Tapelane Drekase 3 - Ngudradreadrekadhane Ka Sisiu 魯凱語聖經

Ku swa Iseraylri pamalebe ki talialalai ki Uge

¹ “La aru katwase nai papia tali dradha, mwa talikai Basane. Ku talialalai ki swa Basane ka Uge wasangiluku nguelre kwidra ki lakwapingini mwa kavai Ideri kikaruburu naiane.

² Ku Tamatama kawariva nakwane, ‘Kunumi madha mukuludru. Lri malraku iniane, si mapapangaleini si kadaenganeini la baai patuelre numiane. Ku paswalala ku tapangimiane numi ki kacekelane ikai Hesebunge ka talialalai ki swa Amuri ka Sihunge, kikai lri mialri pangimia ku tapangimiane ki talialalai ki Basane.’

³ “Ku Tamatama ka Twaumase nai la mialri malra kwini ki talialalai ki swa Basane ka Uge si mapapangaleini baai pwa ki alrima nai. Si papacai liniane demedemenga, kadrwa ka natangeanga ku pasuru.

⁴ Kikwini, la drikisi nai sanaka cekeleini, kadrwa ku mwakalrivili. La mialri drikisi nai kwini ki gemegeme ki talialalai ki swa Basane ka Uge nguelre kwini ki talikai tali Aregube, paelrelre taimanemele ka cekele;

⁵ kikai lacekele laka takececenge ku sapangilalakebane ki cekele: Tabebelenge ku alradre, taelelebane si sadrukurane ki lrawlrawdru ki cekele. La mialri nai drikisi kwidra ki la kaika nialradrane ka cekele.

⁶ Waamudu nai sanaka cekele, papacai demedeme ku umawmase, kai susu ku sawvalai ku labaibai ku tarudrawdrange si lavavalake, pademeedeme papacai, pangimia kudra natapangimiane nai amudu kwini ki kacekelane ikai Hesebunge ka talialalai ka Sihunge kwini ki lacekele.

⁷ La ravase nai ku nilapulapwane, sapesape ki lacekele.

⁸ “Kikwini, la mwa nai drikisi patwalai ki tadrusa ka talialalai ki swa Amuri kwini kadaengane tali talrawane kadravane Yuredange, twalai tali lrawdru vaalru Arenunge daruru tali dradha lregelrege Heremunge.

⁹ Kai swa Sidune, Siriunge amia kwini ki lregelrege Heremunge; kai swa Amuri, Sinire la iya.

¹⁰ Wadrikisinga nai nguelre ki cekele ki talialalai ki swa Basane ka Uge; paelre ki swa tali dratane ka cekele, Gileade si palraelre Basane, tali talrawane Saleka si Ideri.”

¹¹ Kwini talialalai ka Uge amani ku bibiilrilinga ki swa Ripaime. Ku varukuruini niaralrenegane, lu singikaiyane ki lekete, supate ki mituru ku lragiane, drusa ku mituru ku ngulapane. Ikai cekele ki swa Amune ka Raba wadreleana madu kikai varukuru.

Ku swatelrainga ikai tali talrawane kadravane Yuredange ka lazuku

¹² “Samaka drikisinga nai kikai lakadaengane, la malraku kwini ngwadadeethe vaalru Arenunge ka tali dradha ka cekele Arure si lregelrege Gileade, si la ngwakai kikai ka lacekele, padrudrulru baai ki zuku ki Riwbingi si zuku ki Gade.

¹³ La mialri malraku kwini drumane ku tali Gileade si nguelre kwini talikai ki talialalai ka Uge ki swa Basane tudrulru baai ki zuku ki Manase.” (Kwini talikai Basane mialri ka sia Ripaime.

¹⁴ Kwini pararamau ka zuku ki Manase wadrikisi palraelre talikai Aregube, kwini swa talikai Basane, twalai kwini katwase daruru ki tamararaisane ki Gisure si Maka. Ku Yaire swanagane ku naganeini kikai lacekele; pakela kaikameane, kikai lacekele sakamiana sunagane Yaire iya.)

¹⁵ “Wabaadhaku drulru baai ki zuku ki Manase ka Makire,

¹⁶ la malra kwini twalai Gileade daruru vaalru Arenunge ku taingeane ka kadaengane si baai ki zuku ki Riwbingi si Gade. Ku pagiagisane lini tali lrawdru yakai kabicelrakane vaalru Arenunge. Ku pagiagisane tali dradha amani kavai kadravane Yabuke, la ikai ku mararaisi ki pagisane ki Amune.

¹⁷ Ku pagisane tali talrawane katwase daruru kadravane Yuredange, twalai tali dradha baiyu Galrilri si daruru tali lrawdru ki Titimwane ka laveke, ku tali talrawane wadaruru taililingane lregelrege Pisega.

¹⁸ “Ikai kwini, la pelaelaku liniane, ‘Ku Tamatama ka Twaumase nai wamalra kwini kadaengane tali talrawane kadravane Yuredange si baai numiane, la drikisi numi kikai kadaengane. Kikai, pangirarukudra ki sakaredelane numi, si pakamani liniane kamani ku athamadalane ki lazuku ki swa Iseraylri, la talubalre kadravane Yuredange, paralubu ki lazuku drikisi kwini ki baai ki Tamatama liniane ka kadaengane.

¹⁹ Kathaane ku labaibai numi, lalalake numi, si lanilapulapwane (wathingalaku sakalra numi ku nilapulapwane) lrikatumane pikaiya kwini ki tudrulruli numiane ka cekele.

²⁰ Paraluba ki retesane numi ka swa Iseraylri, ralubu liniane drikisi kwini baai ki Tamatama ka kadaengane tali talriwgane kadravane Yuredange, pakeela ku tapasutelradhane liniane ki Tamatama ikai kwini. Mia kudra tapasutelradhaneini numiane ikai kwini. Kikwini, kunumi ala lri siwlri numi mwa kwini ki drulruli numiane kikai kadaengane.’

²¹ “Ala pelaelaku ki Yesua, iya kai, ‘Wadrelengasu ku tapangimiane ki Tamatama ka Twaumase numi ki tadrusa ka talialalai ka Sihunge si Uge; lri mialrini pangimia kwini ki latalialalai ki adrikisane numi ki drumane ka kuni.

²² Kunumi madha mukuludru liniane, asi lwiyane ku Tamatama ka Twaumase numi lri pasikai numiane kikaruburu.’ ”

Kai kia palraingi mudaane Kanange ku Musi

²³ “Ikai kwini, la kitubiaku ki Tamatama,

²⁴ ‘Abebeelengenga ka Tamatama! Wathingalaku ku pathingalanesu nakwane amani ku pathagilane ki saniangane matisamaliane ka takaunganesu. Kai kawmasane kadrwa ku drumane ku Twaumase kulri dulru pia ku tapangimianesu!

²⁵ Tamatama! Kiatubiaku muswane palraingaili talubalre kadravane Yuredange, si mwa drele kavai mathariri ka kadaengane, matiasamaimali ka lalregelrege si lregelrege Lebanungu.’

²⁶ “Ai ngwalai numiane, ku Tamatama la papia nakwane kalisi, kai kilalra ku kitubili. La iya kai nakwane, ‘Makakelretenga, makakelretenga, madha matikainga kikai!

²⁷ Kusu lu mwa ki talikaiyane ki lregelrege Pisega, la twalai kavai masiasirare drele talrawane talriwgane lrawdru dradha pangithalringulu. Pudriadringaadha masiasirare, asi lwiyane kwini kaisu lri maka talubalre kadravane Yuredange.

²⁸ Kusu bulrwa ki Yesua, pakakecenge ki kidremedremeini, lani kagarange, asi lwiyane lrika amanini ku wasangiluku ki mapapangale, drikisi kwini sanaka tadrelanesu ka lakadaengane.’

²⁹ “Lakamani, yasaadrana nai ikai balrealreanane vaalru Bithepiure.”