Tapelane Drekase 4 - Ngudradreadrekadhane Ka Sisiu 魯凱語聖經

Ku Musi pasapukwane pasalaladha iya ki swa Iseraylri

¹ Sakabilrilinga, ku Musi pasapukwane ki swa Iseraylri iya kai, “Kunumi kilalra ku bulruli numiane ku tinukakudhanane si nikelretane, lu mia kikai, lri tara panianiake numi, si sakadaenganane ku patarumara baai numiane ki Tamatama ka Twaumase ki cucungulane numi.

² Kikai drekaseli numiane madha drimadrima madha kivalavala. Kunumi tara paluluda kai patarumarali pawsuru kai drekase ki Tamatama ka Twaumase numi.

³ Wadrele numi ku takaungane ki Tamatama ikai lregelrege Biure. Yakai kwini amudu sanaka wasukubu ki Baale ku umawmase,

⁴ kathane numi ka la tengatengane papia ki Tamatama ka umawmase si pakelanga kaikameane panianianiakeana.

⁵ “Pasuswaku ku drekase ki Tamatama ka Twaumaseli, si malra nguelre ku tinukakudhanane si lanikelretane si bulru numiane; ikai numi ki lrika adrikisane numi ka kadaengane tara pasusua.

⁶ Kunumi tara pathingala pudriadringai paluludu; lu mia kikai lri maka dulru numi papia ki maelane ka kuni pathingalane ku thingalane si lrigilane numi. Kwini lalasu sana kilalra kikai la tinukakudhanane, lri tara iya kai, ‘Kikai mapapangale ka saniange ka kuni ala tathiathingale ka talrilrigili iya!’

⁷ “Adravane ka saniange ku kuni kadrwa ku natangeanga ku twaumase ku ngwadadethe ki mapapangaleini, mia ki Tamatama ka Twaumaseta adeethe mitane; la kitubita iniane, la tubalre.

⁸ Adravane ka saniange ka kuni kadrwa ku tinukakudhanane, ka paramia nakwane bulru numiane ku hulrice ka aparamaramau.

⁹ Kunumi dradrela! Ku taikaiyane numi kawmasane madha karimuru kudra drele numi ku tapangimiane. Pelaela pawcungulu ki lamwabaibalrithi numiane,

¹⁰ Sakacaili kwini kunumi nayakai numi kavai taililingane lregelrege Hurebe, si acegecege icucubungu ki Tamatama ka Twaumase numi. Ikai kwini, ku Tamatama peaelaela nakwane, ‘Kusu sarubwa payelrelre ki mapapangale. Ani kilalra ku akawrivaneli amiaku liniane, ani kibulru ku amakalautwane usakene mukuludru nakwane, si bulru ki lalake lini usakene mukuludru nakwane.’

¹¹ “Kwini, la makitu kelanga numi, si acegecege ikai lebe lregelrege. Ikai lregelrege la kadradrimiti ku ememe. Ku apwi la kelrakelrabe papubebelenge, tali belenge kainganai ku icecelrenge ku ebelre.

¹² Ku Tamatama la twalai ki kelrabe papia numiane kawriva, laka kathane ku lingauini ku kilalra numi, ai kai numi wadrele ku tangimiamianeini.

¹³ La papia numiane pelaela ku takiketeketane numiane, ani paluludu ku taimangealane ka drekase iya numiane. Wapacase kwini taimangealane ka drekase pikai ki drusa ka alibi ka lrenege.

¹⁴ Ku Tamatama wadrekase nakwane ku abulrwane numiane kai hulrice si nikelretane ka kakudhane; kunumi lu talubalrenga numi si drikisi malra kwini ki kadaengane, kapatengatengane paluludu.”

Pakiapapawlringau ki mapapangale madha sukusukubu ki samiamiange

¹⁵ “Ku Tamatama yakai lregelrege Hurebe, twalai ki kelrabe ki apwi kawriva numiane, kai numi wadrele ku namaneemanenga ku tangimiamiane. Pakai ku amuesadhane numi, kunumi dradrela.

¹⁶ Madha ngipapasikaikai daredarepe sanaka maneemane tusamiamiange adravane ka sawvalai ka ababai,

¹⁷ ka waudriwdripi si adhadhame,

¹⁸ ka lawagulagulai si lakange, thadaalrane madha piapia kwini.

¹⁹ Kunumi la madha mulrabulrabuku ki akikituthiathingalane numi, si mwa sukubu kwini ki drele numi ku latariau belenge, amani kai vai, dramare si latariau. Ku Tamatama ka Twaumase numi wabaai kilakikai ki drumane ka umawmase, si pangilralraaingi liniane mwa sukubu;

²⁰ ai ku Tamatama patwalai Izipiti numiane, patwalai ki madrareange ka talamalamane palribulu numiane. Ku malra sangiluku numiane mulatadre, ani akawkawlu nakwane amia, mia kaikameane.

²¹ Ngwalai numiane, ku Tamatama ka Twaumase numi la papia nakwane kaelaela, kiketekete kai palraingi nakwane talubalre ka kadravane Yuredange, si mudaane kwini ki abaadhane numiane ka mathariri ka kadaengane.

²² Lri pacadhaku ikai kai, kai maka talubalre kadravane Yuredange; ai lri talubalre numi, si drikisi kwini ki mathariri ka kadaengane.

²³ Kunumi dradrela, madha karimurimuru ki Tamatama ka Twaumase numi ku tamakaketeketane iniane, kunumi paluluda ku padradrekaseini madha ngidadaredarepe ku ruthuku ki Tamatama ku sanaka maneemanenga ku samiamiange.

²⁴ Asi lwiyane ku Tamatama ka Twaumase numi mia ki kelrabe ka apwi, kai lri palraingi sanaka twaumase kiecebe iniane.

²⁵ “Adravane ikai numi kwini kawlainga, si tuagaganenga, madha ngidadaredarepe ku sanaka samiamiange, si pasalriu. Ku miyaiya kikai ngialisiane lu drele ku Tamatama ka Twaumase numi, lri pangilisi ki kidremedremeini.

²⁶ Kaikameane, watawtavaku papia belenge lebe ku akelane siwmi, lwiyasi kai numi kilalra nakwane, lri padaalru numi twalai kwini ki kadaengane si kamudu. La lri kai numi kaulai ikai kwini ki amwane numi drikisi kavai kadaengane kadravane Yuredange.

²⁷ Ku Tamatama lri pakatwase numiane sarau mwa ki druanga ka kuni, kai lri tathainunga kulri maka asuru.

²⁸ Ikai kavai, lri sukubu numi ku nitutwaumasane arakai ku angatu ku lrenege ka kai maka manwamaca, kai maka kialalra, kai maka wakane, kai maka wasabalri ka lasamiamiange.

²⁹ Ikai kwini, kunumi kipasilapa ki Tamatama ka Twaumase numi; lwiyasi salika vaeva numi kipasilape iniane, lri tara maka kidringai numi iniane.

³⁰ Lu kipadradresenge numi ku sapapacai, si kipakwalringa turamuru, tara papia ki Tamatama, si kilalra iniane.

³¹ Amanini ku mathalraalrainga ka Tamatama, ka Twaumase numi, kai lri cilri numiane, si amudu numiane; kai lri karimuru ku ngikakamanini kiketekete ki cucungulane numi.

³² “Ku numi drela singibila ki tangilribatane numi, twalai sa kai numi kitulalakeana, drela pakela sa bekabekace ki umawmase ku Twaumase. Kunumi drela singibila palraelre kawmasane. Aneane ku wadrelenga ku kialalranga ku ngimiyaiya kikai ku maparamuru ku takaungane?

³³ Swainu ka minzuku ku paramia numiane, kilalra sakawriva patwalai ki wakelrakelrabe ku Twaumase la panianiakeana numi?

³⁴ Yakai ku latwaumase ku paramia ku tamarasikaiyane numiane ki Tamatama ka Twaumase numi ikai Izipiti, lreme patwalai ki taingeane ka kuni si malra palribulu numiane, si akawkawlu iniane? La patakamacamaca numi drele sa arakai ku saniange ku puku, pulebe ku swalrubu si apwi, pia ku pinangu Twaumasane ka puku, putaluvaivai kikai la matiasamali ka takaungane.

³⁵ Ku Tamatama ku pathingalaneini numiane kilakikai, sapelaelane ala ka kathaneini ka Twaumase; kathaneini, kadrwa ku druma ku Twaumase.

³⁶ Pakialalra numiane ku twalai belenge ku lingau, arakai kikai bulru numiane, la padrele numiane ku saniange ka kelrabe, twalai ki kelrabe kawriva numiane.

³⁷ Makalithi ki cucungulane numi, la pilri si cegecege numiane, arakai ku pukuini, ngikakamani sangiluku numiane mulatadre Izipiti.

³⁸ Lu aru cucubungu numi, la malra kwidra sapupukwane numiane ka minzuku pakatwase, pakai ku asangilukane numiane mudaane, si malra kwini kadaengane lini baai numiane, kaikameane piakaiyana numi kwini kadaengane.

³⁹ Lakamani kwidra, kunumi tara ngulringava, madha karimurimuru, kai kawmasane kathane ku Tamatama ka Twaumase; kathaneini kadrwa ku drumane ku Twaumase.

⁴⁰ Kaikameane, wamalra kwini hulrice si padradrekaseini patarumara numiane; kunumi pasusua. Lu ngimia kikai, kunumi si lagagane numi lri tara kasulivate kipasavidhi sanaka manemane. Lri pacungulu numi ikai kwini patarumara ki Tamatama ka Twaumase numi ka lrika palralrawthunga ka cungulu numi kikai kadaengane.”

Tamwane kipalakebe ka cekele tali talrawane kadravane Yuredange

⁴¹ Sakabilrilanenga, ku Musi la pikai tali talrawane kadravane Yuredange ku taitulrwane ku Tamwane kipalakebe ka cekele.

⁴² Kikai lacekele nipasikaiyane kwidra ki pasalriu, ai kaika waranau papacai ki umawmase. Ku miyaiya kai ku umawmase lri maka mudaane ki Tamwane kipalakebe ka cekele, kai kipapacai.

⁴³ Ku Musi la ikai ki talikai ki Riwbingi kwini cekele Bizere tali lregelrege calragulragu, la kelrete ki Gade pikai tali cekele Ramuthe kavai Gileade, kelrete ki Manase pikai cekele Gulane kavai tali Basane, tu Tamwane kipalakebe ka cekele.

Patarwamara ku hulrice ki Twaumase

⁴⁴ Ku Musi papia ki swa Iseraylri patarumara ku hulrice ki Twaumase.

^45-46 Twalai Izipiti, sa darurunga tali talrawane kadravane Yuredange ka valrwalru ki cekele kwini Bithepiure, ku Musi patarwamara kikai la tinukakudhanane si la nikelretane. Kikai kadaengane amani ku nakacekelane ikai Hesebunge ka talialalai ki swa Amuri ka Sihunge. Ku Musi si swa Iseraylri sa katwasenga Izipiti, pamalebe iniane,

⁴⁷ la drikisi kwini kadaenganeini si kadaengane ki talialalai ki swa Basane ka Uge. Kikai kadaengane ki tadrusa ka talialalai ki swa Amuri tara yakai tali talrawane kadravane Yuredange,

⁴⁸ twalai tali lrawdru ki talikai babiabila kadravane Arenunge kavai Arure daruru talriwgane lregelrege Siriunge, ka lregelrege Heremunge.

⁴⁹ Kikai kadaengane mialri ka nipaelreane kwini talikai tali talrawane kadravane Yuredange, ku tali lrawdru wadaruru Titimwane ka laveke, ku tali talrawane wadaruru taililingane lregelrege Pisega.