Tapelane Drekase 13 - Ngudradreadrekadhane Ka Sisiu 魯凱語聖經

¹ “Alaiyasi la ikai numiane kudra yuginsia niyane si tarapelaelaela ku patharevane ki wasipi, la arakai ku pinangu Twaumasane ka puku

² si la lrilrigili numiane katwase mwa sukubu kudra kaika sukubwana numi ka twaumase, kwi lasu adravane ka pathingalane ku pinangu Twaumasane ka puku ku tapiane,

³ kunumi madha kithathengethengete iniane; ku Tamatama ka Twaumase numi arakai iniane kilrialringau numiane, ku lrika athingalane numiane luka patengane numi salikavaeva ku kidremedreme kilibake ki Tamatama.

⁴ Kunumi tupapalra ki Tamatama ka Twaumase numi, musakene mukuludru iniane; kunumi kilalra pasalaladha iniane, paluludu ku padradrekaseini; kunumi tara marasikaiya iniane, savaeva ku kidremedreme iniane.

⁵ Ala kwini yuginsia si wathingale pelaela ki sipi ka umawmase, lri kipapacai; asi lwiyane kwini lasu wakakadra numiane baebalre ki amani ka wasangiluku numiane katwase Izipiti, palribulu numiane kidaili ki takituduriane ka kadaengane kaTamatama ka Twaumase numi. Ku miyaiya kaika umawmase yai ngialisiane turamuru; lri lrilrigili numiane pathivalrau kudra pelaelaela ki Tamatama ka Twaumase numi ku kadalranane. Kunumi tara papacadha iniane, patwalai numiane mwalra kikai ngimiyaiya kaika ngialisiane.

⁶ “Adravane ku betakane numi, lalalake numi, kadalame numi ka labaibai numi, ku katalragiane numi, lau lri kibububuli kakakadra numiane mwa sukubu kwini ki kaika sukusukubu ki cucungulane numi ka twaumase.

⁷ Ikai liniane, alau lri ikai kulri lrilrigili numiane mwa sukubu kwini ki ngwadadethe ki ngwadadaili ka sukusukubu ki laumawmase ka twaumase.

⁸ Ai kunumi madha kilalralalra pasalaladha liniane, madha kituvagavaga iniane. Kunumi madha kakurukuru ku ngimiyaiya kai ku umawmase, la madha palakelakebe iniane.

⁹ Mwalra iniane pakatwase! Kunumi aswala pwalrima, ku druma lani kabibilrilinga cabiri iniane ara lrenege.

¹⁰ Arakaiya ku lrenege papacai iniane, asi lwiyane kwini lasu kiasanu lrilrigili numiane cilri kidaili ki wasangiluku numiane katwase Izipiti, palribulu numiane kidaili ki takituduriane ka kadaengane ka Tamatama ka Twaumase numi.

¹¹ Lungimia kikai, lu kilalranga ku swa Iseraylri makanaelre kikai ngimiyaiya kai lri mukuludru, lai lri kakadruanga ku umawmase ku walreme pia kikai ngialisiane ka kakudhane.

^12-13 “Alaiyasi kilalra numi ki palrapalra ku amia kai, ikai ki patarumara numiane ki Tamatama ka Twaumase numi ka taikaiyane numi ka cekele la ikai ku gurucuki, la lrilrigili ki yacekele ku laumawmase mwa sukubu ki kaika sukubwana numi ka twaumase,

¹⁴ kunumi tara silapa pudriadringai. Lwiyasi ka patengane ka ngiamia kikai ngialisiane,

¹⁵ lri pakamudu numi kwini ki cekele ki laumawmase si lanilapulapwane patuelre, la malra kwini ki cekele pakisaalrunga kabebetethe.

¹⁶ Lri sarubu numi kwini lamanemane ki cekele patuelre, la rubu pikai ki taswadraavane, ala pwa lama kwini ki cekele si yakai ki cekele ka lawbubulu, si tusapatarumarane baai ki Tamatama ka Twaumase numi. Kwini cekele lrika palralrawthunga aubulane, madha tupelaelanga tucekele.

^17-18 Sanaka alamalamane ka lawbubulu, kunumi madha pasusuru. Lungimia kikai, ku Tamatama lri kabasau ku lisianeini, lai lri arakai ku thalradhane marasikai numiane. Lwiyasi la paluludu numi kikai pelaelali kaikameane kai padradrekase patueelre, si pangimia kudra anipia kwini iyaini, lri arakai ku thalradhane marasikai numiane, si singikai kudra tapukawnanengaini ki cucungulane numi, lai lri aru drima ku umawmase numi.”