre, lri kiragai tarumara naiane.’ ”