Tapelane Drekase 16 - Ngudradreadrekadhane Ka Sisiu 魯凱語聖經

Kakudhane ki Takilragavane ka lrisi

¹ “Kunumi tara pikaiya ki dramare ki Abibe pasusu ki Takilragavane ka lrisi, papia ki Tamatama ka Twaumase numi pangimia kwini sauasaesakene numi, asi lwiyane napiakaikai ki dramare ki vaeva ka maungu palribulu numiane katwase Izipiti.

² Lu mwa kwini pilrini ki Tamatama ka taikaiyane sukubu ki Twaumase numi, la ikai kwini culu ku lwange si kiu, tusapatarumarane ki Takilragavane ka lrisi si patarumara iniane.

³ Kwini akaneane ki Takilragavane ka lrisi ani kakadrwa ku mwasemakenga. Kunumi lri tara makapitulu numi kanekane kwini kaika nipawsemakane ka pange, mia kwidra sa karacacaacange numi katwase Izipiti, ka mialri kane kwini kaika nipawsemakane ka pange. Kikai pange mialri ka sia Kiapakwalri ka pange; kunumi kanea. Pakai kwidra amakalautwane numi ngulringau ku tamulatadrane numi Izipiti, si kidailinga ki akipakwalriane kwini sakavai.

⁴ Kikai ki nimaka pitulane, ikai kwini ki ngwapapalra ki taikaiyane numi kaika nipalraingane ku naaneanenga ku piakai ku sapawsemasemakane; kwini niculwane saka makavaale ki maungu ku beate lri kane numi demedeme.

^5-6 “Ikaiya kwini ki pilri ki Tamatama ka Twaumase numi ka taikaikaiyane sukubu si culu kwini ngwakai ki Takilragavane ka lrisi, madha mwamwa kwini ki abadhane numiane ka kadaengane si culu. Lu lriwgunga ku vai la culua kwini amani saka takatwasane Izipiti ka vai;

⁷ ikaiya kwini ki pilrini ka tasukusukubane aga kwini apatarumarane ka nituduane, la kane kwini nituduane, luka samaka pusale ki mialrealre la katwasa mutavanane.

⁸ Kunumi la kaneeana ku kaika nipawsemakane ka pange makanemele; luka samakapitulu la irubu si sukubu ki Tamatama ka Twaumase numi, madha kauawngu.”

Kakudhane ki takitaletalekane ka lrisi

⁹ “Kunumi twaladha kwini ki tapathagilane numi kitaleke, asipi sangupitulu ki nimakapitulane,

¹⁰ ala pasusu kwini ki Takitaletalekane ka lrisi, la papia ki Tamatama ka Twaumase numi pangimia musakene. Kunumi singikaiya ku patarumaraini numiane ku taleke, la iluku kwini ngikakidremedreme numi ku sapatarumarane si kela patarumara iniane.

¹¹ Kunumi si lalalake numi, duri, si yakai kwini ki cekele numi ka swa Lrivi, singibadhane, pakulrulrulu si walibakane makanaelre, ikaiya kwini ki pilrini ki Tamatama ka Twaumase numi ka taikaikaiyane sukubu pakarededele tulrisisi.

¹² Kunumi tara pudriadringaadha pasusu kikai kakudhane; madha karimurimuru ku nataikaiyane numi Izipiti aduri.”

Kakudhane ki Talakangane ka lrisi

¹³ “Kwini lu maka seketenga numi ku lataleke si bava, pangimia ki Talakangane ka lrisi makapitulu.

¹⁴ Kunumi si lalalake numi, duri, si yakai ki cekele numi ka swa Lrivi, singibadhane, pakulrulrulu, walibakane, karededela tulrisisi.

¹⁵ Lri ikai numi kwini ki pilri ki Tamatama ka Twaumase numi ka tasukusukubane pasusu ki yakai ki Talakangane ka lrisi makapitulu, pathingalane musakene. La makitu kiraragai; asi lwiyane ku Tamatama pakiataleke numiane, si kasulivaliivate ku tatwatumanane numi patueelre.

^16-17 “Sanaka sawvalai niyane ki kuni, ki caicaili lri ngusitulrulu, kwini ki Takilragavane ka lrisi, Takitaletalekane ka lrisi si Talakangane ka lrisi, mwa kwini ki taikaikaiyane si sukubu iniane. Sanaka aneane lri pangimia ku tasubulrubulrwane ki Tamatama ka Twaumase numi, pakaelre ku tadulrwaneini, iluku ku saceacebe patarumara iniane.”

Kakudhane ki wapilri ku tarasaibange si lakiacapili

¹⁸ “Kunumi patwaladha ki laricingi ki zuku, pasikai ki Tamatama ka Twaumase numi kwini ki baaini numiane ka lazuku sikawlu ku tara saibange si drumane ka kiacapili. Kikai laumawmase lri tara paramaraamau pakadringelrese saibange ki mapapangale.

¹⁹ Tara aparamaramaava kai ngitatukucingalre, kai capange pangimia ku takipuawnganane; la kai malra ku pavangalre, asi lwiyane kikai pavangalre pakamukici ki wathingale ku kakudhane, ku madringelrese ka umawmase la baebalrenga ku pacengecenge si kai pacengecenge ki madringelrese.

²⁰ Kunumi tara aparamaramaava pakadringelrese ki kakudhane. Lu mia kikai, kunumi lri maka pikai ku talikai numi ku baai ki Tamatama ka Twaumase numi kwini kadaengane, la kawlai ikaikai kwini.

²¹ “Lu pasikai numi ki Tamatama ka Twaumase numi cegecege ku tapatarumaramarane, madha pithithili cegecegecege ku ulrudru ka angatu ka ababai ka twaumase ka Asera,

²² la madha cegecegecege ku sadrengedrenge si sukubu, asi lwiyane amani kwini ku kavalracevace ki Tamatama ka Twaumase numi.”