Tapelane Drekase 29 - Ngudradreadrekadhane Ka Sisiu 魯凱語聖經

Ku Tamatama yakai Muabe kiketekete ki swa Iseraylri

¹ Ku Tamatama kaika kathane ku taikaiyane kavai Hurebe lregelrege ku takiketeketane ki swa Iseraylri, mialri ikai kavai Muabe kiketekete liniane. Kai lebenga yai amani ku tadrekasane ki Tamatama ki Musi si kiketekete liniane ka pacase.

² Ku Musi wasarubu ki swa Iseraylri makanaelre, la iya kai liniane, “Watakamacamacanga numi drele ku tapangimiane patuelre ki Tamatama ki talialalai ki swa Izipiti si latabebelenge ka sasiakawluini, si kunini palraelre.

³ Wadrele numi ki Tamatama ku tapulebeane kwidra matikiwcu ka laamatikurwane si tapianeini patuelre kwidra pinangu Twaumasane ka puku ka lamatiasamaimali.

⁴ Ai pakela kaikameane, kaiyana pathingale numiane luka manemane ku pacugane kwini takipadradresengane numi.

⁵ Ki nitara masupatelane ka caili, ku Tamatama waililuku numiane ngukakai calragulragu, ku lalaimai si lakece numi kai mapurici.

⁶ Kadrwa ku pange numi, kadrwa ku walracenge ku kai walracenge ku bava, ai ku Tamatama wabaai numiane ku lasarakaiyane numi patueelre, pakai ku lrika athingalane numi iniane ala ka Tamatama ka Twaumase numi.

⁷ Sa mwangata kikai yai, ku Sihunge ka talialalai ki swa Hesebunge si Uge ka talialalai ki swa Basane wakela kikaruburu mitane; la pamakita liniane,

⁸ si drikisingata malra ku kadaengane lini, kwini kadaengane twadrulruta baai ki Riwbingi, Gade ka taidrusa ka zuku si apararamau ki zuku ki Manase.

⁹ Lri tara paluludu numi patueelre kikai tatukakudhanane ki sakiketeketane, ku latakaungane numi patuelre lani kasulivalivate.

^10-11 “Kaikameane, kunumi ka latamatama ki lazuku, lamarudrange ki cekele latabebelenge ki kunkwane, si lasawvalalai labaibai latarudrawdrange lavavalake ki swa Iseraylri makanaelre, paelre kwini yakaikai numiane, tarabucubucuku ku angatu, taramwalrwalru numiane ka sakamaelanane ka umawmase,

¹² acegecega makanaelre ikai cucubungu ki Tamatama ka Twaumase numi; lri tarumara numi kwini kiketekete numiane.

¹³ Luka ngimiyaiya kikai, ku Tamatama lri singikai si pangimia kwidra tapukawnanengaini papia numiane si cucungulane numi ka Aberahame, Isake, Yakubu lri ikai kikai tarumara numiane akawkawlu ki Twaumase, lai lri ka Twaumase numiane.

¹⁴ Ku Tamatama kai lri kiketekete numiane sikakathane,

¹⁵ ku Tamatama ka Twaumaseta lri mialri kiketekete mitane ka acegecege icucubungu iniane kaikameane ka laumawmase si kaiyana kiatulalake ka lamwabaibalrithi mitane.

¹⁶ “Pwalringau numi ikai Izipiti lu tungitwatumane numi cekecekele, sa lribate numi ki kadaengane ki maelane ka kuni lu kangitwatumane ku tangimiane.

¹⁷ Wadrele numi liniane arakai ku angatu, lrenege, kingi, gingi darepe tusamiamiange ka matiavalracevace.

¹⁸ Kunumi ka acegecege ikai kai kaikameane ka laumawmase, adravane ka sawvalai ababai, wacekecekele, si zuku, madha cilricilri katwase ki Tamatama ka Twaumaseta adravane ka naaneanenga, la katwase sukubu ki twaumase ki maelane ka kuni; alaiyasi ikai ku miyaiya kai, mararaamau ki balace ki angatu ka wacebe si kapalili la ikai ku padavake ka angatu.

¹⁹ Kunumi ka acegecege ikai kai kaikameane ka umawmase, si kilalranga kikai matiausakene ka nikitubiane, kadrwa ku natangeanga kulri thuru iya kai, kwini lasu adravane ka makelrathe ngisasingikaai ku kidremedreme, lri kasulivaliivateana patuelre; alaiyasi ikai ku miyaiya kai, ku umawmase lri sacepe numiane, ku mathariri ku manganga ka umawmase lai lri karededele kamudu.

²⁰ Ku Tamatama kai lri maka pacepe lutuumane ku miyaiya kai ku umawmase; ku Tamatama lri papia iniane pakilringau kalisi. Kudra nipacasane ikai ki hulrice ka hungu ku lapusu lri mulebe mwa ki kinawmasaneini, pakeela ku apakitulrepeengane ki Tamatama amudu iniane.

²¹ Ku Tamatama lri malra iniane tusapelaelane pakipapawlringau ki lazuku ki swa Iseraylri, singikai ki hulrice ka hungu ku tapacasane ki sakiketeketane kudra makaelaela ku akipuswane, ku amatikurwane lai lri mulebe mwa ki kinawmasaneini.

²² “Ku lamwabaibalrithi numi si swa adaaili ka maelane ka lazuku lri drele lu pulebe ku Tamatama ku laamatikurwane, lacaemane ikai ki kadaengane numi.

²³ Lri aubulane ku laumawma, ki kadaengane lai lri suete ku balaru si timu, kaika adulrwanenga kaungu, adravane ka laubulu kai lri dulrunga cebe. Ku kadaengane numi lri mia kudra sa kalisi ku Tamatama si kabebetethe ki cekele ki swa Sudume, Gumura, Adema, Zebuime.

²⁴ Lukamaninga kwidra, kai umawmase kawmasane lri kivaga, ‘Ku Tamatama ani tungimiyaiya kai ki kadaengane? Ani ngithanga pia kikai kalisi?’

²⁵ Yakai ku umawmase ku lri tubalre iya kai, ‘Ku kawkawlu ki Tamatama amani sa baebalre cilringa kudra kiketekete si cegecege ki Tamatama ka Twaumase ki cucungulane lini; kikai yai sakiketeketane ki Tamatama liniane sa ililuku liniane katwase Izipiti.

²⁶ Kai lalasu wacilri ki Tamatama si katwase sukubu kawaungu pasikai ki drumane ka twaumase, matwase sukubu kwidra ki kaika sukubwana lini, ka pakaicilri ki Tamatama liniane sukubu ka latwaumase.

²⁷ Lakamani, ku kalisi liniane ki Tamatama, kikai nipacasane ki hungu kai lapusu la mulebe mwa ki kadaengane lini.

²⁸ Ngwalai ki lisiane, ku Tamatama patwalai ki kadaengane lini malra akucu liniane patala baalace, si cilri pikai ki maelane ka kuni. Kaikameane kwi lalasu yakaaiyana kwini.’

²⁹ “Yakai kwidra langimiyaiya kai, ku Tamatama ka Twaumaseta kai peaelaela mitane; ai peaelaela mitane ku hulriceini; kuta si lamwabaibalrithi mitane naika palralrawthuta paluludu.”