Tapelane Drekase 18 - Ngudradreadrekadhane Ka Sisiu 魯凱語聖經

Atudrulrane ki labarakalai

¹ “Kikai swa Lrivi ka labarakalai kai lri maka pikai ku talikaini ku kadaengane ikai ki swa Iseraylri. Kwi lalasu ku sacekecekelane lini lrika satalu ki la patarumaramara si lanipatarumarane ki Tamatama.

² Kwi lalasu kaika mararamau ki drumane ka lazuku ikai ku talikai lini ku kadaengane, singiakai kwidra puvaga ki Tamatama, lai kisupisupilri tutacekecekelane ka akaesadhane ki Tamatama.

³ “Ku laumawmase lu patarumara ku lwange ku kiu yai, si sadavadavace, bathingi, si tali barangane avalane baai ki barakalai.

⁴ Kunumi la malra kwini aswalalanga kabea ka lataleke, bava, ulrive ka lawlau si ubale ki kiu vala liniane.

⁵ Asi lwiyane ku Tamatama ka Twaumase numi patwalai numiane ka lazuku pilri si pacegecege ki swa Lrivi ku lrika apalralrawthane abarakalai si kisikawkawlu iniane.

⁶ “Sanaka aneanenga ka swa Lrivi alaiyasi la ngikakamanini kitukudha twalai ki taikaiyane ki cekele ki swa Iseraylri, si mwa kwini ki pilri ki Tamatama ka taikaikaiyane sukubu,

⁷ la abarakalai si kisikawkawlu ki Tamatama ka Twaumaseini, kwini lasu lri dulru taelre ki swakai kwini ki abarakalai ka swa Lrivi taelre kipuawngane.

⁸ Kwini lasu si kwini drumane ka barakalai lri tarumara ku thadalrane ku takelretane ku lataleke. Ala kwini baai ki wacekecekeleini, lri dulru pikaai.”

Madha tupapapalra ku kakudhane ki sakamaelanane ka zuku

⁹ “Kunumi lu mudaanenga numi kwini ki abaadhane numiane ki Tamatama ka Twaumase numi ka kadaengane, maadha tupapapalra kwini kakudhane ki sakamaelanane ka minzuku kwini ngialisiane ka kakudhane.

¹⁰ Kunumi madha malramalra ki lalake numi ka ababai si lama pwa ki tapatarumaramarane; la madha tulrisilrisi kithingale, drele ku angimiane, tulrilrisi,

¹¹ arakai ku satulrisiane, kivaga ki galrale ki abake ki wapacainga.

¹² Ku Tamatama ka Twaumase numi mavalracevace turamuru ku paiya ku ngimiyaiya kai ku umawmase. Lakamani kwidra, lu arwakainga numi ku kadalranane numi yai, ku Tamatama lri pakatwase mwalra ki miyaiya kai ka laminzuku.

¹³ Tara kasalrwa ki Tamatama ka Twaumase numi.”

Pwavaga ku apacegecegane ku tangea ku yuginsia

¹⁴ La pacungulu ku Musi kawriva, “Kwini lrika amwane numi sicekele kwini ki swakai kwini lri tuvaga numi ku vaga ki tara tulrisi kithingale si tara drele kithingale, ai ku Tamatama ka Twaumase numi kai palraingi lu pia numi kikai.

¹⁵ Ku Tamatama lri patwalai ki sakacekele numi pilri si pacegecege ku mia nakwane ku yuginsia; kunumi pasalaladha iniane.

¹⁶ “Lu irubunga numi ikai lregelrege Hurebe, kunumi la kitubia ki Tamatama ka Twaumase numi ku kaika apelanenga numi kilalra ku vagaini, kai pelanga drelenga iniane ikai ki wakelrakelrabe ka apwi, amani lu pacai numi.

¹⁷ Ku Tamatama la pelaela nakwane, ‘Kwini kitubi lini malrigili.

¹⁸ Lri patwaladhaku ki sakacekele lini pacegecege ku tangea ku mia muswane ku yuginsia. Lri baadhaku ku lrika akawrivaneini; kwini lasu lri malra kikai drekaseli nguvavaeva pelaela ki mapapangale.

¹⁹ Kwini lasu lri kamani ku tarasivaga nakwane, sanaka aneanenga la kai kilalra, lri kamani ku kiapathavungu.

²⁰ Lwiyasi ikai ku yuginsia la ikai ku kaika drekaseli, la kadraedrangelre si arakai ku naganeli kawriva pelaela, ku yuginsia la arakai ku nagane ki latwaumase kawriva, kwini lasu lri tara kipapacai.’

²¹ “Kunumi alau lri apithingale numi pilri ku kaika twalai ki Tamatama ku vaga.

²² Lwiyasi ikai ku yuginsia la ngikakamani ngitalingikaiyane ki Tamatama kawriva pelaela, ai kwini vagaini la kai ngimia, ala, kwini vagaini kaika pelaela ki Tamatama. Kwini lasu ngiakakamani kawrivariva, kunumi madha mukulukuludru iniane.”