Tapelane Drekase 32 - Ngudradreadrekadhane Ka Sisiu 魯凱語聖經

¹ Belenge, kicacaligira kilalra kai apelaelaneli, kadaengane, kiraraketa kilalra kai vagali.

² Kai bulruli mia ki udale tutudru, makakai ki kadaengane alamu. Kai vagali mia ki wathethethenge alreke ki rigarigi. Mia ki udale pwacilai ki bengelrai si angatu.

³ Lri pelaelaku pasalraelre ku saniange ka nagane ki Tamatama, si senai drengedrengere ku takasaniangane ki Twaumase.

⁴ Ku Tamatama amani kudra sapupukuanenga ka tarapalakebe, ku tapianeini kiatulrepenge, aparamaramau. Ku Twaumase patengatengane, matisudralru, ku tasaibanganeini pacengecenge, aparamaramau.

⁵ Ai kai numi savaeva ku kidremedreme, la kai sudalepe alalake iniane, amani numi ku pasalriu, walrilrigili ka minzuku.

⁶ Kadrwa ku thingale, ka makulrungu ka mapapangale, lri tungimiyaiya numi kikai pangibilri ki Tamatama? Amani ku wabekace numiane ka Tamatama, ka tama numi, wabekace numiane, la acegecege numi akuni.

⁷ Kunumi ngulrialringava kudra ki ngialribatenga, kunumi siwlriwlria drele ki lrikisi. Kunumi kitubia ki tarudrawdrange matikai ku tapiane ki siaswalane, kunumi kitubia ki aswalalala matikaikai ku lrikisi.

⁸ Ku Abebeelengenga apavalavala ki lacekele ku kadaengane, pawvagavagai ki umawmase; singikai ku takathane ki swa Iseraylri, si kelrete ku pagisane ki sanaka umawmase,

⁹ Ai ku Tamatama wapilri ki lamwabaibalrithi ki Yakubu tukawkawluini, la tunipawkalrivilane ka tacekecekelaneini.

¹⁰ Yakai calragulragu kidringai liniane, ikai ki kiapalapalai ka enaenai kipadradresenge liniane, palakebe liniane, siarapale liniane, ku kilibakane mia ki kinilibakane ka lalake.

¹¹ Ku takanga wabulru ki lrulai ka takanga ngipapalai, la paipai ku sapakepake aba ki lrulai ka takanga, ku Tamatama mialri paipai ku sapakepake aba ki Iseraylri, ku kaika amucilriane.

¹² Ku Tamatama ngiakakamani sangiluku ki kawkawluini, Kai mwarikai ku akiparalubane ki drumane ka twaumase.

¹³ La parathudu liniane kwini ki takaabelengane, kisupilri ku nikitalekane ki umawma. Kwini lalasu wakane ku twalai ki alrisapesape ku valu, twalai ki lralrenegane cebe ku lawlau ki ulrive.

¹⁴ Ku lwange si kiu lini lu pe ku esebe kai maeleleme, kwini lalasu piakai ku mathaithaariringa ku nikiubawbalane ka kiu, si kiu, lalwange, kwini lalasu piakai ku mathaithaariringa ku mugi si bava ka budu.

¹⁵ Ku kawkawlu ki Tamatama mabucubucuku karicucuru, kwini lalasu sa ngiradhekanenga wabaebalre. Kwini lalasu wacilri ki wabekace liniane ka Twaumase, kwini lalasu wacilri ki sapupukwanenga ka tarapalribulu.

¹⁶ Kwini lalasu wasukubu ki samiamiange dawlu ku akaelaelane ki Tamatama, kwini lalasu pasalriu si dawlu ku akaelaelaneini.

¹⁷ Kwini lalasu patarwamara tulrisi ki aidridringane, si baai ki kaika thingale lini ka twaumase, kikai twaumase kaika sukubwana ki swa Iseraylri, ku cucungulane lini kaiyana mwakuludru.

¹⁸ Kwini lalasu marimuru ki sapupukwanenga ka tarapalakebe, kwini lalasu sakawlraunga kudra wabaai ku niake ka Twaumase.

¹⁹ Ku Tamatama wadrele kikai la ngialisiane la kaelaela, la cilri ki kawkawluini.

²⁰ Amia kai: Kainaku lri paralubunga liniane, lri dredrelaku ku lrika angimiane lini; kai lalasu makelrathe turamuru, ka kai savaeva ku kidremedreme ka kawkawlu.

²¹ Kwini lalasu arakai kwini ki “Kaika kiatu Twaumase” ka twaumase ka samiamiange pakagirimucu nakwane, kwini lalasu arakai ki kaika Twaumase papathalra kalisi nakwane. Lakamani, lri arakaiyaku ku “Kaika kiatu kawkawlu” ka mapapangale pakariciu liniane. Lri arakaiyaku ki makukulrungu ka kuni papathalra kalisi.

²² Ku elathaneli mia ki apwi kulamalama, lri lama palraelre ki kadaengane, ku lisiane ka apwi pakadrurungu ki swadriadringi, lri amudu ki karwalai ki maadrau ka lregelrege.

²³ Lri arakaiyaku ku kai lri idrengere ka amatikurwane lrumai liniane, lri arakaiyaku ku thathatha ku lraili si lraili liniane.

²⁴ Kwini lalasu lri pacai ki silravane, ki caemane, ku matiamukuludru ku swalrubu lri pakamudu liniane. Ku siduduku ka sulrau lri kace liniane, ku sapapacai ka waudriwdripi lri lredepe liniane.

²⁵ Ku tamakakaruruburane paacaicali ki pakulrulrulu ikai kadalranane cekele, ku apakwapingane pakasepele ki walibakane. Ku langukathathabarane tawvailekelekete lri pacai makanaelre, ku daini si tarudrawdrange mialri kai maka udripi.

²⁶ Naika pakamudaku liniane, si kikarimuru ki yakawmasane,

²⁷ ai kainaku lri padradrarane ki badha lini, kainaku lri palraingi ku nipamamane ku takidremedremane ki badha; iya kai amani nai ka pamalebe ki kawkawluini, ku patengatengane amaniaku ka pwalrima amudu liniane.

²⁸ Kai swa Iseraylri kadrwa ku thingale ka minzuku, Kai lalasu kadrwa ku malrigili aiyane madu.

²⁹ Kai lalasu kai wathingale luka ngwalai ki manemane ku tapangilisiane lini, Kai lalasu kai pwalringalringau ku lrika angimiane lini.

³⁰ Ani maka dulru ku tangeangea pakatwase ki takudrulu ku umawmase? Ku tadrwadrusa ku umawmase ani dulru pamalebe ki lakwapingi? Amani sacilri ki tarapalakebe liniane, ku sapupukwane ka Tamatama wacilri liniane.

³¹ Ku badha wathingale ki latwaumase lini ka kadrwa ku puku, Kai ngiamia ki tarapalakebe ki Iseraylri ka maadrau ku puku.

³² Ku badha mia ki swa Sudume si Gumura ku ngilisianane, mia ki budu pumadru ku siduduku si kapalili ka madru.

³³ Ku bava lini mia ki duku ki maadrau ka sulrau, mia ki padavake ki siduduku ka sulrau.

³⁴ Ku Tamatama ngwalringau ku tapasalrivane ki badha, sana kela ku vai lri pathavungu liniane.

³⁵ Ku Tamatama lri bilri ki badha, sana kela ku vai kwini lalasu lri tara pacai. Kudra akamudane ku vai yacucubungunga. Kudra lrika angimiane lukabibilrili la lri padaalrunga si kela.

³⁶ Ku Tamatama wadrele ki kawkawluini sa amakinga la palribulu liniane, ku Tamatama wadrele ki wasukusukubu iniane sangupukwanenga la kakalithi liniane.

³⁷ Ku Tamatama lri kaelaela si kivaga ki kawkawluini, kudra sukusukubu numi ka twaumase yakai inu? Kudra satalutalu numi ka tarapalakebe yakai inu?

³⁸ Naarakai numi ku lamace ki nipatarumarane lapu liniane, naarakai numi ku saparalikilikane ku bava paungulu liniane, kikai kitubia liniane lani kela paralubu, si dawlu liniane palakebe!

³⁹ Kathanaku ka Twaumase, kadrwa ku drumanenga ka Twaumase. Papacadhaku ki umawmase, la papanianiakaku ki umawmase, pakadulaku ki umawmase, la pawdringadhaku ki umawmase. Kadrwa ku umawmase ku lri maka katwase ki alrimali.

⁴⁰ Papiaku belenge ciliki ku alrima, la arakai kai niakeli kiketekete,

⁴¹ lri twadremaku paeleelethe ku rangisane ku dramu, la aparamaramau, lri bilriaku ki badha, la pathavungu ki malisi kagirimucu nakwane.

⁴² Ku lrailili lri ungulu ku erai lini, ku dramuli lri kane ki beate lini. Kainaku lri pacepe ku kiaecebe nakwane, adravane ka madula ka kwapingi si kiaravase lri mialri makitu pacai.

⁴³ Lakuni, tupapalra ki kawkawlu ki Tamatama kiraragai! Asi lwiyane ku Tamatama lri pasikai liniane malra ku kiame ki erai. Lri bilri ki badhaini, lri pacepe ku pasalrivane ki kawkawluini.

⁴⁴ Ku Musi si lalake ki Nunge ka Yesua yakai ki tayelrelreane ki swa Iseraylri cucubungu silrigu kikai senai.

Awlriwlri ki Musi

⁴⁵ Ku Musi samalranga kikai sabulrwane ki Twaumase papia ki mapapangale pelaela,

⁴⁶ la kawriva liniane, “Kunumi tara pasusua kikai pelaelali numiane kikai padradrekase, si mialri paucungulu ki lalalake numi, pelaela liniane tara pasusua iya.

⁴⁷ Kikai la padradrekase kaika ungawngau ka vaga, amani ku niake numi. Lu pasusu numi, lri dulru numi kawlai ikai tali sapakalriwgu kadravane Yuredange ka amwane numi malra ka kadaengane.”

⁴⁸ Kikwini ki vai, ku Tamatama kawriva ki Musi,

⁴⁹ “Lu mwa kavai cucubungu cekele Yeriku, ki talikai lregelrege Abarime kavai Muabe, la mwa ki lregelrege Nibu, twalai kavai masiasirare ka kadaengane Kanange, kwini ki abadhaneli ki swa Iseraylri ka kadaengane.

⁵⁰ Lri pacaisu ikai kavai ki lregelrege, mia ki taka ka Arungu pacai ikai lregelrege Hure,

⁵¹ asi lwiyane kunumi yacucubungu numi ki swa Iseraylri kai savaeva ku kidremedreme nakwane. Yakai numi calragulragu Zingi, ka cekele Kadise kwini babiabila ki adeethe ki tuturu Miriba, icucubungu ki mapapangale kai musakene tukucingalre nakwane.

⁵² Lakamani kwidra, lri sadaailisu si drele kwini lrika abadhane ki swa Iseraylri ka kadaengane, ai kaisu lri maka mudaane.”