Tapelane Drekase 10 - Ngudradreadrekadhane Ka Sisiu 魯凱語聖經

Twapela tarumara ku padradrekase ku Musi

¹ “Sakabilrilinga, ku Tamatama la kawriva nakwane, ‘Kusu tulrenega ku drusa ku lrenege ka alibi, tuthadalrane kwidra ki siaswalane, la darepa ku vaeva ka angatu ka Langiane ku tapwane ki alibi. Kusu mulregelrega, kela kai nakwane.

² Lri malra kwidra samakaketeketane ka pinacasane pibelenge kwidra ki cagecagesu pawtatiki ka drusa ka lrenege ka alibi tupela pibelenge pacase. Kusu malra pudriadringai pwa ki angatu ka Langiane.’

³ “La arakaiyaku ku bwaburavane ka paela ka angatu tu Langiane, la tulrenege ku drusa ku alibi, tuthadalrane ki siaswalane; la ilukaku kwini drusa ka alibi si mulregelrege.

⁴ Kudra sa ikai numi lregelrege isarubu, ku Tamatama la twalai ki kelrabe kawriva pelaela numiane ku taimangealane ka padradrekase. Wamalra kikai padradrekase peela pacase pibelenge ki alibi, ala patarumara nakwane.

⁵ La ngibangulaku siwlri mulrawdru, si pangimia ku tadrekasane ki Tamatama malra kikai drusa ka alibi sekete puadringi ki Langiane ka angatu, pakeela kaikameane tapikaiyaneana adringi.”

⁶ (Ku swa Iseraylri twalai kwini ki dralremedreme ki swa Yakange katwase, la daruru Museruthe. Ku Arungu la pacai ikai kwini, si kidralreke ikai kwini. Ku lalakeini ka Ilriazare la mucungulu iniane abarakalai.

⁷ La katwase ku swa Iseraylri kwini, la daruru Gudeguda, ala katwase daruru Yutebatha; kikai madrau ku cebe ki acilai.

⁸ Sa ikai lregelrege Hurebe, ku Tamatama la pilri sikawlu ki swa Lrivi ka zuku kamani ku wabaca ku Langiane, si abarakalai kipuawngane, la pangukai ki naganeini subulrubulru. Pakela kaikameane, ku lagagane ki Lrivi sakamiana ka amani ku kiapuawawngane kikai awngane.

⁹ Lakamani kwidra, ku zuku ki swa Lrivi la kai mia ki drumane ka zuku ikai ku kadaengane lini; kwini lalasu pasusu ku tapuvagane palraingi ki Tamatama ka Twaumase numi, si kisupisupilri ku tamuesadhane lini si tacekecekelane ki Tamatama.)

¹⁰ “Mia ku paswalala, la ikaiyaku lregelrege maka masupatele ku vai si maungane; ku Tamatama la peelana kilalra ku takitubianeli, si palraingi kai amudu liniane.

¹¹ Wadrekase nakwane, lu sangiluka liniane katwase, lanu maka drikisi kwini abaadhane ki cucungulane numi kavai kadaengane.”

Murikai ki Twaumase

¹² “Kunumi ka swa Iseraylri! Kilalra ki Tamatama ka Twaumase numi ku murikaini numiane. Kunumi musakena mukuludru ki Tamatama ka Twaumase numi, pasusu sanaka padradrekaseini. Savaeva ku kidremedreme si gathimi numi kilibake iniane, pasikai iniane kaungu,

¹³ pasusu sanaka hulrice. Pakai ku amuesadhane numi, kaikameane peaelaelaku numiane kai hulrice ki Tamatama.

¹⁴ Kai belenge si abebeelengeana ka belenge Tamatamane; la mialri kikai kadaengane si sanaka manemanenga Twaumasane.

¹⁵ Ku Tamatama kialibake ki cucungulane numi, lakamani ku pilrini numiane, la kai pilri ki drumane ka minzuku, tukawkawluini. Pakeela kaikameane, kunumi thadaalraneana numi ka pilrini ka kawkawluini.

¹⁶ Lakamani twalai kaikameane, kunumi mwalra kwini yakai ki kidremedreme numi ku ngialisiane si pasalaladha ki Tamatama, madha kakelraelrathenga.

¹⁷ Ku Tamatama ka Twaumase numi Twaumase ki sanaka twaumase, Tamatama ki sanaka tamatama. Amanini ku sanianiangenga, ka sapupukuanenga, lri tara ka amani ku kia musakene ka Twaumase. Kai lri apakaelaela, kai lri kikakadra malra ku pavangalre.

¹⁸ Pasiakai ki pakulrulrulu ki walibakane ku asidrurwane lini, la kilibake kwini ki la singibadhane ku yakai numiane, si baai ku laakaneane asilaimadhane lini.

¹⁹ Lakamani kwidra, kunumi arakaiya ku thalradhane kilibake kwini ki la singibadhane, asi lwiyane sa ikai numi Izipiti mialri numi ka singibadhane.

²⁰ Kunumi musakena mukuludru ki Tamatama ka Twaumase numi, marasikai iniane. Tukapatengatengana kwini kidremedreme numi ki Twaumase, kathane ku naganeini ka apangukaiyane numi kiketekete.

²¹ Kunumi drengedrengera iniane, asi lwiyane amanini ku Twaumase numi; patakamacamaaca numi drele ku tapasikaiyane numiane pangimia ku matiasamali ku awngane.

²² Ku cucungulane numi sa tawmwamwa ka Izipiti tamapipiitulu si kathane, ai kikainga, ku Tamatama ka Twaumase numi parwa edhale drima ku umawmase numi mia ki latariau subelebelenge ku kalrane.”