Tapelane Drekase 22 - Ngudradreadrekadhane Ka Sisiu 魯凱語聖經

¹ “Lwiyasi la drele numi ku lwange si kiu ki sakacekele numi ka swa Iseraylri la amama ki kadalranane, madha katwatwase kidaidaili, malra bilibili pasiwlri, si baai ki piwaudriwdripane.

² Lwiyasi kwini piwaudriwdripane la adaili numiane, luka kai numi wathingale luka aneanane, malra bilibili pasiwlri, la mukalava kwini ki piwaudriwdripane lu kela silape si baai iniane.

³ Lwiyasi la drele numi ki swa Iseraylri la sakawlrau ku ruba, ku pawcilri ku laimai ku lamaneemanenga, tuthadalraana ku tapangimiane.

⁴ “Lwiyasi la drele numi ku ruba ku lwange ki sakacekele numi ka swa Iseraylri la mwadreke ikai kadadalranane, madha katwatwase kidaili, paraluba iniane malra kwini nilapulapwane drakale.

⁵ “Ku labaibai madha silaimaimai ku sawvaladhane, ku sawvalai mialri madha silaimaimai ku ababadhane, asi lwiyane ku Tamatama ka Twaumase numi malrase ku paiya kai ku tangiragelanane ku umawmase.

⁶ “Lwiyasi la kirimu numi drele ku yabelenge ki angatu ku yadaedae ku lisisuku ki adhadhame, la ikai ku tina ilisisukane kubukubu, ku taelre ki kiakiau, madha malramalra kwini ki tina.

⁷ Kunumi lri dulru numi malra iluku ki kiakiau, ai pakatwasa ki tina. Lumia kikai, lri kasasuliivate ku tatwatumanane numi, si kisupilri ku akalragiane ku caili.

⁸ “Lu tudaanane ku bavane, pikaiya ki cavalri pangithalringulu ravadre. Lumia kikai, lu ikai ku umawmase ku twaverevere si pacai, kai numi lri siamece ku kiame ki erai.

⁹ “Madha ikaikai babudwane lredreke ku maelane ku lataleke, lu kai numi pia kwini, kai numi lri kane kudra nilredrekane ku budu si drumane ku taleke.

¹⁰ “Madha patadrusadrusa arakai ki lwange si ruba pavilringi.

¹¹ “Madha silaimaimai ku niapaelreane tinunu ku ubale ki kiu si malubibiri ka lalasare ka kaimadhane.

¹² “Ku supate ku piu ka malrailragi ka laimai pwa ku dameamesai.”

Kakudhane ki ngwakai ki bulane ki ababai

¹³ “Lu ikai ku umawmase ku marudrangenga, sakabilrilinga la kirimu kai kadalamenga ki labaibaini,

¹⁴ si kawriva pakiarubwane iniane, ku kaika takatawvaileketanengaini sa tau tadrusa apece.

¹⁵ Lwiyasi ikai ku miyaiya kai ku rivwane, ku marudrawdrange ki alisu lri mwa ki lrawlrawdru ki cekele kikawriva ki laciwru, si padrele ku sasiwmiane, pathingale kwini lalake lini ala ka tawvailekete.

¹⁶ Ku tama ki ababai lri kawriva ki laciwru, ‘Pakarudrangaku kai ki lalakeli pamwa kai ki umawmase, kai lasu lakai kadalamenga iniane,

¹⁷ la capange kawriva kaika tawvaileketenga sakarudrarudrange iya iniane. Kunumi drela kikai sasapane ka makalrilau saka takarudrangane ki maungu.’

¹⁸ Ku laciwru kwini ki cekele lri tara pathavungu si lrumai kai ki sawvalai,

¹⁹ si pathavungu iniane ku idai ku gingi ka paisu, si baai ki tama ki ababai, asi lwiyane kwini lasu twasinalremenga ki tawvailekete ki swa Iseraylri. Twalainga kikai, kikai ababai thadaalraneana ka labaibaini, kwini lasu lri makalautu kai cilri iniane.

²⁰ “Lwiyasi kikai umawmase kwini takukusuaneini laka patengane, lakakadrwa ku manemane ku sasiwmiane ka tawvaileketeana kwini alisu,

²¹ ku ciwru ki cekele lri tara iluku ki alisu mwa ki lrawlrawdru ki tamaini, lalri kamani ku sawvalai ki cekele ka arakai ku lrenege papacai iniane, asi lwiyane kai alisu paiyanga ku matiakiarubwane ku kakudhane ikai ki swa Iseraylri, sakaiyana kithareve tadrusanga ki palrapalra. Lumia kikai, kunumi lri malra numi mwalra patwalai numiane kikai miyaiya kaika ngialisiane.

²² “Lwiyasi la ikai ku umawmase ku padralra ki labaibai ki palrapalra, la kipwalra, kwini tadrusa lri tara kipapacai, lumia kikai, mwalranga numi ku miyaiya kai ku ngialisiane ikai ki swa Iseraylri.

²³ “Lwiyasi ikai ku yacekele la pasalriu ki tusiasilanganenga ki palrapalra,

²⁴ kunumi tara iluka kwini ki tadrusa pulatadre ki cekele, la arakai ku lrenege papacai. Kwini ababai lri tara paacai, asi lwiyane kwini alisu adravane ikai cekele, kai wakawkau kimapabebere, kwini sawvalai lri tara paacai, asi lwiyane kwini lasu paswadringainga ki siasilangane ki palrapalra. Lumiakikai, kunumi mwalranga numi ku ngialisiane ikai numiane.

²⁵ “Lwiyasi la ikai ku yaubulane ulucu ki siasilangane ki palrapalra, kathane kwini sawvalai ka lri kipapacai.

²⁶ Kunumi madha pakaduladula kwini ki ababai, kwini alisu kadrwa ku naika akipapacadhane ku pasalrivane. Kikai miyaiya kai mararaamau kudra kiapapacai ikai ubulane.

²⁷ Kikai sawvalai yakai ubulane ulucu iniane, kwini alisu adravane kawkau kadrwa ku umawmase ku lri kela palribulu iniane.

²⁸ “Lwiyasi la ikai ku umawmase ku waulucu ki kaiyana kiatusiasilangane ka tawvailekete, la kipwalra,

²⁹ Kwini lasu lri tara baai ki tama ki alisu ku malrimale ku gingi ka paisu tusabaadhane, la mwa karudrange kwini ki alisu, makalautu kailri cilri iniane, asi lwiyane kwini lasu waulucu iniane.

³⁰ “Ku umawmase kailri maka tadrusa apece ki patiela ki tamaini, si tusinalreme ki tamaini.”