Tapelane Drekase 23 - Ngudradreadrekadhane Ka Sisiu 魯凱語聖經

Kakudhane ki kailri maka mudaane ki daane ki Tamatama

¹ “Ku madula ku iniane si kiatu nimwalrane ka umawmase kai lri maka kipaelre ki tairuburubwane ki Tamatama.

² “Kudra nikibubuliane tulalake ka lalake kai lri maka kipaelre ki tairuburubwane ki Tamatama, ku lagaganeini, adravane pakela ki mwasaka mangeale ka zidai ka agagane, mialri kai lri maka kipaelre ki tairuburubwane ki Tamatama.

³ “Ku swa Amune si swa Muabe kai lri maka kipaelre ki tairuburubwane ki Tamatama. Ku lagagane lini, adravane kelanga ki mwasaka mangeale ki zidai ka lagagane, mialri kai maka kipaelre ki tairuburubwane ki Tamatama.

⁴ Asi lwiyane sakatwatwase numi Izipiti, kwini lalasu kai wabaai ku aungulane numi ku akaneane numi sa ikadadalranane numi, si la twalai Mesuputamia ka Pithure ka cekele dawlu ki lalake ki Biure ka Balame kela pusu numiane.

⁵ Ai ku Tamatama ka Twaumase numi kai kialalra ki Balame, ngiabalrelringa asasubulrubulrwane kwini sapuswane, asi lwiyane mathalrai numiane ku Tamatama.

⁶ Ku tapanianianiakane numi madha pusakaikai liniane, ku akasulivatane si angiradhekanane liniane.

⁷ “Kunumi madha sidrekadrekase ki swa Idume. Asi lwiyane kwini lalasu retesane numi. Kunumi madha sidrekadrekase ki swa Izipiti, asi lwiyane nayakaikai numi ki kadaengane lini.

⁸ Kikai laumawmase kudra sakatulru ki zidai ku mwabaibalrithi lini lri dulrunga maka kipaelre ki tairuburubwane ki Tamatama.”

Kakudhane ki pakabula ki takwapingane

⁹ “Lu ikai numi ki takikaruburane tutakwapingane, tara kidadaila kudra lri pakakudrulru numiane ikai ki lalrisi.

¹⁰ Lwiyasi la ikai ku umawmase ku wasipi si pakatwase ku ubuluini lakai kabula, kwini lasu lri katwase ki takwapingane, si asurwana ikai latadre ki takwapingane.

¹¹ Luka miauawbu, kwini lasu lri tara sikeelre, lu lriwgunga ku vai ala lri dulru siwlri mwa ki takwapingane.

¹² “Kunumi drela latadre ki takwapingane si kelrete ku tamwamwane muthili.

¹³ Ikai kwini ki lalawbubulu numi pikaiya ku sukupu, lu mulricungu numi la lruku, si dralreke.

¹⁴ Ku takwapingane numi tara pangimia kudra kakudhane ki mabula, asi lwiyane ku Tamatama ka Twaumase numi watapalra numiane ikai ki takwapingane, si palakebe numiane, la paakaci numiane ki badha. Kunumi madha piapia ku kaika mabula ka kakudhane, amani lu cilri numiane ku Tamatama.”

Drumane ka kakudhane

¹⁵ “Lwiyasi la ikai ku duri ku mwabere ki tawkini, la kitubi numiane ku apalakebane iniane, kunumi madha malramalra iniane satedre sawlri pwa ki tawkini.

¹⁶ Kwini lasu lri dulru ngipapilri ku kadalameini ikai, kunumi madha lrumalrumai tudrekase iniane.

¹⁷ “Ku la sawvalai labaibai ki swa Iseraylri kailri maka ikai ki biu apairairange ka sawvalai si ababai.

¹⁸ Kudra nikipaiswane patwalai ki pairairange madha malramalra iluku mwa ki daane ki Tamatama ka Twaumase numi si sawlri ku ngiabulru numi. Asi lwiyane ku Tamatama ka Twaumase numi mavalracevace ki apairairange ka sawvalai si ababai ikai ki biu.

¹⁹ “Lu pakisaalru numi ku paisu, ku taleke, si drumane ku lamanemane ki sakacekele ka swa Iseraylri, madha patulalalake.

²⁰ Ku pakiasalru ki maelane ka zuku kailri katumane patulalake, ku pakiasalru ki sakacekeleini ka swa Iseraylri kailri patulalake. Kunumi lu pasusu numi kikai kakudhane, ku Tamatama ka Twaumase numi lri ikai kwini ki amalrane numi ka kadaengane katasubulrubulruane numiane.

²¹ “Ku papia numi ki Tamatama ka Twaumase numi ngiabulru, madha pwadaidailane ku apangimiane. Ku Tamatama lri saladha kwini ngiabulru numi, ku kai pangiamia ku ngiabulruini yai pasalrivane.

²² Ku kai papia ki Tamatama ngiabulru kaika pasalrivane.

²³ Ai kudra ngikakamanini ngiabulru lri tara pangimia kwini ngiabulruini.

²⁴ “Lu lribate numi ki babudwane ki palrapalra, adulrwane ngisasingikai kane kwi yababudwane kwi budu, ai madha surageragele pwa ki karadrare si iluku.

²⁵ Lu lribate numi ku mamugimugiane ki palrapalra, kailri katumane alra theredre kwini mugi si kane, ai madha arakaikai ku rigai ketabe si malra.”