Tapelane Drekase 27 - Ngudradreadrekadhane Ka Sisiu 魯凱語聖經

Piabelenge ki lrenege pacase ku hulrice ki Twaumase

¹ Ku Musi si laciwru ki swa Iseraylri wacunu ki mapapangale iya kai, “Kunumi tara pasuswa kikai baaili numiane kaikameane ka padradrekase patuelre.

² Kikwini ki vai lu talubalrenga numi kadravane Yuredange, si mudaane kwini ki apatarumarane numiane ki Tamatama ka Twaumase numi ka kadaengane, cegecega ku piya ku maadrau ka lrenege, la dumingi ku abu,

³ malra patuelre ku hulrice si sabulrwane makitu pacase pikai belenge. Lu mudaanenga numi kudra palrainginga ki Tamatama ka Twaumase ki cucungulane numi ka mwalwalwaludru ku mireke si valu ka karawmane ka kadaengane,

⁴ lu pudrapalenga numi ki tali sapakalriwgu kadravane Yuredange, tara pasuswa kikai baaili numiane kaikameane kikai drekase ikai lregelrege Ibale cegecege kikai la tadradrau ka lrenege, la dumingi ku abu pikai belenge,

⁵ lri arakai numi ku kaika niarakaiyane ku adreme tulrenege.

⁶ Ikaiya kwini darepe ku tapatarumaramarane, asi lwiyane sanaka nipasikaiyane ki Tamatama ka Twaumase numi darepe sanaka tapatarumaramarane, tara arakaiya kudra kaika nitulrenegane ka lrenege. Lri ikai numi ki tapatarumaramarane patarumara ku Lama ka lrisi.

⁷ La mialriya ikai kwini kane ku Sulivatane ka lrisi, ikai cucubungu ki Tamatama ka Twaumase numi kirararagai.

⁸ Kunumi pikaiya belenge ki nidumingane ara abu ka maadrau ka lrenege pathingalane pacase ku hulrice ki Twaumase.”

⁹ La pacungulu ku Musi si barakalai ki swa Lrivi ka zuku kawriva ki swa Iseraylri makanaelre iya kai, “Swa Iseraylri, isaselebana, si kicacaligiri kai vagali. Kaikameane akawkawlunga numi ki Tamatama ka Twaumase numi.

¹⁰ Lakamani kwidra, kunumi tara kilalra iniane, pudriadringai pasusu kaikameane kai pelaelali numiane patuelre kai hulrice si padradrekase.”

Ku wathaele ki drekase lri kipusu

¹¹ Kikwini ki vaivai, ku Musi la kawriivanga ki swa Iseraylri iya kai,

¹² “Lu talubalrenga numi kadravane Yuredange, lu subulrubulru ki mapapangale ku barakalai ki swa Lrivi, ku Simiune, Lrivi, Yuda, Isakare, Yusepe si Biniyamingi ka lazuku lri acegecege ikai lregelrege Girizime.

¹³ Lu pelaelaela ku sapuswane, ku Riwbingi, Gade, Asere, Zibulungu, Dange si Napetali ka lazuku lri acegecege ikai lregelrege Ibale.

¹⁴ Ku barakalai ki zuku ki Lrivi lri akwadrau papia ki mapapangale ki swa Iseraylri pelaela:

¹⁵ “ ‘Sanaka niarakaiyane ku lrenege, angatu ku laadreme darepe tusamiamiange, kibubuli sukubu, lri tara kipusu ki Twaumase, asi lwiyane mavalracevace ku Tamatama ki wasukubu ki samiamiange.’ “Ku mapapangale lri tubalre, ‘Amingi!’

¹⁶ “ ‘Ku kai mwasakene ki marudrawdrange, lri kipusu ki Twaumase.’ “Ku mapapangale lri tubalre, ‘Amingi!’

¹⁷ “ ‘Ku patalwaela ku edrange ki kadaengane ki pagisane, lri kipusu ki Twaumase.’ “Ku mapapangale lri tubalre, ‘Amingi!’

¹⁸ “ ‘Ku waranau sangiluku ki mamukici pamama ki kadalranane, lri kipusu ki Twaumase.’ “Ku mapapangale lri tubalre, ‘Amingi!’

¹⁹ “ ‘Ku waribici ku kindri ki singibadhane, pakulrulrulu, walibakane, lri kipusu ki Twaumase.’ “Ku mapapangale lri tubalre, ‘Amingi!’

²⁰ “ ‘Ku tadrusa apece si pasalriu ki kelane ki tamaini si tusinalreme ki tamaini, lri kipusu ki Twaumase.’ “Ku mapapangale lri tubalre, ‘Amingi!’

²¹ “ ‘Ku mamamwa ki waudriwdripi, lri kipusu ki Twaumase.’ “Ku mapapangale lri tubalre, ‘Amingi!’

²² “ ‘Ku tadrusa apece si pasalriu ki betakaneini ka ababai, si kelane ka lalake ki tamaini ka ababai si kelane ka lalake ki tinaini ka ababai, lri kipusu ki Twaumase.’ “Ku mapapangale lri tubalre, ‘Amingi!’

²³ “ ‘Ku tadrusa apece si pasalriu ki tina ki labaibaini, lri kipusu ki Twaumase.’ “Ku mapapangale lri tubalre, ‘Amingi!’

²⁴ “ ‘Ku kiabubuli si papacai ki umawmase, lri kipusu ki Twaumase.’ “Ku mapapangale lri tubalre, ‘Amingi!’

²⁵ “ ‘Ku wamalra ku pavangalre si mwa papacai ki kadrwa ku pasalrivane, lri kipusu ki Twaumase.’ “Ku mapapangale lri tubalre, ‘Amingi!’

²⁶ “ ‘Ku kai paluludu ku hulrice si sabulrwane ki Twaumase, lri kipusu ki Twaumase.’ “Ku mapapangale lri tubalre, ‘Amingi!’ ”