Tapelane Drekase 5 - Ngudradreadrekadhane Ka Sisiu 魯凱語聖經

Taimangealane ka padradrekase

¹ Ku Musi la sarubu payelrelre ki mapapangale ki swa Iseraylri, si kawriva liniane, “Kunumi ka swa Iseraylri! Kiraraketa si pudriadringai kilalra kai apelaelaneli numiane kai hulrice si lanikelretane ka kakudhane. Kunumi kibulrua, si ka patengatengane pasusu.

^2-3 Ku Tamatama ka Twaumaseta kaika yakai lregelrege Hurebe kiketekete ki lacucungulaneta sikakathane, maiyalri kiketekete mitane ka panianianiakeana kaikameane.

⁴ Ku Tamatama yakai kwini lregelrege, patwalai ki kelrabe macacucubungu numiane kawriva.

⁵ Ikai kwini, acegecegaku ikabicelrakane numiane si Tamatama, lri papiaku numiane pelaela ku vagaini; asi lwiyane kwini mwakuludru numi kwini ki kelrabe, si kai lreme mulregelrege.

⁶ “Ku Tamatama amia kai, ‘Kunaku Tamatamaku ka Twaumasesu; nawasangilukaku muswane pulatadre patwalai kwini ki takitudurianesu ikai kavai Izipiti.

⁷ “ ‘Kathanaku kadrwa ku druma, kusu madha sukusukubu ki drumane ka twaumase.

⁸ “ ‘Madha ngipapasikaikai darepe ku sanaka samiamiange; la madha patwalralrau ki ngwababelenge, ngwacacakena si acilai ikai adringi ki dae sanaka tangimiamiane.

⁹ Madha papiapia ki sanaka samiamiange pidruru sukubu, asi lwiyane Tamatamaku ka Twaumasesu; kainaku lri maka besere ki drumane ka kiaecebe nakwane ka latwaumase. Ku malrase nakwane, lri pathavungaku, pakela ki sakatulru sakasupate ki cucungulaneini.

¹⁰ Ai, ku madalame nakwane, si pasusu kai drekaseli ku umawmase, lri arakaiyaku ku thalradhane kilibake liniane, pakela lumamilringi ki lagaganeini.

¹¹ “ ‘Madha cacapange arakai kai naganeli; sanaka wacacapange arakai kai naganeli ku umawmase, Tamatamaku, ka Twaumasesu lri tara pathavungaku iniane.

¹² “ ‘Pasusua ku drekaseli ka Tamatama ka Twaumasesu, si pasusu ku Taisadrasadrane ka vai tusaniange ka vai.

¹³ Kusu yakai ku amaka nemelanesu kipuawngane;

¹⁴ luka samakapitulu nipakitukudhane ka nakwane ka Tamatama ka Twaumasesu ka Taisadrasadrane ka vai. Kikai vai kai, adravane ka amanisu, ka lalakesu, ka durisu, ka lwange si rubasu, lanilapulapwane si la yakaikai kwini ka singibadhane ka umawmase, lri kai maka kaungu. Ku durisu lri mia muswane isadra.

¹⁵ Kusu pulringava, kusu nakia tudurisu ikai Izipiti; kunaku ka Tamatama ka Twaumasesu arakai ku maadrau ku puku malra palribulu muswane si pulatadre. Lakamani ku drekaseli muswane, kusu tara pasusua ki Taisadrasadrane ka vai.

¹⁶ “ ‘Pasusua ku drekaseli ka Tamatama ka Twaumasesu musakene ki marudrawdrangesu, lasu kasasulivate sanaka takipuawngananesu, ikai kwini ki abadhaneli muswane ka kadaengane si kalragi ku niakesu.

¹⁷ “ ‘Madha papacapacai ki umawmase.

¹⁸ “ ‘Madha sudringai madha pasudringai.

¹⁹ “ ‘Madha kupawpa.

²⁰ “ ‘Madha kawrivariva ku asakalisiane ki umawmase.

²¹ “ ‘Madha kararau si kadalame ku taelrelre ki palrapalra; la madha kararau ku daane ki palrapalra, kadaengane, duri, lwange, ruba, si drumane ka lamanemane.’

²² “Kilakikai amani sa ikai kavai lregelrege sarubu ki mapapangale ku Tamatama si papia liniane kawriva kikai padradrekase. Ikai kwini, patwalai ki kelrabe si madradrimiti ka ememe papia numiane akwadrau kawriva. Kathane kai ku drekaseini. Sakabilrilinga la malra kikai ladrekase pacase pikai ki drusa ka alibi ka lrenege, si baai nakwane.”

Mwakuludru ku mapapangale

²³ “Sakamani kwidra, kwadaraisi palraelre ku lregelrege; la kilalra numi ku lingau ku twalai ki dradrimitane ngibwale. Ku tarasangililuku ki lazuku si lamarudrange la makitu kela kikawriva nakwane,

²⁴ la iya kai, ‘Kialalra nai ki Tamatama ka Twaumaseta twalai ki kelrabe kawriva naiane, padrele naiane ku puku si papedrenganeini! Kaikameane, kialringaunga nai, adravane papia ki umawmase kawriva ku Twaumase, laka sakamiana si panianiakeana kai umawmase.

²⁵ Kaiasasane, asingithanga si tapacailringa iya? Kavai matiaukuludru ka kelrabe lri thamukulu mitane. Lwiyasi la pelata kilalra ku lingau ki Tamatama ka Twaumaseta, lri tara paacaita.

²⁶ Ikai ki umawmase aneane ku kialalranga ku lingau ki Twaumase twalai ki kelrabe la dulrwana panianiake?

²⁷ Musi! Ala siwlria mulregelrege, si pudriadriingai kilalra ku takawrivane ki Tamatama ka Twaumaseta, ala pelaela naiane. Lri kicacaligiri nai si pasusu.’

²⁸ “Sa kilalra kikai vaga kai ku Tamatama la kawriva nakwane, ‘Kialalranga naku kai lavaga kai ki laumawmase. Pacengecenge kwi taiyane lini,

²⁹ Anatumane la katapikaiyane ku miyaiya kai ku kidremedreme lini, ka sakamia ku musakenane lini nakwane, pasusu ku hulriceli, kwini lalasu si lagagane lini lani kasulivaliivate sanaka manemanenga.

³⁰ Pelaela liniane, siwlria mwa ki balrawbau lini.

³¹ Ai asusura ikai nakwane; lri malraku baai muswane sudralru pakaelre ku hulrice si padradrekase. Lri bulrusu liniane, kwini lalasu lani ikai kwini ki abadhane liniane ka kadaengane ka patengatengane pasusu.’

³² “Swa Iseraylri, kunumi tara pasusua sanaka drekase ki Tamatama ka Twaumase numi, madha sidrekadrekase kuna vaevanga;

³³ pasusua singibila patueelre. Lu mia kikai, lri panianiake numi, si kipasavidhi sanaka tatwatumanane numi, si kawlai ikai kwini ki adrikisane numi ka kadaengane.”