Tapelane Drekase 25 - Ngudradreadrekadhane Ka Sisiu 魯凱語聖經

¹ “Lwiyasi ku tadrusa ku swa Iseraylri la mwa ki takisaibaibangane turathudane ku nikarivwane, la kai tupasalrivane ku tangea, ku tangea la kitupasalrivane,

² kwini yakai ku pasalrivane ku akilrumadhane kipathavungu, ku tarasaibaibange lri drekase iniane guruthungane ikai daedae kipathavungu. Ku asangupialane sititi lri singikai ku pasalrivane ku matelrege ku maliapai,

³ lu kingikaalrale lri aru masupatele, kailri maka palribate, alaiyasi la palribate amaninga ku pakiarubwane ki sakacekele icucubungu ki mapapangale.

⁴ “Lu dralrailraisi ki taleke ku lwange, madha tametamenge ki ngudwini.”

Ngwakai ki pasikai ki wapacai ka betakaneini tulalake

⁵ “Lwiyasi la taelrelre ku lamataka ka sawvalai, ku tangea la aswala pacai, la kai tulalake, kwini walibakane ka alisu kailri maka mwa karudrange ki drumane ka zuku. Kwini betakane ki wapacai lri pangimia kudra atarapianeini mwa iniane karudrange,

⁶ kwini takataakanga ku lalake lini lrika lalake ki wapacainga ka betakaneini, pasikai iniane ikai ki swa Iseraylri cegecege ku tinueapaneini.

⁷ Lwiyasi la kai mubangalre ku wamwa iniane, kwini alisu lri mwa ki lrawlrawdru ki cekele kikawriva ki ciwru, pelaela liniane, ‘Ku betakane ki nataelrelreli kai mwabangalre pangimia ku atarapianeini ki betakaneini pasikai iniane pikai ku tinueapane ikai ki swa Iseraylri.’

⁸ Ku laciwru lri tara dawlu kwini ki lasu, si kidrekase iniane. Lwiyasi kwini lasu laka thadaalrane kakecenge kai mwa kwini ki alisu karudrange,

⁹ kwini alisu lri katwase mucucubungu ki laciwru, mwalra ku thili kwini kece ki lasu, si sungalrai ki lringauini, la pelaela iya kai, ‘Ku kai mwabangalre pasikai ki betakaneini cegecege ku tinueapane lri tara tarumara kipangimia kikai kitusinalreme.’

¹⁰ Ikai ki swa Iseraylri, ku daaneini lrisi tai ‘Kiamukece ka daane.’ ”

Ku drumane ka kakudhane

¹¹ “Lwiyasi la malralrumai ku tadrusa, ku tangea ku labaibaini la paralubu ki taelrelreini, la malra galramece ki sawvalaini,

¹² lri malra retege kwini alrima ki alisu, kailri maka pacepe ku pasalrivaneini.

¹³ “Madha arakaikai ku makakaela ku madrau ku tikiane ku satintingane,

¹⁴ madha arakaikai ku madrau ku tikiane ka taidrusane ku saragelane.

¹⁵ Tara pasingikidremedrema, arakai ku pacengecenge ku tintingi si saragelane, lanu maka ikai kwini ki apatarumarane numiane ki Tamatama ka Twaumase numi ka kadaengane kalragi ku niake numi.

¹⁶ Ku Tamatama ka Twaumase numi mavalracevace ki watavuvulrucu ka umawmase.”

Ngwakai ki wadrekase amudu ki swa Amaleke

¹⁷ “Tara pulringava, sa katwatwase numi Izipiti, ikai kadadalranane, luka pangiatumane ku swa Amaleke marasikai numiane.

¹⁸ Kwini lalasu kai mwakuludru ki Twaumase, sakidulrunga numi si kakadrwanga ku puku, singialrilrikudru kikaruburu numiane, la malra papacai demedeme kwini ki abilrili.

¹⁹ Lakamani kikai, ku Tamatama ka Twaumase numi wabaai numiane ku kadaengane, la kai numi kivangavangenga ki badha, lri tara amudu numi ki swa Amaleke patuelre, ku laumawmase lai lri kai ngulringaunga liniane. Kikai tangimiane kunumi madha karimurimuru!”