Tapelane Drekase 30 - Ngudradreadrekadhane Ka Sisiu 魯凱語聖經

Apangimiane ki ngiaradhekane si kiasubulrubulru

¹ “Kaiasasane, lri papilriaku numiane ikai ki kiasubulrubulru si kiapusu. Sangilribatenga kikai laamatikurwane demedeme, sa ikai numi kudra tapacaicaliane numiane ki Tamatama ka Twaumase numi ka lakuni, lri ngulringau numi kudra baaili numiane ku apilriane.

² Lwiyasi kunumi si lamwabaibalrithi numi la ngibangulu siwlriwlri ku kidremedreme, papia ki Tamatama ka Twaumase numi, si salika vaeva ku kidremedreme pasusu kikai pelaelali kaikameane, kudra abadhaneini numiane ku padradrekase,

³ lri tukurwane numiane. Kwini lasu lri twalai ki takipacaicaliane numi, sangiluku numiane, si tupela kisupilri ku ngiradhekanane.

⁴ Adravane ka acaicaicalinga numi kela kidruanga kai kawmasane, ku Tamatama ka Twaumase numi lri mialri malra numiane paisarubu payelrelre, mailuku numiane kela siwlri,

⁵ la patupela numiane maalranga kudra nataikaiyane ki cucungulane numi ka kadaengane, si lrika mangiraeradheekaneana ki cucungulane numi, ka tapapangale ku umawmase.

⁶ Ku Tamatama ka Twaumase numi lri muelebe ki kidremedreme si lamwabaibalrithi numi, lai lri savaevanga ku kidremedreme numi kilibake iniane, si pacungucungulu ikai kwini ki kadaengane cekecekele.

⁷ Lri malra kikai nipuswane padrima pikai kwidra ki kinawmasane ki malisilisi, dredredrepete numiane ka labadha.

⁸ Lri pela numi kilalranga pasalaladha iniane, si pasusu kikai pelaelali numiane kai padradrekase patuelre.

⁹ Ku Tamatama ka Twaumase numi lri pangiradhekane ku awngane numi, si kakalra ku lalake lagagane, la arukakalra ku nilapulapwane, ngukalra ku lataleke. Nakiaragai pangiradhekane ki cucungulane numi, laika thadaalrane pangiradhekane numiane.

¹⁰ Ai lri tara kilalra numi pasalaladha iniane, si pasalaladha kikai nipacasane pikai kai ki hungu ku hulrice, ku hulrice padradrekaseini patuelre. Lri tara savaeva numi ku kidremedreme papia iniane.

¹¹ “Kaikameane kikai baaili numiane kai padradrekase kaika makucingalre pasusu, kaika adaili numiane.

¹² Kikai padradrekase kaika nipakelradhane ikai belenge, kai numi lri kivagana, ‘Aneane ku lri ngitalikaiyane mitane mubelenge si iluku kikai sabulrwane mwa kai lebe, lanai kilalra si pangimia?’

¹³ Kikai padradrekase kaika yakai balrealreanane ki laveke; madha kivaga, ‘Aneane kulri atalingikaiyane mitane talubalre ki laveke si malra iluku kikai sabulrwane, lanai kilalra si pangimia?’

¹⁴ Ku patengatengane kikai padradrekase kaika adaili numiane, yakai ki kidremedreme numi, yakai ki ngudui numi, pakai ku lrika adulrwane numi pasusu.

¹⁵ “Kaikameane, lri malraku kai apanianiakane si apacadhane amulisiane si amusadhane pikai ki cucubungu numi, la ngisasingikaiya pilri.

¹⁶ Lwiyasi la pasusu numi kai patarumara ki Tamatama ka Twaumase numi baai numiane kai padradrekase, kilibake iniane, pasalaladha iniane, pasusu pademedeme ku tinukakudhane si padradrekaseini, lri dulru numi kamani kudra ngiaradhekane ngiesadhane ka kuni. Lalri ikai numi kwini ki amalrane numi ka kadaengane, ku Tamatama lri baai ku akaesadhane numiane.

¹⁷ Lwiyasi lakai numi pasalaladha iniane, kai kilalra, la ngibaalrelringa kilrilrigili si mwa sukubu ki drumane ka twaumase,

¹⁸ yakaiyaku kai ki vai kai ki kadaengane pakipapawlringau numiane, lri tara kamudu numi, kai maka dulru kawlai ikai tali sapakalriwgu kadravane Yuredange, kikwini ki amalrane numi ka kadaengane.

¹⁹ Kaiasasane, wadawlaku kai belenge kai kadaengane si kamani ku wasiwmi, lri malraku kai niake si apacadhane, asubulrubulrwane si akipuswane pikai cucubungu numiane. Ala pilria ki niake! Kunumi si lamwabaibalrithi numi lanu dulru udripi panianiake.

²⁰ Kilibaka ki Tamatama ka Twaumase numi, kilalra iniane, tukucingalra iniane. Lu pia numi kikai, kunumi si lamwabaibalrithi numi lri dulru udripi panianiake, si kawlai cekecekele ikai ki palraingingaini baai ki cucungulane numi ka Aberahame, Isake, Yakubu ka kadaengane.”