Tapelane Drekase 21 - Ngudradreadrekadhane Ka Sisiu 魯凱語聖經

Ngwakai ki kaika nituringaringavaneana ki kiabubuli papacai

¹ “Lwiyasi la ikai numi kwini ki abaadhane numiane ki Tamatama ka Twaumase numi ka kadaengane, la drele numi ikai ku umawmase ku kiapapacai, ku kinawmasane kicilri pikai ubulane, la kai thingale luka aneane ku papacai,

² ku ciwru si tarasaibaibange numiane lri kirarimu mwa kwini ki takicilriane, apalekelekete twalai kwini pakela ki ngiathalringulu ka lacekele ku takuluthainwane,

³ si drela kudra sakaikaainga kwini ki takipikaiyane. Ala kwini sakaikaainga kwini ki cekele ka ciwru lri pilri ku vaeva ku kaika nipakaunganeana ku tikiane ka tina ka lwange,

⁴ la malra iluku mwa kwini ki babiabila ki kai madrekadrekare ka drakerale, ikai kwini ki kaiyana ka nikaungane ka kadaengane ngetepe kwini lreini.

⁵ Ku barakalai ki Lrivi lalri tupalra, asi lwiyane kwini lalasu lri turingaringau kwini ki ngwakai ki tapapacadhane patuelre ku tapiane. Ku Tamatama ka Twaumase numi wadawlunga liniane kela kalri marasikai iniane, si pangukai ki naganeini subulrubulru.

⁶ Kwini sakaikaainga ki takipikaiyane ka ciwru lri ikai kwini ki awlru ki tikiane ka tina ka lwange taulrima,

⁷ ala inulri, ‘Kai nai papacai kai ki umawmase, lakai nai thingale luka aneane ku papacai iniane.

⁸ Tamatama, kiatubiaku muswane pacepa kai ki palribulusu patwalai Izipiti ka kawkawlu ka swa Iseraylri. Kiatubiaku pacepa naiane, madha pasiameamece naiane kai erai ki nivuthane papacai.’

⁹ Lu pangimia numi kikai ani pia kwini iya ki Tamatama, kai numi lri siamece kikai kiame kai ki kiapapacai.”

Ngwakai ki marudrange mwa ki kiaravase ka labaibai

¹⁰ “Ku Tamatama ka Twaumase numi paakaci numiane, si ravase ki kiaravase itakikaruburane;

¹¹ alau lri drelesu ku mathaariri ku kiaravase ka labaibai, si kadalame iniane, la api sitaelrelre iniane.

¹² Lri maka dulrusu iluku iniane mutavanane. Kwini alisu lri kiriti kwi isiuini, la mukalesekesane,

¹³ si kipabalrithi ku laimai, lai lri ikai numianane kalreme ki marudrawdrangeini tara dramare. Lu ngilribatenga kikai, lri dulrungasu rakete iniane.

¹⁴ Lukabilrilinga la kaisu kadalamenga iniane, lri pangilralraingisu iniane, asi lwiyane amanisu ka wavutha karudrange iniane, kaisu lri maka pangialrau ki duri si kilangai iniane.”

Kakudhane ki amucungulane ki takatakanga ka sawvalai

¹⁵ “Lwiyasi la ikai ku umawmase la sa drusa ku labaibaini, la kadalame ki tangea, la kai kadalame ki tangea. Kwini lalisu latara pasikai iniane tulalake, ai ku takatakanga ka sawvalai tulalake kwini ki kaika kiakadalame,

¹⁶ luka tapavalavalanenga ku zaisange, kwini lasu kailri maka pawkalrivili kwini ki lalake ki kadalameini, si baai iniane kwini tinueapane ku kindri.

¹⁷ Adravane kwini tinueapane ka lalake kwini ki kaika kadalameini, lri tara pasudalepe ku kindri kwini ki takatinueapaneini, lu apavalavalanga ku zaisange lri baai drima ku taingeane iniane. Kwini lasu tinueapane, ka tulalake ki tama saicengecenge kagaragarange, lri tara kisupilri ku kindri ki tinueapane.”

Kakudhane ki lu marasikai ki ngiakamiane ka lalake

¹⁸ “Lu ikai ku umawmase ku ngiakamiane ka lalake, adravane sangupialenga pathavungu kaelaela, kwini lasu lakai kilalra ki marudrawdrange,

¹⁹ ku marudrawdrangeini lri iluku iniane mwa ki lrawlrawdru ki cekele ikai cucubungu ki laciwru kisaibange.

²⁰ Kwini lalasu lri kawriva ki laciwru, ‘Kikai lalake nai ngiakamiane turamuru, kai kialalralalra naiane, takabusukane lukakaiyaiya kanganganga.’

²¹ Ku mapapangale ki cekele lri arakai ku lrenege cabiri papacai iniane. Lumiakikai, lri mwalra numi kudra miyaiya kai ku ngialisiane ikai numiane. Ku mapapangale ki swa Iseraylri lri makitu kilalra kikai si mukuludru.”

Drumane ka kakudhane

²² “Kai umawmase alaiyasi kipathavungu kipapacai, ku kinawmasane la kelrai pubelenge ki ulrudru ka angatu,

²³ kikai kinawmasane madha pukaiyaiyane pikai ki ulrudru, tara ivaivaiyana dralreke, asi lwiyane luka taikelradhane ku kinawmasane lri dawlu ku akipuswane ki Tamatama kwini kadaengane. Kunumi dralreka kwini kinawmasane, amani lu pakakudrulru kwini baai numiane ki Tamatama ka Twaumase numi kwini kadaengane.”