Tapelane Drekase 11 - Ngudradreadrekadhane Ka Sisiu 魯凱語聖經

Saniange turamuru ku Tamatama

¹ “Kunumi kilibaka ki Tamatama ka Twaumase numi, la paluludu ku sanaka padradrekase si hulriceini patuelre si kai kaelaela.

² La thingala, kaikameane amanimaniaku numiane, kainaku kamanimani ki lalalake numi, asi lwiyane ngiakakamani numi kilringaunga ki Tamatama. Wadrelenga numi ku takasaniangane, lrekeme, puku ki Tamatama,

³ si palrealrebanane. Wadrele numi ku tapangimianeini kidresenge ki talialalai ki swa Izipiti si ki kunini,

⁴ la mialri numi drele luka pangiatumane amudu ki kwapingi ki swa Izipiti, larigi si palridingi lini. Sa saladha numiane, arakai ki laveke Suize paurenere liniane, si pakisaalru demedeme amudu liniane.

⁵ Wathingale numi, sa kai numi kelana kikai, sa ikai numi calragulragu, ku pasikaini numiane patueelre.

⁶ Ngwalringau numi ku tapangimianeini kiecebe ki lamwabaibalrithi ki Riwbingi, lalake ki Ilriabe ka Dathane si Abirame. Waegace manunganga ku kadaengane icucubungu ki mapapangale, la malra liniane si wacekecekele lini, ki balrawbau, si lasasiakawlu si lanilapulapwane lini lrungulrungu thamukulu.

⁷ Patakamacamaca numi drele patuelre ku tapangimiane ki Tamatama kikai saniange turamuru ka takaungane.”

Akaesadhane ikai ki nipuvaganenga ka kadaengane

⁸ “Kunumi tara paluluda kikai baaili numiane kaikameane patuelre kai padradrekase. Ala lumia kai, kunumi lri dulru numi talubalre kadravane si mwa drikisi kwini ki amudaanane numi ka kadaengane,

⁹ ikai kwini ki puvaganga ki Tamatama ki cucungulane si lagagane numi ka mwalwalwaludru ku mireke si valu ka kadaengane kalragi ku niake.

¹⁰ Kwini adrikisane numi ku kadaengane kaika thadalrane kuna taikaiyane numi kavai Izipiti. Ikai Izipiti, lu maka paivai numi lri kwalriana numi pwacilai ala lri maka kitaleke numi,

¹¹ ai lri mwa numi kwini ki yakai ku lregelrege, yakai ku vaalru, yakai ku udale ku pakalreke ki kadaengane.

¹² Ku Tamatama ka Twaumase numi apatatuku ki caili drangalru sirapale kikai ki kadaengane.

¹³ “Lakamani kwidra, kunumi dradrela la paluludu kikai baaili numiane kaikameane kai sanaka padradrekase. Kilibaka ki Tamatama ka Twaumase numi, savaeva ku kidremedreme ku gathimi marasikai iniane.

¹⁴ Lumiakikai, lri tara pangimia kwidra ki taudalane ki kalarigarigane si kalalidrarane, si ikai ku amakakelretane numi ku lataleke, ka bavane ku bava, lawlau ki ulrive,

¹⁵ si akaneane ki lanilapulapwane ku laubulu. Lri kane numi si kabucuku.

¹⁶ Kunumi dradrela, madha kilrilrigili si katwase lrilrikudru ki Tamatama, la mwa sukubu ki drumane ka latwaumase.

¹⁷ Lwiyasi mia kikai, ku Tamatama lri kaelaela numiane, si kai lri pawdalenga baai numiane, la lri kameale ku kadaengane, kai cebe ku lataleke; adravane ka kia baai numi ku mathariri ka kadaengane, kunumi lri makakai numi ikaai kwini pacai.

¹⁸ “Lakamani, kunumi pulringalringaava kilakikai padradrekase, si pikidremedreme. La malra kilakikai padradrekase tusapatuthingalane, si sikalathe, siedrete, pakipapawlringalringau numiane.

¹⁹ Kunumi malra kikai lapadradrekase si bulrubulru ki lalake numi, adravane ikai numi tavanane lu katwase numi itali latadre, twatwatumane numi lu isadra numi, katamatikaikaiyana kikai lapadradrekase.

²⁰ Kunumi malra kikai lapadradrekase pacase pikai ki sulripi ki lrawlrawdru si saelelebane.

²¹ Lumiakikai, kunumi si lalake numi lri tara makadulru numi ikai kwini ki puvaganga ki Tamatama ki cucungulane numi ka kadaengane kalragi ku niake; lu tarathainu ikai kai belenge si kadaengane, lri tarathainu numi ikai kwini.

²² “Kunumi dradrela paluludu kikai baaili numiane patuelre kai padradrekase; kilibaka ki Tamatama ka Twaumase numi, si pasusu ku drekaseini patueelre, la kidremedreme tukucingalre iniane.

²³ Lumiakikai, lu katwase numi arucucubungu yai, ku Twaumase lri pakatwase ki laminzuku, lai lri maka drikisi numi ku kadaengane kwini sapupukwane numiane ka laminzuku.

²⁴ Sanaka tapudrapalane numi ku kadaengane lrika numianenga. Ku pagisane ki kadaengane numi lrika twalai tali lrawdru ka calragulragu daruru tali dradha lregelrege Lebanungu, twalai tali talrawane kadravane Yuparati daruru talriwgane ka laveke Miditerania.

²⁵ Adravane daruru numi inunga, ku Tamatama ka Twaumase numi lri singikai kwidra ki tapuvaganeini si kakadrwa kulri maka kiecebe numiane; ku laumawmase lri makitu mukuludru pathimithimi numiane.

²⁶ “Kaikameane pia cucubungaku numiane kai sakisenadhane si sapuswane, ngikakamaniya pilri.

²⁷ Lwiyasi paluludu numi kikai baaili numiane, twalai ki Tamatama ka Twaumase numi patuelre kai padradrekase, lri kisubulrubulru numi.

²⁸ Lwiyasi kai numi paluludu kikai lapadradrekase, si ngibaalrelringa mwa kwini kai wathingale numiane ka latwaumase si mwa sukubu liniane, lri kipusu numi.

²⁹ Ku Tamatama lu sangiluku numiane mudaane kwini ki drikisi numi ka kadaengane, kunumi lri ikai numi kwini lregelrege ka Girizime tawtau pelaela kikai sasubulrubulrwane ka vaga, ikai lregelrege Ibale la tawtau pelaela ku sapuswane ku vaga.

³⁰ Kikai drusa ka lregelrege tara yatalikaai sapakalriwgu kadravane Yuredange ka talriwgane ki vai, ka valrwalru ka kadaengane ki swa Kanange, kwini tali sapakalriwgu la kaika akuthainwane ku tamadadailane kwini adeethe ka Gilegale kwidra ki tharialupu ka angatu kavai Muri.

³¹ Kunumi lri talubalre numi kadravane Yuredange, si mwa drikisi kwini abaadhane numiane ki Tamatama ka Twaumase numi ka kadaengane. Lu maka drikisinga numi kwini kadaengane, ikai kwini sutelrainga,

³² tara paluluda kikai baaili numiane kaikameane patueelre kai hulrice.”