Tapelane Drekase 12 - Ngudradreadrekadhane Ka Sisiu 魯凱語聖經

Kathane ka taikaikaiyane sukubu

¹ “Lu sutelrainga numi ikai kwini ki baai ki Tamatama ka Twaumase ki cucungulane numi ka kadaengane, makalawtua dradrele paluludu kikai sanaka hulrice padradrekase.

² Lu drikisinga numi kikavai kadaengane, tara malra pakisalru buruku kwini nataikaikaiyane ki nayakai kwini ku umawmase sukubu ki latwaumase; adravane ka yakai ki kalregelregane ki lrelrelrege, yakai ki angatungatu ki lalrilriane, pwa buruku patuelre.

³ Kunumi subura pakalisi kwini tapatarumaramarane lini, lrudrulu kadrulu kwini ki sadrengedrenge ki samiamiange lini, si lama kwini ababai ka samiamiange ka Asera, la thiaba kwini ki samiamiange lini, lani kai maka ikainga kwini ku laumawmase sukubu tulrisi.

⁴ “Madha pangialralrau kwini tapangimiane ki naswakai kwini ka umawmase sukubu ki yabelenge ka Tamatama ka Twaumase numi.

⁵ Patwalai kwini ki taikaiyane ki lazuku, ku Tamatama lri pilri ku taluvaale ku nipawkalrivilane ka taikaiyane, ku lrika aikaiyane kwini ki laumawmase sukubu iniane.

⁶ Lri mwa numi kwini patarumara ku Lama ka lrisi si drumane ka niculwane, si baai ku nipatarumarane ka ziwbunuici, la patarumara ku lamanemane, pangiabilri ka sapatarumarane, ningikakidremedremane ka sapatarumarane, si aswalaalanga kitulalake ka lwange si kiu.

⁷ Kunumi si yakai numianane ku umawmase lri makitu mwa kwini, kanekane ungungulu icucubungu kwini ki amani ka swabulrubulru numiane ka Tamatama numi, kisupisupilri kwini patululane ki sakwalrialri numi ka mathariri ka lamanemane.

^8-9 “Pakela kikainga, ngiasasingikaikaiyana numi sukubu, asi lwiyane kai numi mwadaaneana kwini abaadhane ki Tamatama ka Twaumase numi ka lrika taikaiyane numi sutelrainga ka kadaengane. Lu mutakelanenga si mudaanenga numi, kai numi lrika sakamiana kikai tapangimiamiane numi sukubu.

¹⁰ Lu maka talubalrenga numi kadravane Yuredange, ku Tamatama lri pamalranga numiane kavai kadaengane, si ikaikainga kavai ki kadaengane. Lri palakebe numiane ku kaika akimucekelane numi ki labadha, lai pakasulivalivate numiane kauawngu cekecekele.

¹¹ Ku Tamatama lalri pilri ku nipawkalrivilane ku taikaikaiyaneini; lalri mailuku numi kwini iluka iyali numiane ku sapatarumarane si mwa kwini sukubu iniane, amani kai Lama ka lrisi si drumane ka sapatarumarane ka waudriwdripi, ziwbunuici si lamaneemanenga, si sakiketeketane ka sapatarumarane.

¹² Kunumi si lalalake numi si duri numi, si la yakaikai numiane ka la swa Lrivi, taelrea ikai cucubungu ki Tamatama kapeaperau kiraragai; pulringava ka kai sakadaenganane kai swa Lrivi.

¹³ Kunumi dradela, madha cacapange pilri kwini tapikaiyane numi patarumara;

¹⁴ kunumi tara mwa kwini ki pilri ki Tamatama ka vaeva ka zuku ka tapikaikaiyane si patarumara. Kathane kwini ku lrika tapikaiyane numi patarumara ku Lama ka lrisi, pia sanaka padradrekaseli numiane patuelre.

¹⁵ “Lakamani, adravane ikai numi kidruanga, ku Tamatama ka Twaumase numi kudra patarumara numiane kudra nilapulapwane, adulrwane malra ngisasingikai malra culu, si kane ku beate lini. Adravane ka mabula ka kaika mabula niyane ka umawmase ikai ki tinukakudhanane, kunumi lri dulru numi kane, mia lu kane numi ki salawngane si kiu.

¹⁶ Ai kai numi lri maka kane ku erai, gugwa pwa ki daedae, mia lu gugwane ki acilai.

¹⁷ Kunumi madha kanekane ku nipatarumarane ki Tamatama ku sapatarumarane ikai kwini ki taikaikaiyane numi, amani kwini lataleke, bava, si lawlau ki ulrive, aswalaalanga kitulalake ka lwange si kiu, sapatubalreane ku takiketeketane, ngikakiketeketeini, si la drumanenga ka sapatarumarane.

¹⁸ Kunumi si lalalake numi, duri, si yakaikai numiane ka la swa Lrivi, lri dulru ikai kwini ki pilrini ki Tamatama ka Twaumase numi ka taikaiyane patarumara, ikai cucubungu ki Tamatama, si kane kwini nipatarumarane. Lri ikai numi kwini kisupilri kwini tapangimianenga numi, kapeaperau kiraragai.

¹⁹ Kunumi tara pulringava, ikai kwini ki taikaiyane ki kadaengane numi, madha karimurimuru ki la swa Lrivi.

²⁰ “Ku Tamatama ka Twaumase numi, lu singikai ku tapuvaganeini si paruswadraunga ku kadaengane numi, kunumi lri maka ngisasingikainga numi kane ku murikai numi ku beate.

²¹ Lwiyasi la itali adaili numiane kwini pilri ki Tamatama ka tapikaikaiyane sukubu, lri singikai numi kwini taiyaneli, malra kwini baai ki Tamatama numiane ka lwange si kiu culu, la ikai kwini ki taikaiyane numi ngisasingikai ku kadalame numi kane kwini beate ki lwange si kiu.

²² Adravane ka mabula ka kaika mabula ikai ki tinukakudhanane ka umawmase, kunumi lri maka kane numi, mia lu kane numi ku beate ki salawngane si kiu.

²³ Ai lutuumane madha kanekane ku erai, asi lwiyane niake kai erai, madha paelrelre ki niake si beate kane.

²⁴ Kunumi madha kanekane ki erai, malra gugu pwa ki daedae, mia lu gugwane ki acilai.

²⁵ Lwiyasi paluludu numi kikai padradrekase, ku Tamatama lri kadalame; kunumi si lagagane numi lri makitu kasulivaliivate sanaka tatumanane.

²⁶ Kunumi iluka kwini apatarumarane si sakiketeketane numi ku lamanemane mwa kwini ki pilrini ki Tamatama ka taikaikaiyane sukubu,

²⁷ ikai kwini si patarumara ku Lama ka lrisi, patala beate si erai pubelenge ki tapatarumaramarane si lama. Kunumi lalri ikai numi kwini si patarumara ku drumane ku sapatarumarane, la malra kwini erai gugu pubelenge ki tapatarumarane ki Tamatama, la kane ku beate lini.

²⁸ Kunumi tara pudriadringadha paluludu ku padradrekaseli patuelre, kunumi si lalalake si lagagane numi lri dulru kasulivaliivate si kawlai ku tatwatumanane lini; asi lwiyane pacengecenge kwini tapangimiane numi, ka kiragai ki Tamatama ka Twaumase numi.”

Pakiapapawlringau kwini ki wasukubu ki samiamiange

²⁹ “Kunumi lu maka mucekelenga numi ki kadaengane ki badha numi, ku Tamatama ka Twaumase numi lalri amudu kwini ki laminzuku. Lri malra numi kwini kadaengane lini, ikaia kwini sutelrainga.

³⁰ Ku Tamatama lu maka amudunga kwini ki labadha, kunumi la dradrela, madha twalralralrau ki tasukusukubane lini, asi lwiyane lri dawlu ku matiangeange ku amatikurwane lukabibilrili. Kunumi la madha kivavavaga ku tapangimiamiane lini lu sukubu ki samiamiange, la madha patwalralralrau ki tatulrisilrisiane lini,

³¹ madha arakaikai kwini tapangimiamiane lini tulrisi ki samiamiange si sukubu ki Tamatama ka Twaumase numi, asi lwiyane ikai ki tatulrisiane lini paiya kudra kalrase ki Tamatama. Kwini lalasu adravane ka lalalake lini ka labaibai twa sapatarumarane, ikai ki tapatarumaramarane si lama, patarumara ki tulrisi lini ka twaumase.

³² “Kunumi tara pudriadringadha paluludu kikai padradrekaseli patueelre, madha padrimadrima, la madha kivalavala.”