Tapelane Drekase 15 - Ngudradreadrekadhane Ka Sisiu 魯凱語聖經

Kakudhane ki Taisadrasadrane ka caili

¹ “Lu tarapitu ka caili ikai ki bibiilrilinga ka caili, kunumi mwalranga kwini amece ki akiame numiane.

² Kikai tinukakudhanane twangimiyaiya kikai, sanaka pakiasalru ki sakacekeleini ka swa Iseraylri ka pikiamane lri tara mwalranga kwini kiame ki sakacekele, madha saladhaladhanga, asi lwiyane ku Tamatama ngiakakamani pelaela kikai amwalranenga ku kiame ki sakacekele.

³ Kwini kiame ki badhabadha lri dulru numi saladha; ai pakai ki sakacekelesu, adravane ka manemane ku akiame numiane, maadha saladhaladhanga.

^4-5 “Ku Tamatama ka Twaumase numi lri ikai ki abaadhane numiane ka kadaengane si subulrubulru baai numiane. Lwiyasi kilalra numi pasalaladha iniane, la dradrele pangimia kikai drekaseli numiane kaikameane, ikai numiane lrika kadrwa ku matiakukuru ku umawmase.

⁶ Ku Tamatama lri singikai kudra tapuvaganengaini si subulrubulru baai numiane. Lri tara ikai ku paisu numi pakisalru ki takaala ka labadhabadha, si kai mwa ki druma kisalru. Lri dulru numi marasikai ki taikalra ka drumane ka kuni, ai kadrwa ku nataingeanenga ku kuni kulri dulru marasikai numiane.

⁷ “Ikai kwini ki baai numiane ki Tamatama ka Twaumase numi ka kadaengane, adravane ka swa tali inu ka cekele, lwiyasi ikai numiane ku matiakukuru ku sakacekele numi, kunumi madha kaicicilri kagethelrale kai palribulu iniane.

⁸ Kunumi ngibalrealringa si katwabake, baai kwidra kawrameini si pakisaalrau iniane.

⁹ Madha ngwalalai lri kelanga ku taisadrasadrane ka caili iya, si kai pakisaalru iniane; ikai ki kidremedreme numi madha pikaikai kikai ngialisiane. Lwiyasi kai numi pakisaalru, kwini lasu la papia ki Tamatama sidruru, lu mia kwini pasalriunga numi.

¹⁰ Madha kaicicilri, katwabaka si la baai, ku Tamatama lri subulrubulru numiane sanaka maneemane.

¹¹ Ikai ki taikaikaiyane numi taikaiyane ku la matiakukuru ka sakacekele numi, lakamani lri drekasaku numiane, tara katwabaka papia liniane.”

Kakudhane ku tangimiamiane ki duri

¹² “Lwiyasi ikai ki swa Iseraylri adravane ka sawvalai ka ababai, la ngikakilangai kituduri numiane, la taraenemenga ka caili ku taaduriane numiane, lu darurunga ki tarapitu ka caili, kunumi tara pangilralrainganga iniane, lani ngilralraingi.

¹³ Lu pangilralraingi numi iniane, madha papaliwnaunai pakatwase iniane.

¹⁴ Kunumi katwabaka si baai liniane kwini baai ki Tamatama numiane kwini kiu, lataleke, bava si ladrumane.

¹⁵ Kunumi tara ngulringava, nayakai numi Izipiti aduri; ku Tamatama ka Twaumase numi mwakerenge numiane, la kamani kaikameane kai drekaseli numiane.

¹⁶ “Kwini duri numi lu ngwalai ku kilibakane numiane si tacekecekelane numi, la kai apikatwase numiane, nau taelrenga iya numiane,

¹⁷ malra liniane pwa ki lrawlrawdru ki daane numi, ikai kwini ki lrawlrawdru la lutu ki calringaini. Lu ngimia kwini, kwini lasu lri makalautunga aduri numiane. Ku ababai ka duri la tungimiyaiya kikai.

¹⁸ Lu pangilralraingi numi ki duri; madha padiadili kwi kidremedreme numi; kwini lasu taraenemenga ka caili pasikai numiane kaungu la malramaalra ku apararamau ku naika amalrane ki tara kauawngu. Lu pangimia numi kikai, ku Tamatama ka Twaumase numi lri tara subulrubulru numiane patuelre.”

Kakudhane ki ngwakai ki aswalalanga kitulalake ka lwange si kiu

¹⁹ “Malra kwini aswalaalanga kitulalake ka sawvalai ka lwange, balase ka kiu pakitukudha, si patarumara ki Tamatama ka Twaumase numi; madha arakaikai pakaungu, la madha kaciaciane ku ubale kikai ki kiu.

²⁰ Ki caicaaili, kunumi si wacekecekele numi ikaiya kwini ki pilri ki Tamatama ka taikaikaiyane sukubu, si icucubungu iniane, kane kikai miyaiya kaika beate ki lwange si kiu.

²¹ Lwiyasi laka kai kiatulrepenge ka lwange si kiu, pilapilai, mukimukici, yakai ku drumane ku tangilisianane, kunumi madha patarumaramara ki Tamatama ka Twaumase numi.

²² Lri dulru numi ikai tavanane kane ku ngimiyaiya kikai ku beate ki lwange si kiu. Adravane ka mabula ka kaika mabula niyane ka umawmase ikai ki tinukakudhanane, lri dulru kane, mia lu kaneane ki salawngane si kisisi.

²³ Ai kunumi madha kanekane ku erai, malra gugu pwa ki daedae cakena, mia lu gugwane ku acilai.”