Tapelane Drekase 26 - Ngudradreadrekadhane Ka Sisiu 魯凱語聖經

Patarwamara ku taleke

¹ “Lu malranga numi kwini apatarumarane numiane ki Tamatama ka Twaumase numi ka kadaengane, si sutelrainga ikai kwini yai,

² malra kwini aswalaalanga kabea ka nikitalekane ku lataleke pikai ki karadrare, la iluku mwa kwini ki pilri ki Tamatama ka Twaumase numi ka tasukusukubane.

³ Lri mwa numi kidrele kwini ki wadrangalrungalru ka barakalai, la iya kai iniane, ‘Kaiasasane wakelaku kiaseasene ki Tamatama ka Twaumaseli, mwadaanenga naku ki pukawnunga ki cucungulane nai ka kadaengane.’

⁴ “Ku barakalai lri malra kwini iluku numi ku karadrare, la lri picucubungu ki tapatarumaramarane ki Tamatama ka Twaumase numi.

⁵ La lri pacungulu numi icucubungu ki Tamatama ka Twaumase silrigu kikai vaga, ‘Ku cucungulaneli acaicali ka swa Arame; wasangililuku ki lawacekecekeleini kela Izipiti si salikaikai kwini. Kwini lalasu sakatwatwase tabeekeleana, sakabilrilinga la arudrima edhalenga, kamaninga kudra sapukwane ka minzuku.

⁶ Ku swa Izipiti wadredrepete naiane, vutha naiane tuduri, pakwalri naiane ku akisikawlane.

⁷ La kitubi nai ki Tamatama ka Twaumase ki cucungulane nai, wadrele ku takiangeangane nai, sakwalrialri, takikabebetethane nai, la kilalra ku takitubiane nai.

⁸ La arakai ku madrau ku pukuini palribulu naiane kalrabuthu kidaili ki swa Izipiti, la pia ku pinangu Twaumasane ka puku ka matisamaimali, la kela ku palrealrebane ku tangimiane.

⁹ Ku Twaumase wasangiluku naiane kela kikai, la malra kikai mwalwalwaludru ku mireke si valu ka malrange ka kadaengane patarumara naiane.

¹⁰ Lakamani kwidra, Tamatama, kikaiasasane wamalraku kikai aswalaalanga ka nikitalekane iluku patarumara muswane.’ “Lu maka silrigunga numi, malra kwini karadrare pikai cucubungu ki Tamatama ka Twaumase numi, si ikai kwini sukubu iniane.

¹¹ Kunumi ngwaladha ki Tamatama ka Twaumase numi ku tapatarumarane numiane tuesai kitaleke si kiraragai, la mialri dawla kwini ki swa Lrivi ka umawmase si sakamaelanane ka umawmase ka yakaikai numiane si taelre kiraragai.

¹² “Kunumi ki nitara tulrutulrwane ki caili baadha ku ziwbunuici ka amani kudra kitaleke numi ku ziwbunuici—malra baai vala ki swa Lrivi ka umawmase, sakamaelanane ka yakaikai kwini, pakulrulrulu, si walibakane, kwini lalasu ani ikai kwini numiane mialri ikai ku akaneane. Lu ngilribatenga kikai,

¹³ kunumi la lri kawriva numi ki Tamatama, ‘Kainaku wamalra kwini tinusaniangane ka ziwbunuici suru pikai ki daaneli, pangiamiaku paluludu ku padradrekasesu, si malra vala ki swa Lrivi, sakamaelanane ka umawmase ka yakaikai kai, pakulrulrulu, si walibakane, kainaku pasalriu kainaku marimuru ku tinukakudhanane ki ziwbunuici.

¹⁴ Sa kalremelremeaku kainaku wakane ku nitumabulane ku lamanemane; ikai ki kaika nitumabulane ka lrisi, la kainaku malra pulatadre, la kainaku malra tusatulrisiane ki wapacai ka umawmase. Tamatama ka Twaumaseli, kialalraku muswane, pasusu kudra tinukakudhanane ki ziwbunuici patuelre.

¹⁵ Kiatubiaku muswane twalai belenge ki Alrivilrivi ka taikaikaiyanesu si drele sirapale naiane, si subulrubulru ki saniange ka kawkawlusu ka swa Iseraylri. Kiatubiaku singikai kudra kiketeketesu ki lacucungulane nai, pulebe ku akaesadhane baai ki patarumarasu kikai mwalwalwaludru ku mireke si valu ka mathariri ka kadaengane.’ ”

Kawkawlu ki Tamatama

¹⁶ “Kaikameane, ku Tamatama ka Twaumase numi wadrekase numiane ku apaluludane numi ku hulrice si padradrekase patuelre; lakamani kwidra, lri salika vaeva numi ku kidremedreme singibila palululudu.

¹⁷ Kaikameane, pathingalane numi ala ka twa Tamatama ki Twaumase numi, la mialri palraingi numi kilalra iniane, paluludu sanaka hulriceini, si pangimia nguelre ku padradrekaseini.

¹⁸ Kaikameane, ku Tamatama la mialri singikai ku pukawnungaini pathingale ala ka kawkawlu numi iniane, wadrekase numiane ku apasuswane numi ku padradrekaseini patuelre.

¹⁹ Ku Twaumase lrika pangiraeradhekane numiane kudra ki bekaceini sanaka kuni; kunumi lai lri pakidrengedrengere numi pakiusakene ku saniange ka naganeini. Kunumi lri singikai numi ku pukawnungaini kamaninga kudra saniange ka kawkawluini.”