Tapelane Drekase 34 - Ngudradreadrekadhane Ka Sisiu 魯凱語聖經

Tapacadhane ki Musi

¹ Ku Musi twalai dratane Muabe mwa ki lregelrege Nibu, la daruru kwini cucubungu ki Yeriku ka karingavane ki lregelrege Pisega. Ku Tamatama piakai kwini padrele iniane palraelre ki kadaengane Kanange, twalai Gileade daruru tali dradha ki cekele Dange,

² palraelre Napetali, Iparaime si talikai ki Manase, palraelre Yuda. Papia tali sapakalriwgu daruru ki laveke Miditerania,

³ tali lrawdru Yuda si twalai Zuare daruru ki cekele ki abare ka Yeriku ki kabicelrakane dratatane.

⁴ Ku Tamatama kawariva ki Musi, “Kikai palraelre ka kadaengane amani kudra palraingingali ki Aberahame, Isake, Yakubu si baai ki lagaganeini. Kikai padrelengaku muswane kikai kadaengane palraelre, ai kaisu lri maka mudaane.”

⁵ Ku sasiakawlu ki Tamatama ka Musi la pacai ikai ki kadaengane Muabe, mia kudra taiyane ki Tamatama.

⁶ Ku Tamatama la malra iniane dralreke pikai balrealreanane ki cekele Bithepiure ka valrwalru Muabe, pakelanga kaikameane, kadrwa ku umawmase ku wathingale ku taikaiyaneini kidralreke.

⁷ Sapacai ku Musi tara 120 ku cailini, lakarakarakaceana, samacaneana.

⁸ Ku mapapangale ki swa Iseraylri la ikai dratane Muabe pasikai iniane kalreme makamatulrulu ku vai.

⁹ Ku lalake ki Nunge ka Yesua kiasuete ki lrigilane, asi lwiyane ku Musi waansu iniane kaamani ku lri mucungulu. Ku mapapangale ki swa Iseraylri kialalra si pasalaladha ki Yesua, la paluludu ku patarumara ki Tamatama liniane pangukai ki Musi ku padradrekase.

¹⁰ Ikai ki swa Iseraylri kadrwa ku miyaiya ki Musi ku yuginsia, ku Tamatama namaicucubungu iniane kikawriva.

^11-12 Kadrwana ku yuginsia ku wadulru pangimia ku tasikawlane ki Tamatama ki Musi kiecebe ki talialalai ki swa Izipiti, ki latabebelengeini, si tapangimianeini ku pinangu Twaumasane ka puku ikai palraelre ki swa Izipiti, la mialri kakadrwa ku yuginsia ku wadulru pangimia kudra takaungane ki Musi ikai cucubungu ki mapapangale ki swa Iseraylri kudra la palrealrebane matisamaimali ku tapangimiane.