Tapelane Drekase 24 - Ngudradreadrekadhane Ka Sisiu 魯凱語聖經

Kakudhane ki makakatwase si patiaela

¹ “Alaiyasi la ikai ku marudrangenga la drele kwini ki alisu la ikai ku matialrumale ku kakudhaneini si lakai kadalame iniane, la pacase ku sapisadrane iniane, si pakatwase iniane,

² alaiyasi kikai alisu sakatwasenga la mwanga ki drumane karudrange,

³ kikai ku sakadrusa ka tauwaneini la mialri kalrasenga iniane, si pacase ku apisadrane iniane, la pakatwase iniane, ku wapacai kikai tauwaneini ka sawvalai,

⁴ adravane ikai ki ngitwatumane, ku natauwaneini ki alisu kailri maka tupelanga mwa iniane karudrange, Asi lwiyane papia ki natauwaneini ka sawvalai, kwini alisu kiapakakudrulrunga. Lwiyasi kwini natauwaneini lu peela mwa iniane karudrange, pasalriunga ki Tamatama. Kunumi maadha ikaikai kwini ki abadhane numiane ki Tamatama ka Twaumase numi ka kadaengane pasalriu ku kavalracevaceini ku pasalrivane.”

Drumane ka lakakudhane

⁵ “Madha vuthavutha ki tawkarudrarudrange pamukwapingi, la madha pakipuawawngane ikai kunkwanane, patara caila patelrai ki lasu, lani ikai tavanane, pakiragai ki taelrelreini ka ababai.

⁶ “Madha malramalra ku lrenege ka tapasilribulribuane ki akiame si arakai tusadrepetane, asi lwiyane taingeane ka waribicinga ku sangilalapwaneini.

⁷ “Ku aneane ku waravase ki sakacekeleini ka swa Iseraylri, la vutha iniane paaduri, ku kialangai iniane tuduri, kwini lri kipapacai. Patwaladha numiane mwalrathe kikai ngialisiane.

⁸ “Alaiyasi kakuvingi numi lalri saela, tara singikaiya ku tapelaelane ki Lrivi ka barakalai pangimia; lri pasusu numi kudra pelaelali liniane, si pudriadriingai pasusu.

⁹ Tara pulringava, sakatwasenga numi ka Izipiti, ku Tamatama ka Twaumase numi sa ikai kadadalranane luka pangiatumane ki Miriame.

¹⁰ “Adravane pakisalru numi ki naneanenga ka umawmase, madha mudadaane ki daaneini si malra kudra abadhane numiane tusadrepetane ka laimai,

¹¹ ikaiya latadre mukalava, lani ngikakamaani malra kwini sadrepetane pulatadre si baai numiane.

¹² Lwiyasi laka matiakuru kwini lasu, madha pukaiyaiyane kwini sadrepetane,

¹³ sakaiyana lriwgu ku vai ki vaivai sawlria baai iniane, ani arakai sicawbu. Lungimia kikai, kwini lasu lri kiaseasene turamuru numiane, ku Tamatama ka Twaumase numi lai lri mialri kadalame numiane.

¹⁴ “Ku kwalrialri matiakukuru ku mwalrawlrawlrau, adravane ka swa Iseraylri, ka yakaikai numiane ka singibadhane, kunumi madha pamatikuru iniane.

¹⁵ Lu kaiyana lriwgu ku vai baadhanga ku mulrawlrawini ku paisu, asi lwiyane kwini lasu mwarikai ku paisu, kwini lasu satalu ki tamulrawlravaneini cekecekele. Lwiyasi lakai numi baai iniane, kwini lasu la kukusu ki Tamatama, lri ikainga ku pasalrivane numi.

¹⁶ “Ku marudrawdrange kailri ngwalai ki tapasalrivane ki lalake si kipapacai, ku lalalake lai mialri kailri ngwalai ki tapasalrivane ki marudrawdrange si kipapacai. Ku tangeea lri ngisasiamece lu pasalriu.

¹⁷ “Madha ribiribici ku kindri ki singibadhane si pakulrulrulu, mialri madha malramalra ku laimai ki walibakane tusadrepetane ki kiame.

¹⁸ Tara pulringava, naaduringa numi ikai Izipiti. Ku Tamatama ka Twaumase numi la pangilralrainginga numiane, lakamani kwidra lri drekasaku numiane pasuswa kikai padradrekase.

¹⁹ “Lu kitaleke numi lakarimuru numi iluku mutavanane, madha siwlriwlringa mwa malra, suranga pikai angangade, amalrane ki singibadhane, ki pakulrulrulu si walibakane. Lu mia kikai, ku Tamatama ka Twaumase numi lri subulrubulru numiane sanaka tatumanane numi.

²⁰ Lu kiulrive numi, sana ngusivale numi, madha nguselaelanga malra ku tedrane, ku tedrane suranga baai ki singibadhane, pakulrulrulu, si walibakane.

²¹ Lu kibudu numi, sana labutu numi sanguvale, madha nguselaelanga mwa malra ku tedrane, ku tedrane suranga baai ki singibadhane, pakulrulrulu, si walibakane.

²² Tara pulringaava, naaduringa numi ikai Izipiti, lakamani lri drekasaku numiane pasuswa kikai padradrekase.”