Tapelane Drekase 28 - Ngudradreadrekadhane Ka Sisiu 魯凱語聖經

Pasalaladha ki padradrekase la kisubulrubulru ikai ki sanaka awngane

¹ “Lwiyasi kunumi la kilalra numi ki Tamatama ka Twaumase numi, kapatengatengane pasusu kikai baaili pelaela numiane kikai padradrekase patuelre, lri pasapukwane numiane ka mararakace ki sanaka kuni.

² Kunumi kilalra ki Tamatama ka Twaumase numi lri tara tarumara numi kikai akaesadhane demedeme:

³ “Ku Tamatama lri subulrubulru ki cekele numi si laumawma numi.

⁴ “Ku Tamatama lri subulrubulru numiane, patapangale ku lagagane numi, ngukalra kitaleke ku lataleke, edhale ku lalwange lakiu.

⁵ “Ku Tamatama lri kisenai ki saragelagelane ki taleke si latakaiyane ki milrikinku.

⁶ “Ku Tamatama lri pakasulivalivate lu mulatadre lu itavanane numi, sanaka manemane kikisenasenai.

⁷ “Ku Tamatama lri kikaruburu kudra lri kela kikaruburu numiane ka badha. Lri kela ngukakai ki sivale ka kadalranane, ai lri kamanilringa ngukakai ki druanga katwase mubere thikurupu.

⁸ “Ku Tamatama ka Twaumase numi lri kisenai ki laawngane numi, pasuete ki taseketane ku lataleke. Lri ikai ki tasubulrubulrwane numiane ka kadaengane pulebe ku akaesadhane numi.

⁹ “Lwiyasi la kilalra numi ki Tamatama ka Twaumase numi, pasusu patuelre ku padradrekaseini, lri singikai kudra puvagangaini si lri akawkawlu numi iniane.

¹⁰ Ku kiacaebe ki belenge lri drele ku tapilriane numiane ki Tamatama amapapangale iniane si lri makitu mukuludrunga numiane.

¹¹ Ku Tamatama lri ikai kwini ki palraingini ki cucungulane numi baai ka kadaengane, si patakaalra ku lagagane numi, ngiradhekane ku lataleke, ku lwange si kiu edhaedhale.

¹² Lri muelebe ku swaeteane ku taseketane ki lribange subelebelenge, singikai ki kalamanemanane pawdale pakaalreke pwacilai ki angangade, pangiesaesai ku laawngane numi, pakaesai numiane putedratedra, lri dulru numi pakisalru ki drumane ka kuni ka badha, si kai malra ku lalake.

¹³ Kunumi tara pasusua kikai baaili pelaela numiane kaikameane, ku Tamatama ka Twaumase numi kikai padradrekaseini, ku Twaumase lri pakamani numiane kudra tamatama ki lakuni, kai kitusasiakawlu, la kawlai kasulivalivate mudringadringai, kai sulusuludru turamuramuru.

¹⁴ Ai kunumi lutumane madha baebaebalre ki padradrekaseini, si kai katwase sukubu marasikaikai ki drumane ka latwaumase.”

Cugane ki kaipasusu

¹⁵ “Lwiyasi kunumi la kai numi kilalra ki Tamatama ka Twaumase numi, kai pudriadringai pasusu kikai padradrekaseli numiane, kudra pelaela numiane sanaka padradrekase, kunumi lri kipadradresenge numi ku lamiyaiya kikai ku amatikurwane:

¹⁶ “Ku Tamatama lri pusu ki lacekele si laangangade numi.

¹⁷ “Ku Tamatama lri pusu ki saragelane numi si latakaiyane ki milrikinku.

¹⁸ “Ku Tamatama lri pusu numiane, patabekele numiane, ngilisi ku takitalekane, aru kakadrua ku lanilapulapwane.

¹⁹ “Ku Tamatama lri pakipadradresenge ku amatikurwane numi lu mulatadre lu itavanane numi, sanaka tatumanane kipusupusu.

²⁰ “Lwiyasi la kanganga numi, kidaili ki Tamatama, lri pakipadradresenge numiane ku amatikurwane, kalrithavulu, si kawpupungu; kai kasasulivalivate ku tatwatumanane, la padalru si kipakamudu.

²¹ Lri pakela ku swalrubu ku caemane ngiracuku, pakela ki amwane numi kwini ki kadaengane si kamudu.

²² Ku Tamatama lri arakai ku swalrubu, lapu, si dralrangedrangane lrumai numiane, si arakai ku cengelrau si dalacane ka valrigi amudu ki lataleke numi, pakela kudra takamudane numi.

²³ Kai lri pawdale belenge, kai kadaengane numi lri kameale, mia ki lriwlu ka adreme ku kawlukulane.

²⁴ Ku Tamatama lri arakai ku thuvugu ku enai ngitalikaiyane ki udale ki valrigi, pakela ku tamalrane amudu numiane.

²⁵ “Ku Tamatama lri arakai ki badha kikaruburu numiane. Lri twalai numi ki vaeva ka kadalranane kikaruburu ki badha, ai lri ngukakai numi ki druanga mawbebere. Lu drele ku laumawmase kai kawmasane ku takipadradresengane numi lri makitu manugiligili mukuludru.

²⁶ Ku laadhadhame ku lawaudriwdripi lri kela kane ki kinawmasane numi; kadrwa ku lri maka pakatwase liniane.

²⁷ Ku Tamatama lri pakapu ki kinawmasane numi, pangimia ku natapangimianeini ki swa Izipiti kapu. Lri pakakuvingi ki kinawmasane numi, la angeange si kalraceacenge, kai maka udringai.

²⁸ Ku Tamatama lri pakaupungu amama, kamukici, kanganganga.

²⁹ Ki vaiyane, lri mia numi ki mamukici ikai ki dradrimitane silasilape ku takirecengane. Ku takipuawnganane numi kai masulivalivate. Lri ka takitusinalrelremeane numi ki druma, kiribici, kadrwa ku lri maka palribulu numiane.

³⁰ “Lu tusiasilangane numi ki labaibai ku akarudrangane, la ka palrapaalranga ku taelre iniane apece. Lu tudaane numi, kai numi lri maka mudaane; lu tubabudwane numi, kai numi lri maka kane ku budu.

³¹ Lri patakamacamaca numi drele ki lwange numi kipapacai, la kai numi kamani ku wakane ku niculwane ku lwange. Lri drele numi ku ruba numi kiribiribici, lalri kai numi maka sawlri. Ku lakiu lalwange numi lri kibilibili, lakakadrua ku laumawmase ku paralubu numiane.

³² Lri drele numi ki lalake numi kimalra ki drumane ka umawmase ravase malra kituduri, laka taguriacane mukalavalava paimaima ku akelane lini mubalriu, ai kadrwa ku apangitumanane.

³³ Kudra kaika mathingathingale numi ka minzuku lri ribici kwini kwalri numi pawtaleke; kai numi lri maka kitaleke, si lri kidredrepetelringa numi, kitusinalreme.

³⁴ Lri pakilringau ku akikabebetethane numi si asinki.

³⁵ Ku Tamatama lri pakapu ki maca numi, twalai ki awlru pakela ki tali drapale cebe ku davake ka pu, kadrwa ku maka wasulrau pawdringai.

³⁶ “Ku Tamatama lri malra ki talialalai numi si kunumi ravase pwa drumane ki kuni, mwa kwini kaika mwana ki cucungulane numi ka kadaengane; lri ikai numi sukusukubu ki nidarepane ka angatu ka lrenege ka twaumase.

³⁷ Ikai kwini ki tapakiravasane numiane ki Tamatama ka kuni, kwini swakai kwini lri ngwalai kwini takipadradresengane numi si kasamali si mukuludru; kwini lalasu lalri malra tupwipuici tusinalrelreme numiane.

³⁸ “Ku sabulu numi ku sapaivai makalra, laka bekelane ku kitaleke numi, asi lwiyane ku apapawku lri kane kwini ki lataleke.

³⁹ Lu duuku lredreke numi, drangalru ki babudwane, ai kai numi lri kane ku budu, kai ungulu ku budu, asi lwiyane ku lubalubai lri kane ki angatu ka budu.

⁴⁰ Adravane cebe ku la ulrive ikai ki cekele numi, kai numi lri maka malra ku lawlau ka ulrive, asi lwiyane ku ulrive sakaiyana kalreme mwarurunga.

⁴¹ Lu tulalake numi, lri kawlrase numi liniane, asi lwiyane kwini lri kiravase.

⁴² Ku angatu numi si lataleke lri makitu kikane ki lubalubai demedeme.

⁴³ “Kudra yakaikai numiane ku maelane ka badha lri aru tapangale si lribate numiane; lalri aru turamuru numi.

⁴⁴ Lri pakisalru numiane ku paisu; lakai numi lri maka pakisalru liniane. Lukabilrilinga, lri kamani lini ka warathudu numiane.

⁴⁵ “Kikai lanipuswane lri makitu makakai numiane, pakela ku takamudane numi; asi lwiyane kai numi kialalra ki Tamatama ka Twaumase numi, kai paluludu kwini baaini numiane patuelre ku padradrekase.

⁴⁶ Kikai lanipuswane lri ka palralrawthu ka sapatuthingalane ka sarakaiyane ki Twaumase saibange numiane si lagagane numi.

⁴⁷ Ku Tamatama paiyanga kikai subulrubulru numiane, ai kai numi ka kiaragai kathaithariri mwa marasikai iniane.

⁴⁸ Lakamani, lri kisikawlu numi kwini lri kela kikaruburu numiane ka sikawlu ki Tamatama ka badha numi. Lri kasilrau numi, kakadhame, vilralrakane, kadrwa kanamanemanenga. Ku badha lri arakai ku pakilrialringau ku tapangimiane drepete numiane, pakela ku takamudane numi.

⁴⁹ Ku Tamatama lri arakai kudra ki singiadaili ka vaeva ka kuni kela kikaruburu numiane; kudra vaga lini kai numi wathingale. Kwini lalasu lri mia ki takanga, lri makakai lredepe iya kela kikaruburu numiane.

⁵⁰ Kwini lalasu ngialisiane turamuru, kai mwasakene ki tarudrawdrange, la kai kakalithi si tukurwane ki lalavavalake.

⁵¹ Kwini lalasu lri kane nguelre kwini lapulapu numi si nipawtalekane demedeme, adravane ka lataleke, kabavane, lawlau ka ulrive, lwange kiu kadrwa ku niputedrane. Kunumi lri kasilrau numi si pacai.

⁵² Kwini lalasu lri kikaruburu kwini patarumara numiane ki Tamatama ka Twaumase numi kwini kadaengane ki sanaka cekele; kwini satalutalu numi ka abelenge ku alradre ka cekele lalri kaburuku mulebe.

⁵³ “Ku badha lri lringulu ki cekele numi, lalri ngwalai numi ki takakadrwane ku taleke si kane numi ki beate ki lalake numi, ka amani kwini patarumara ki Tamatama ka Twaumase numi ka lalake numi.

^54-55 Lu kilringutu numi, adravane kwini mathalrai ka sawvalai lri mialri ngwalai ki silravane la kanenga ki lalakeini, asi lwiyane kadrwa ku akaneane. Kwini lasu adravane ka betakaneini ka sawvalai, ka kadalameini ka labaibaini, ka kathanenga ka lalakeini kai lri kirimu nau pakane iya liniane.

^56-57 Adravane ka lredelrede, ka ngiaesadhane, ka kaika taradadavace ka ababai kiarimu aruka ngilisilisiane ku kakudhane. Lu lringulu ku badha ki cekele, kwini alisu lri ngwalai ki kadrwa ku taleke lalri kivuthanga kibubuli kanekane kwini ki tulalakeini si takithabanganeini ka laimai malranga si kane. Adravane ka kadalameini ka tauwaneini ka kathanenga ka panianiake ka lalakeini, kwini alisu kai lri mubangalre vala si pakane liniane.

⁵⁸ “Lwiyasi la kaisu pudriadringai pasusu kikai nipacasane pikai ki senate kai padradrekase ki Twaumase, kai sukubu musakene ki Tamatama ka Twaumase numi ka palrealrebane ka naganeini,

⁵⁹ lri pakacaeme numiane si lagagane numi ku maelaelane ka caemane, kaika amaka ruthukane ka caemane ka swalrubu.

⁶⁰ Kwini kipucaemane lini sa ikai Izipiti ka matiukuludru ka caemane, lri mwa ki kinawmasane numi, kapalralrawthunga kai mudringainga.

⁶¹ Lri mialri pakacaeme kudra kaika nipacasane pikai ki senate ku lacaemane ku wasaela ka caemane, pakela ku takamudane numi.

⁶² Adravane drima ku umawmase numi ka paramia ki latariau ku pangalane, ai lri tabekele ku maka panianiake, asi lwiyane kai numi kialalra ki Tamatama ka Twaumase numi.

⁶³ Nakialibake turamuru numiane, kiragai paedhale numiane, ai kai lri taulranga amudu numiane, lai lri kamudu numi. Kunumi lri twalai numi kwini ki drikisi numi ka kadaengane patala balacenga kiaakucu.

⁶⁴ “Ku Tamatama lri malra numiane paacaicali mwa ki drumane ki lakuni, sarau mwa kai kawmasane. Lri ikai numi kwini sukusukubu ki angatu ka twaumase lrenege ka twaumase, kwini kaika sukubwana numi si cucungulane numi.

⁶⁵ Lu mwinunga numi kidruanga kai numi lri kasulivate, kai makatubalace. Ku Tamatama lri pakabithengelre, ngusasiadramane si kasusulri ku kidremedreme.

⁶⁶ Ku niake numi makucingalre kipalakebe. Kunumi lri taikaiyane ku kiucane numi ki vaiyane ki maungane, takipadradresengane ki sapapacai.

⁶⁷ Ku drele numi sanaka manemanenga lrika angitutulukane ki kidremedreme numi, luka mialrealre sidrama ki akadradrimitane, lukamaungu mukalava ki akaliarane.

⁶⁸ Adravane ku Tamatama kawrivanga kai numi lri siwlringa mu Izipiti iya, lri arakaiyana ku tasalriane ki laduri ku varukuru satedre pasiwlri numiane. Ikai kavai, nau ngikakilangai kai kinawmasaneli si aduri ki badha iyaiya, lrika kadrwa ku mwarikai ku lri langai numiane.”