Tapelane Drekase 20 - Ngudradreadrekadhane Ka Sisiu 魯凱語聖經

Kakudhane ki kiakaruburu

¹ “Kunumi lu mwa numi kikaruburu ki badha, la drele numi ki lapalridingi, ki larigi, si lakwapingi lini ala ka tapapangale numiane, madha mukulukuludru, asi lwiyane kwidra amani ka palribulu numiane katwase ka Izipiti ka Tamatama ka Twaumase numi lri tapalra numiane.

² Lu kai numi mwana kikaruburu, ku barakalai lri mwa kwini si la kawriva ki lakwapingi,

³ ‘Swa Iseraylri, kunumi kilalra! Kaikameane lri kikaruburu numi ki badha, madha mukulukuludru, madha amalremelreme, madha kathathibuthiburu.

⁴ Ku Tamatama ka Twaumase numi lri tupalra numiane; lri paakaci numiane.’

⁵ “Lai lri pacungulu kwini lakiacapili pelaela ki lakwapingi lini, ‘Kunumi aneane kwidra twadaanenga la kaina ka patarumarana? Ku ngimiyaiya kai ku umawmase kailri katumane lu siwlri. Amani lwiyasi ala pacai, ku palrapalra lri ngitalingikaiyane iniane patarumara kwini daaneini.

⁶ Ikai numiane aneane ku twababudwane la kaina maka kibuduana? Ku ngimiyaiya kai ku umawmase kai lri katumane siwlri. Amani ala pacai, lrika palrapalranga ku kiasupilri kwini bava ka budu.

⁷ Ikai numiane aneane ku twasiasilanganenga la kaiyana karudrange? Ku ngimiyaiya kai ku umawmase kai lri katumane lu siwlri. Ala pacai kwini lasu, ku palrapalra lrikamani ku wamwa karudrange ki naika tauwaneini.’

⁸ “Kudra la kiacapili lri pelaela ki lakwapingi lini, ‘Alaiyasi ikai numiane ku amalreme, mathathibuthiburu, kailri katumane siwlri. Amani kwini lasu kulri kamani ku pangialisi kudra takidremedremane ki lakwapingi makanaelre.’

⁹ Kwini lakiacapili lu maka pelaelanga ki lakwapingi lini, lri sikawlunga kwidra lri kicapili ki tamavavalane.

¹⁰ “Lu mwanga numi kikaruburu kwini ki lacekele, paswalana kwini ki swakai kwini pangikakamani kusange.

¹¹ Kwini lalasu lu muelebe kwini taelelebane ki cekele si kusange, kwini lalasu lri aduringa numiane, si lrika amani ku pasiakaikai numiane kaungu.

¹² Alaiyasi la kai kusange numiane, la kirimulringa kiecebe numiane, lri dulru numi lringulu kwini ki cekele.

¹³ Ku Tamatama ka Twaumase numi lri pamalranga numiane kwini cekele, lri nguelre numi papacai sanaka sawvalai.

¹⁴ Ai kwidra labaibai, lavavalake, lanilapulapwane, si la lawbubulu, lri dulru numi tuniravasanenga numi, asi lwiyane kwini amani ku Tamatama ka patarwamara numiane.

¹⁵ Ki kai tinukakudhanane mamamwa arakai kwini ki ngwadadaili kwini ki taikaiyane numi ka lacekele.

¹⁶ “Ai, lu drikisinga numi kwini abaadhane numiane ka kadaengane ki lacekele ku Tamatama ka Twaumase numi, tara demedema papacai kwini ki laumawmase.

¹⁷ Kunumi tara paluluda kwini drekase ki Tamatama demedeme papacai ki swa Hite, swa Amuri, swa Kanange, swa Perizi, swa Hivi, si swa Yebuse.

¹⁸ Kunumi amuda liniane, amani lu lrilrigili numiane pasukubu ki samiamiange ka la ngialisiane ka kakudhane, la ngwalai numi kwini si pasalriu ki Tamatama ka Twaumase numi.

¹⁹ “Lu mucekele numi, adravane tarathainu numi, adravane ka laangatu madha thiathiabe. Kunumi lri dulru numi kane kwini madru ki angatu, ai madha thiathiabe, asi lwiyane kwini laangatu kaika badha numi.

²⁰ Lri dulru numi thiabe kwini kai pwamadru si malra thurade tulawbubulu, sa arakaiyane numi mucekele kikaruburu, pakeela ku tamalrane numi kwini lacekele.”