Tapelane Drekase 33 - Ngudradreadrekadhane Ka Sisiu 魯凱語聖經

Swabulrubulru ki lazuku ki swa Iseraylri ku Musi

¹ Sakaiyana pacai ku umawmase ki Twaumase ka Musi, papia ki mapapangale ki swa Iseraylri kipusau. Kikai lebe amani ku sasubulrubulrwane ki Musi:

² Ku Tamatama twalai lregelrege Sinai kainganai, la mia ki vai ka twalai Idume mubelenge. Twalai lregelrege Parange paledra ki kawkawluini. Tathathatha ku sasiakawlu ku twapapapalra iniane, ku vanaleini waecenge ku kwadaladalai ka taliwlare.

³ Ku Tamatama madalame ki kawkawluini, palakebe ki umawmaseini. Lri guruthungane nai ikai cucubungu ki drapaleini, si tarumaramara ku sabulrwaneini.

⁴ Lri pasusu nai ku patarumara ki Musi ku hulrice, kwini yai, amani ku tinukuciacingalranenga ki swa Iseraylri.

⁵ Lu yelrelre ku lakiacapili ki swa Iseraylri, ku Tamatama lri atalialalai ki kawkawluini.

⁶ Papia ki zuku ki Riwbingi, ku Musi swabulrubulru iya kai: Ku umawmase ki Riwbingi adravane tabekele, kwini lalasu ani kapalralrawthu kai kamudu.

⁷ Papia Ki swa Yuda, swabulrubulru iya kai: Tamatama, kiatubiaku muswane kilalra ku kitubi ki Yuda, lani siwlri maelrelre ki drumane ka zuku. Tamatama, kiatubiaku muswane pasikaiya liniane kikaruburu, si paraluba liniane pamalebe ki badha.

⁸ Papia ki swa Lrivi, kwini lasu swabulrubulru iya kai: Tamatama, kiatubiaku muswane pangukaiya ki swa Lrivi ka zuku arakai ku “Urime” si “Thumime” pelaela ku takidremedremanesu, kwini lalasu amani kudra savaeva ku kidremedreme muswane ka kawkawlu. Yakaingasu Masa kilrialringau liniane. Ikai ka thili Miriba ka berai pathingalane ka asudralrwalrwane.

⁹ Kudra tapathingalanane lini muswane ku tasavaevane ku kidremedreme lini muswane silrialribate ki marudrawdrangeini, betakane si lalake. Kai lalasu pasusu ku padradrekasesu, kwini lalasu makecenge pangimia ku sakiketeketanesu.

¹⁰ Kai lalasu lri bulru ki swa Iseraylri pasusu ku hulrice si padradrekasesu, lai lri ikai cucubungu muswane padalai ku sangwalreme, ikai ki tapatarumaramarane patarumara ku Lama ka lrisi.

¹¹ Tamatama, kiatubiaku muswane pakagaranga liniane, kiatubiaku muswane kiragadha tarumara ku takaungane lini. Kiatubiaku muswane mwalra ku badha lini, Kudra malisilisi liniane ku umawmase lani kaingiradhekanenga.

¹² Papia ki zuku ki Biniyamingi, swabulrubulru iya kai: Ku Tamatama madalame si palakebe ki Biniyamingi; palralrawthu kilibake liniane; kwini lalasu yakai cucubungu iniane kisupisupilri ku sulivatane.

¹³ Papia ki zuku ki Yusepe, swabulrubulru iya kai: Ku Tamatama ani subulrubulru ki kadaengane lini, twalai belenge pawdale, patwalai adringi ki kadaengane beraberai ku acilai.

¹⁴ Ku umawma lini ani makakelrekelrete ku takuvaiyane, luka caili ngukaalra ku taleke, ku kadaengane lini ani pikalamanemanane pumadrumaadru ku mathariri.

¹⁵ Kudra sidrumane ka lrelrelrege ani cebe suete ku mathariri ku ivai.

¹⁶ Kudra twalai ki kwadaladalai ka cecenekane ka angatu tawtau ka Tamatama ani twadrau subulrubulru liniane, ku kadaengane lini palraelre la nika mathaariri ka lamanemane. Kikai la akaesadhane ani makakai ki zuku ki Yusepe, asi lwiyane kai lasu amani ku tarasangililuku ikai ki labetakaneini.

¹⁷ Ku Yusepe yakai ku mia ki sawvalai ka lwange ku puku, yakai ku lawngu ki yaubulane ka lwange, ku lawnguini makakalra ki Manase ku kudrudrudrulu, ka makakalra ki Iparaime ku kudrawdrawdrai, arakai lawngu ki sanaka kuni, si pathirakupu pakela ki talikaiyane ki kadaengane.

¹⁸ Papia ki zuku ki Zibulungu si Isakare, swabulrubulru iya kai: Ku tarasiwbai ka varukuru ki Zibulungu ani masasawlriwlri ikai ki laveke, ku tacekecekelane ki Isakare ani drimadriima.

¹⁹ Kwini lalasu wadawlu ki maelane ka zuku mwa ki lregelrege lini, ikai kwini patarumara ku naika apatarumarane ka lrisi. Kwini lalasu patwalai ki laveke tarumara ku lazaisange lini, patwalai ki babiabila ki laveke ka aenaenai malra ku tinukucingalrane ka lawbubulu.

²⁰ Papia ki zuku ki Gade, swabulrubulru iya kai: Drengedrengera ki Twaumase, asi lwiyane paruswadrau ku kadaengane ki Gade. Ku Gade mia ki raiyungu mukalavalava, lri thuriace ku sadavadavace ki la nipanane, gulalici ku lrangici ki awlruini.

²¹ Kwini lalasu ngiapapasikai malra ku mathaithaariringa ka kadaengane, ka naika amalrane kidrulru kwidra ki lakiacapili, sa isarubu ku lakiacapili ki swa Iseraylri, kwi lalasu paluludunga ku hulrice si padradrekase ki Tamatama.

²² Papia ki zuku ki Dange, swabulrubulru iya kai: Ku Dange yai, amani ku yacengecenge ka raiyungu, twalai lregelrege Basane kainganai mutaluvaivai.

²³ Papia ki zuku ki Napetali, swabulrubulru iya kai: Ku Napetali kiakilibake ki Tamatama, ku pagisane ki kadaenganeini wadaruru ka tali lrawdru ki baiyu Galrilri.

²⁴ Papia ki zuku ki Asere, swabulrubulru iya kai: Ku kisubulrubulruini ki Asere walribate ki drumane ka zuku. Ani ikai ki labetakaneini akinathalradhane, ku kadaenganeini ani cebe alraelre ku ulrive.

²⁵ Ku cekeleini ani ikai ku lrawlrawdru ka lriwlu ka sadrukudrukurane ka adreme palakebe, ku tapanianianiakaneini ani palralrawthu kisupisupilri ku awdringadringadhane.

²⁶ Swa Iseraylri, kadrwa ku drumane ku Twaumase ku lri maka kiramau ki Twaumase numi. Ngwakai ki ememe mulebe palribulu muswane, ku lrekemeini ngwababelenge lribate.

²⁷ Ku Twaumase lrika tapalakebane muswane, kudra palralrawthu ka pukuini taparalubane muswane. Pasiakai muswane pakatwase ki badha, wadrekase muswane amudu liniane.

²⁸ Ku lagagane ki Yakubu kiasupisupilri ku rathudane. Kwini lalasu swateelrai ikai ki kadaengane ka salraelre ku lataleke bavane ka bava, ku udale pakaalreke kwini ki kadaengane.

²⁹ Iseraylri, ala mwaesaisu turamuru! Amanisu ku kiapalribulu ki Tamatama ka kuni, aneane ku lri maka kiramau muswane? Ku Tamatama yai, alatharesu, dramusu. Palakebe muswane, ala akacisu. Ku badhasu lri kusange muswane, lai lri dredresu liniane.