Tapelane Drekase 14 - Ngudradreadrekadhane Ka Sisiu 魯凱語聖經

Kaika nipalraingane ka lakakudhane ki malreme

¹ “Kunumi yai lalake numi ki Tamatama ka Twaumase numi. Lu tubi numi ki wapacai yai madha twalralrau ki maelane ka zuku ngipapakadula ki kinawmasaneini, si bunalre ki tali punu.

² Swakai numi ki Tamatama ka Twaumase numi ka saniange ka kawkawlu; patwalai ki mapapangale kai kawmasane si pilri numiane ka kawkawluini.”

Mabula si kaika mabula ka waudriwdripi

³ “Kudra pelaela ki Tamatama ku kaika mabula ka lawaudriwdripi, kunumi madha kanekane.

⁴ Ku adulrwane numi kane ku lawaudriwdripi amani kikai: Lwange, nikiubawbalane ka kiu, kakiuane,

⁵ salawngane, mariaridare ka kisisi, cance, kisisi, tenlringi, yaubulane ka nikiubawbalane ka kiu.

⁶ Sanaka mauvagai ku lrubungu si puthaviane ka waudriwdripi adulrwane kane;

⁷ ai, kudra mauvagai ku lrubungu sikakathane, kudra puthaviane sikakathane ka waudriwdripi, madha kanekane. Ku lrakeda, lrutuku, sehuange, kaika mabula ka waudriwdripi, madha kanekane, adravane ka wasawlri taetalre, ai ku lrubungu lini kai mauvagai.

⁸ Kai beke kaika mabula ka waudriwdripi, mialri madha kanekane; asi lwiyane kai beke adravane ka mauvagai ku lrubungu, ai kai wasawlriwlri taetalre. Kunumi madha kanekane kikai beate ki kaika mabula ka waudriwdripi, la mialri madha takelakela ki wapacai ka kinawmasane lini.

⁹ “Ku twaparidi twakaralabe ku lakange akaneane patuelre;

¹⁰ ai kudra kadrwa ku paridi kadrwa ku karalabe ku lakange madha kanekane, asi lwiyane kaika mabula.

¹¹ “Ku mabula ka adhadhame kanea.

^12-18 Ku kaika akaneane ku laadhadhame amani kai: Takanga, kwici, tingielaela, kwau, adrisi, segese, talralreba, tuniau, haiu, kwange, canlu, tange, luce, taisenge, ababirau.

¹⁹ “Sanaka twasapakepake ka lubalubai yadrepele ka kaika mabula, madha kanekane.

²⁰ Sanaka mabula ka lubalubai kanea.

²¹ “Sanaka ngiakakamani pacai ka waudriwdripi madha kanekane; ai adulrwane numi baai kwini yakaikai numiane ka lasingibadhane ka umawmase, ku kialangai numi pakane ki drumane ka maelane ka kuni ka umawmase; asi lwiyane kunumi swakai numi ki Tamatama ka Twaumase numi, ka amani ku saniange ka kawkawlu. “Kai numi lri maka arakai ku esebe ki kiu aga ku beate ki tikiyane ka kiu si kane.”

Kakudhane ki waziwbunuici

²² “Kunumi luka caili patwaladha kwini ki nikitalekane malra ku ziwbunuici,

²³ la mwa kwini ki pilri ki Tamatama ka Twaumase numi ka taikaikaiyane, si icucubungu iniane kane kwini patarumara numi kwini ziwbunuici ka lataleke, bava, lawlau ki ulrive, si aswalalanga kitulalake ka lwange si kiu. Kunumi tara pasusua kikai kakudhane, si kibulru makalautu mukuludru musakene ki Tamatama.

²⁴ Lwiyasi adaili turamuru ku daane numi ki tapilriane ki Tamatama ka taikaikaiyane, si kai maka pwa kwini iluku kwini la ngukalra numi kitaleke ka ziwbunuici,

²⁵ lri dulru numi kilangai kwini nipacebeane ka taleke si nilapulapwane, la malra kwini paisu iluku mwa kwini ki nipilriane ka taikaikaiyane sukubu ki Tamatama.

²⁶ Lri dulru numi ngisasingikai arakai kwini paisu ikai kwini, si langai ku lwange, kiu, malrupi ka bava, sapukwane ka bavane. Kunumi ka wacekecekele makanaelre ikaiya cucubungu ki Tamatama ka Twaumase numi kane ungulu si kiraragai.

²⁷ “Madha karimurimuru kwini yakai numiane ka swa Lrivi, asi lwiyane kwini kadrwa ku ngitatu tacekecekelane lini.

²⁸ Kwini ki bibiilrilinga ki nitaratulrwane ka caili, malra kwini siasanane ku ziwbunuici salri pwa cekele sekete.

²⁹ Kilakikai niseketane abadhane ki kai ngiatatu tacekecekelane ka swa Lrivi, si kwini ki labadhabadha, pakulrulrulu si walibakane. Lri dulru singikai ku amakakelretane lini si mwa malra kwini taleke. Lu pangimia numi kikai, ku Tamatama ka Twaumase numi lri subulrubulru numiane ikai ki sanaka tatwatumanane numi.”