Tapelane Drekase 19 - Ngudradreadrekadhane Ka Sisiu 魯凱語聖經

Kakudhane ki Tamwane kipalakebe ka cekele

¹ “Ku Tamatama ka Twaumase numi lri kabebetethe kwini abadhane numiane ka laminzuku kwini ki kadaengane, lai lri drikisi numi si malra kwini kadaengane lini, daane lini, si ikainga kwini sutelrainga,

^2-3 kunumi lri pautulru numi kwini kadaengane palraelre, ikai kwini ki caceekele lai lri cegecege numi ku taluvaale ku madaduai madu masasawlri ka cekele, pakai kwidra ki kaika waranau si papacai ki umawmase ani ka tamwaneini mubere si kitubi palakebaili iya.

⁴ Alaiyasi ikai ku umawmase ala ka pasamali papacai kwidra ki kadrwa ku tamakakabadhane ka umawmase, kwini lasu lri dulru mubere mwa ki sanaka Tamwane kipalakebe ka cekele murikai ku apanianiakane.

⁵ Lu pathalrilrikwane iya, yakai ku maredele ki pasiagisini mawngatungatu pulebe ku angatu, sa pulebelebe ku angatu, kwini kumugu la nguculrwane, si makakai ki kinawmasane ki pasiagisini, la pacai, ki kai umawmase lri dulru mubere mwa sanaka Tamwane kipalakebe ka cekele.

⁶ Alaiyasi ala ka taluvavaale ku Tamwane kipalakebe ka cekele, la adaili, kwini lri pasikai ki retesaneini bilri alau lri padali iniane, la papacai iniane sa kipakilringauana ku girimucane. Ai ku patengatengane, kikai umawmase kaika waranau si papacai kwini ki kadrwa ku tamakakabadhaneini ki pasiagisi, kai lri kipapacai.

⁷ Lakamani kwidra, padradrekaseli numiane ka tara tucekela ku taitulruane ka Tamwane kipalakebe ka cekele.

⁸ “Ku Tamatama ka Twaumase numi lri singikai kwidra tapukawnanengaini ki cucungulane numi paruswadrau ku pagisane ki kadaengane numi, la baainga numiane kwini pukawnungaini ka kadaengane,

⁹ kunumi lri padrimanga numi ku taitulruane ka Tamwane kipalakebe ka cekele. (Alaiyasi paluludu numi kikai drekaseli numiane patuelre, la kilibake ki Tamatama ka Twaumase numi, si singikai kwini bulruini numiane cekecekele, lri malra kikai kadaengane si patarumara numiane.)

¹⁰ Kunumi pangimia kikai, lani kai pacai kwini kaika waranau ka umawmase; kunumi la mialri kakadrwa ku asiamecane numi kwini kiame ki kiapapacai ikai kwini ki apatarumarane numiane ki Tamatama ka kadaengane.

¹¹ “Ai, alaiyasi ikai ku umawmase ka kiadremedreme nau papacai iya, la ranau papacai ki badhaini ala mubere mwa ki taluvaale ka Tamwane kipalakebe ka cekele,

¹² kwini ciwru ki cekeleini lri tara malra iniane bilibili pasiwlri, baai kwini ki lritudrane ki lri bilri, si pwa papacai iniane.

¹³ Kunumi madha kakalikalithi kikai miyaiya kaika umawmase, malra patwalai ki swa Iseraylri mwalra kikai miyaiya kaika papacai ki umawmase ka umawmase, lri kasulivalivate numi sanaka maneemanenga.”

Kakudhane ki sidrumane ka pagisane

¹⁴ “Ikai ki baai numiane ki Tamatama ka Twaumase numi ka kadaengane, madha patalulaela kwini pagisane ki pasiagisisu; kwini yai amani ku tupagisane ki siaswalane ka umawmase.”

Kakudhane ki wasiwmi ka umawmase

¹⁵ “Luka tangeangea ku umawmase ku wasiwmi kai lri maka tupasalrivane ki umawmase; lu lribate ki tadrusa ku wasiwmi lri dulru tupasalrivane ki umawmase.

¹⁶ Alaiyasi ikai ku tangeangea ku wadraedrangelre siwmi, la pamulisi ki drumane ka umawmase,

¹⁷ Kikai tadrusa lri tara mwa kwini ki pilri ki Tamatama ka tasukusukubane, lai lri kitubi kwini ki wadrangalrungalru ka barakalai si tarasaibaibange turingaringau.

¹⁸ Kwini tarasaibaibange lri tara pudriadringai drele silrigu kwini nisarubwanenga ka lapacase, alaiyasi ikai ku nidraedrangelrane siwmi, la pamulisi ki sakacekele ka swa Iseraylri,

¹⁹ kikai umawmase lri tara tarumara ku naika akipathavungane ki kiapukunkwane. Lu mia kikai, lri dulru numi mwalra ku ngimiyaiya kaika ngialisiane.

²⁰ Ku drumane lu kilalra lai lri mialri mukuludru, lai ka kadrwanga ku umawmase ku nau pia amia ku miyaiya kaika ngialisiane.

²¹ Papia ki miyaiya kaika umawmase, kunumi madha kakurukuru, lu muniake lri ki muniake, luka maca lri biilri pamaca, luka valisi lri biilri pavalisi, luka alrima lri biilri paalrima, luka drapale lri biilri padrapale.”