Tapelane Drekase 31 - Ngudradreadrekadhane Ka Sisiu 魯凱語聖經

Pacegecege ki Yesua pacungulu ki Musi

¹ Ku Musi pacungulu kawriva ki mapapangale ki swa Iseraylri,

² “Kikai asasane wakelanga naku ki tara 120 kai caili, la kainaku lri maka pacungulunga sangiluku numiane. Si ku Tamatama peaelaelanga nakwane, kainaku lri maka talubalre kadravane Yuredange.

³ Ku Tamatama ka Twaumase numi lri ngikakamani ikai cucubungu numiane sangiluku numiane, si amudu ki swakai kwini ka laminzuku, lai lri malra numi drikisi kwini kadaengane lini. Singikai ku takawrivane ki Tamatama, ku Yesua lri kamani ku tarasangililuku numiane.

⁴ Ku Tamatama ku tapangimianeini pamalebe ki tadrusa ka talialalai ki swa Amuri ka Sihunge si Uge, kabebetethe ki kuni lini, lai lri mialri pangimia amudu kwini ki laminzuku.

⁵ Ku Tamatama lri paakaci numiane liniane. Kunumi tara pangimia ku drekaseli numiane pangimia liniane.

⁶ Madha mukuludru, kecengana, kagaranga, asi lwiyane ku Tamatama ka Twaumase numi lri tapalra numiane. Kai lri karimuru numiane, cilri numiane.”

⁷ Samia kwini, ku Musi la dawlu ki Yesua, la ikai cucubungu ki mapapangale ki swa Iseraylri kawriva iniane, “Kecengana, kagaranga, asi lwiyane lri kamanisu ku wasangiluku ki mapapangale mwa malra kwini pukawnunga ki Tamatama baai ki cucungulane numi ka kadaengane.

⁸ Ku Tamatama lri ikai cucubungu muswane kamani ku wasangiluku muswane, lri tapalra muswane. Kai lri karimuru muswane, kai lri cilri muswane. Lakamani kwidra, kusu madha amalreme, la madha mukuludru.”

Lu tara pitunga ka caili lri tara putaluvaivai silrigu kai hulrice ka hungu

⁹ Ku Musi la pacase ku hulrice ki Twaumase, si la baai kwini ki taradrangalru ki Langiane ka barakalai ka swa Lrivi si laciwru ki swa Iseraylri,

¹⁰ drekase liniane iya kai, “Ki nitara pitupitwane ka caili ki sakapitu ka caili, ka amani kwidra tasupilrane ki lakiame ka yakai ki Talakangane ka lrisi, lri akwadrau numi silrigu kikai hulrice.

¹¹ Ku swa Iseraylri lu kela ki pilri ki Tamatama ka Twaumase numi ka taikaikaiyane sukubu yai, lri papia numi liniane silrigu kikai hulrice.

¹² Lri tara dawlu numi sarubu sanaka sawvalai, labaibai, lavavalake, si yakaikai numiane ka maelane ka umawmase si taelre, lani kilalra makanaelre kikai hulrice, si kicawcakwane musakene ukuludru ki Tamatama ka Twaumase numi, kapatengatengane pasusu ki hulriceini.

¹³ Lumia kikai, ku lamwabaibalrithi numi, ka amani kwidra kaiyana kialalra ku hulrice ki Tamatama ka Twaumase numi, lri ikai ku amaka kilalrane lini. Ikai ki tapanianianiakane lini lri mialri ikai kwini ki amalrane numi ka tali sapakalriwgu kadravane Yuredange kicawcakwane musakene ukuludru ki Tamatama.”

Bibiilrilinga ka vaga ki Tamatama baai ki Musi

¹⁴ Ku Tamatama kawariva ki Musi, “Lri kaisu tarathainunga si katwase kai kawmasane. Lu dawla ki Yesua mwa kai ki Alrivilrivi ka balrawbau, lri baadhaku iniane ku awngane.” Ku Musi si Yesua la kela ki Alrivilrivi ka balrawbau.

¹⁵ La ikai ku ememe ku ulrudru idrengere ikai lrawlrawdru ki Alrivilrivi ka balrawbau, ku Tamatama yakai ki ememe ka ulrudru papia liniane adrelane.

¹⁶ Ku Tamatama kawariva ki Musi, “Lri padaalrungasu si pacai, lu pacaingasu, ku mapapangale lri kai tuvaevanga ku kidremedreme papia nakwane, lri baebalre kwidra kiketeketeli liniane, kidaili cilri nakwane, si katwase sukubu kwini ki twaumase ki swakai kwini.

¹⁷ Lukamaninga kwidra, lri kalisiaku liniane, cilri liniane, kai thengetenga liniane; kwini lalasu lri kiamudu. Lri kakaalra ku amatikurwane kela mwa ki kinawmasane lini, kwini lalasu lalri thingale ala ka ngwalai nakwane ka Twaumase lini ka kaika watapalranga liniane.

¹⁸ Lukamaninga kwidra, kainaku lri paralubu liniane; asi lwiyane kwini lalasu pasalriunga, si katwase sukubu ki drumane ka twaumase.

¹⁹ “Kaiasasane kusu malra pacase kikai vaeva ka senai, la bulru ki mapapangale ki swa Iseraylri, la paangeki liniane, lani kamani kikai senai kai ku sapathingalane ka sakaelaelaneli liniane.

²⁰ Lri singikaiyaku ku takiketeketaneli ki cucungulane lini, sangiluku liniane mwa kwini ki mwalwaludru ku mireke si valu ka mathariri ka kadaengane. Ikai kwini, kwini lalasu lalri kaesaesainga, ngiesadhane ku tacekecekelane lini. Ai kwini lalasu lri kidaili cilri nakwane, katwase mwa ki drumane ka twaumase sukusukubu, cilri nakwane, baebalre ku takiketeketaneli.

²¹ Lri kakaalra ku amatikurwane kela mwa liniane. Ai, kikai senai kai, lri pacungucungulu kisenasenai, lri kamani ku sapathingalane ka sakaelaelaneli liniane. Adravane kikai kainaku sangilukwana liniane mwa kwini ki pukawnungali baai liniane ka kadaengane, ai wathingalenga naaku ku takidremedremane lini.”

²² Sa kavai kwini, ku Musi la pacase kikai senai, si bulru ki mapapangale ki swa Iseraylri.

²³ Sakabilrilinga, ku Tamatama la kawriva ki lalake ki Nunge ka Yesua, “Kusu kecengana, kasalrwa, asi lwiyane lri sangilukusu ki mapapangale ki swa Iseraylri mudaane kwini ki pukawnungali baai liniane ka kadaengane. Lri tapalraku muswane.”

²⁴ Ku Musi wapacase ku hulrice ki Tamatama pikai ki senate; la ngiabaalai dradrele pacase patuelre.

²⁵ Sa makapacasenga, kwini lasu la kawriva kwini ki taradrangalrungalru ki Langiane ka barakalai ki swa Lrivi,

²⁶ “Kunumi malra kikai hulrice ka hungu ki Twaumase pithili ki Langiane ki Tamatama ka Twaumase numi. Si suru pikai kwini, tusakukuswane ki kawkawluini.

²⁷ Wathingalaku liniane ka makelrathe la baebalre. Sapanianianiakeana naku yai, kikai lalasu kai watelrai baebalre pasalriu ki Tamatama, lu pacainga naku, kai lalasu lrika sikuraranau baebalre.

²⁸ Kunumi dawla sarubu ki marudrange ki lazuku si lakiacapili ki kunkwane kela kai cucubunguli, lri pelaelaku liniane kilakikai. Si tawtau dawlu ki subelebelenge si kadaengane kamani ku wasiwmi.

²⁹ Wathingalaku, lu pacainga naku kikai mapapangale lri aru turamuru aru kalrupi, kalrase ku baaili liniane ku sabulrwane. Lu kabibilrili, kikai lalasu lu kipadradresenge ku amatikurwane ka ngwalai kudra amani lini ka paiya kudra kaika palraingi ki Tamatama liniane ka kakudhane, la pakagirimucu iniane.”

Senai ki Musi

³⁰ Sakabilrilane, ku Musi la ikai cucubungu ki mapapangale ki swa Iseraylri silrigu kikai senai kai.