Tamagarange 9 - Ngudradreadrekadhane Ka Sisiu 魯凱語聖經

Abimileke

¹ Ku Abimileke ka lalake ki Gidiunge wamwa ka Sekeme, mwa ikaikai ki labetakane ki tinaini; kwi lasu amanimani ki lalasu si latumuini makanaelre,

² ku akivagane ki swa Sekeme iya kai, “Anika aneane amiamia numi kulri rathudu numiane? Lrika amani kwini tamapitulu ka lasawvalai ka lalalake ki Gidiunge? Lri tangeangea? Ngulringava, kwaku ka Abimileke amaniaku ka retesane ka erai numi.”

³ Kwini latamaini la ngitalikaiyane iniane kivavaga ki swa Sekeme; ku swa Sekeme la kalrithethe ku twapapalra ki Abimileke; asi lwiyane kwi lasu lritudrane lini.

⁴ Kwini lalasu la patwalai ki biu ki Baale Berithe malra ku mapitulu ku gingi si baai ki Abimileke; kwi lasu la arakai kikai paisu dawlu ku tangea ka tara acaicaicali tupapapalra iniane.

⁵ Kwi lasu la siwlri mwa ka Upera ki tamaini, la ikai ki maadrau ka lrenege malra ki tamapitulu ka sawvalai ka lalalake ki Gidiunge, ka mialri ka labetakaneini, nguelre papacai. Ai kudra agiaginga ku lalake ki Gidiunge ka Yuthame la kibalai, kai kiapapacai.

⁶ Ku swa Sekeme makanaelre si swa Bithemilu ngiaelre, la ikai ki thili ki tharialupu ka angatu, si pacegecege ki Abimileke tutalialalai.

⁷ Ku Yuthame sa kilalra kikai kwidra la katwase mwa ka lregelrege Girizime, si acegecege ikai belenge ki pangunguthuru ki lregelrege, akwadrau tawtau liniane, “Swa Sekeme, kunumi kilalraili, ku Twaumase lri kilalra numiane!

⁸ Kunadruma, kudra la angatu pasana cegecege ku tangea ku talialalai. Kwini lalasu la kawriva ki ulrive, ‘Ala atalialaladha naiane.’

⁹ Ku ulrive la tubalre, ‘Lalri pisadraku kai tulawlawnga ku ulrive ku sapatarumaramarane ki latwaumase si abadhane ki laumawmase si katwase rathudu numiane?’

¹⁰ Ku laangatu la kawriva ki icizike ka angatu, ‘Ala atalialaladha naiane.’

¹¹ Ku icizike ka angatu la tubalre, ‘Lalri pisadraku kai pumadrunga ku sangwaesai ku lamadru si mwa rathurathudu numiane?’

¹² Ku laangatu la kawriva ki budu, ‘Ala atalialaladha naiane.’

¹³ Ku budu la tubalre, ‘Lalri pisadrangaku ku atubavane ku murikai ki latwaumase si laumawmase, si mwa rathurathudu numiane?’

¹⁴ Ku laangatu la kawriva ki cecenekane ka angatu, ‘Ala atalialaladha naiane.’

¹⁵ Kwini cecenekane ka angatu la tubalre, ‘Lwiyasi ka twakapatengatengane numi tapacegecege tutalialalai iya nakwane, ani bwala satalwaili mulrilriane, la nau kamani ka palakebe numiane; lu kai ngimia kwini, kai lacenekeli lri kudalai, si lama pakawtu ki cedare ka angatu ki swa Lebanungu.’ ”

¹⁶ Ku Yuthame la pacungulu kawriva, “Kaiasasane, kunumi twakapatengane numi tutalialalai ki Abimileke? Ngwalringalringauana numi ki Gidiunge, si singikai ku takaunganeini kilibake ki wacekecekeleini?

¹⁷ Kunumi ngulringava kudra tapasikaiyane numiane kikaruburu ki ama; palraaingi ku apacadhane pakai ku apalribulane numiane katwase kikaruburu ki swa Midiange.

¹⁸ Ai, kaikameane kunumi la baebalrenga numi ki wacekecekele ki ama; la pikai numi ki vaeva ka lrenege si papacai ki tamapitulu ku sawvalai ku lalakeini. Amani kai lalake ki sasiakawlu ka ababai ka lalakeini ka Abimileke saka lritudrane numi, lakamani ku cegecege numi iniane tutalialalai ki swa Sekeme.

¹⁹ Lwiyasi kikaikameane ala ka twakapatengatengane numi pangimia kai ki wacekecekele ki Gidiunge, lri subulrubulruaku numiane si Abimileke anu kiraragai makanaelre;

²⁰ lu kai ngimia kwini, ku Abimileke ani pwa lama ki swa Sekeme si swa Bithemilu, la mialri ku swa Sekeme si swa Bithemilu lama ki Abimileke.”

²¹ Ku Yuthame mwakuludru ki takaini ka Abimileke, la katwase mubere mwa ka Bire, si ikainga kwini.

²² Ku Abimileke taratulru ka caili rathudu ki swa Iseraylri.

²³ Sakabilrilinga ku Twaumase la pwa makakabadha ku Abimileke si Sekeme, ku swa Sekeme la baebalrenga ki Abimileke.

²⁴ La ngimia kikai, ku Abimileke si kwini pakakecenge iniane si papacai ki tamapitulu ka lalalake ki Gidiunge ka swa Sekeme mwacugu makanaelre.

²⁵ Ku swa Sekeme ku umawmase palepenge ikai lregelrege, ku apapacadhane ki Abimileke, si ravase sanaka ngwakakai kwini ki kadalranane ku umawmase. Yakai ku umawmase ku wamalra kikai tangimiane si pelaela ki Abimileke.

²⁶ Ku lalake ki Ibede ka Gale si labetakaneini ka sawvalai la kela Sekeme; ku swa Sekeme la makitu sudralru iniane.

²⁷ Kwini lalasu la mwa babudwane kibudu, si thalre ku bava, la pangitaleke. Kwini lalasu la mwa ki biu lini, ikai kwini kanekane ungungulu, si pusupusu ki Abimileke.

²⁸ Ku Gale ka lalake ki Ibede la kawriva, “Kunai ka swa Sekeme manemane nai ka umawmase? Manemane si lri marasikaikai nai ki Abimileke? Kwini lasu aneane? Kathane ku takalalakane ki Gidiunge! Ku Zebule sasiakawluini sikakathane. Manemane si lri marasikai nai iniane? Kunumi la tupapalra ki cucungulane numi ka Hamure ka tama ki swa Sekeme, amanini ka pacegecege ki zuku numi!

²⁹ Anaka amaniaku ka wasangiluku kai ki mapapangale! Lri mwalraku ki Abimileke! Lri pelaelaku iniane, ‘Padrimaana kwini kwapingisu, si kainganai kikaruburu.’ ”

³⁰ Ku tamatama ki cekele Sekeme ka Zebule la kilalra ku vaga ki Gale, la kalisi turamuru.

³¹ La sikawlu ku umawmase mwa Aruma si pelaela ki Abimileke, “Ku lalake ki Ibede ka Gale si labetakaneini ka sawvalai la kela Sekeme, pwatata ki laumawmase cekele kiecebe muswane.

³² Lakamani kwidra, kusu takamaungana sangiluku ki lakwapingisu si lepenge ikai lrilringulu cekele,

³³ luiya lukamialrealre, sana kaliare mwa mucekele. Ku Gale si laumawmaseini sana mulatadre kidresenge kikaruburu, pakaelreea ku kwapingisu kikaruburu pakiangeange iniane!”

³⁴ Ku Abimileke la takamaungane sangiluku ki kwapingini la tu taisupatane, lepenge ikai lrilringulu Sekeme.

³⁵ Ku Abimileke si kwapingini sa drele ki Gale ngibwale, acegecege ikai lrawlrawdru cekele kwini lalasu, la twalai ki talepengane ngibwale.

³⁶ Ku Gale sa drele, la kawriva ki Zebule, “Drela, yakai ka twalai lregelrege mulrawdru kela!” Ku Zebule la tubalre, “Kavai yai kaika umawmase, umawmase amiasu ki alalingu ki lregelrege!”

³⁷ Ku Gale la kawrivana, “Drela, yakai ka umawmase ka ngwakakai ki lregelrege kainganai mulrawdru; la ikai ka drumane ka sakaredele ka twalai kwidra ki ‘Takiadhadhamane ka tharialupu ka angatu’ ka kadalranane!”

³⁸ Ku Zebule la kawriva iniane, “Kaisu pasialribatenga turamuru ka ngiakakadraedraedrangelre? Naamiasu kikai, manemane si kunai si marasikaikai ki Abimileke; kikai laumawmase amani ku sidrekasesu. Kaiasasane, lu katwasa kikaruburu!”

³⁹ Ku Gale la sangiluku ki swa Sekeme katwase kikaruburu ki Abimileke.

⁴⁰ Ku Abimileke la saladha ki Gale, la mubere ku Gale; ku kiapapacai kia pakapilai takalra turamuru, maabate darudarurunga ki lrawlrawdru ki cekele.

⁴¹ Ku Abimileke yakaikai ka Aruma. Ku Zebule la malra ki Gale si labetakaneini ka sawvalai makanaelre pakatwase ka Sekeme, kai palrainginga liniane ikai kwini.

⁴² Sakakaiyane, ku Abimileke wathingale ku apangimiane ki swa Sekeme katwase mulrilringulu ki cekele,

⁴³ la malra tu taitulrwane ki kwapingi, si lepenge ikai lrilringulu. Kwini lasu sa drele ikai ku mapapangale ku matwatwase ki cekele, la twalai ki talepengane ngibwale, si papacai liniane.

⁴⁴ Ku Abimileke la sangiluku ku taingeane ka kwapingi mwa kwini ki taelelebane ki cekele; ku drumane ku kwapingi la mwa latadre ki cekele, nguelre papacai kwini ki yalatadre ki cekele ku mapapangale.

⁴⁵ Ku Abimileke la makavaale kikaruburu, ala malra kwini ki cekele, papacai ki laumawmase ki cekele, pakaburuku kwini ki cekele, si sabulu ku timu pikai daedae.

⁴⁶ Kudra yakai ki kepale Sekeme ku lakiacapili sa kilalra kikai kwidra, la katwase kibalai mwa barungulane ki biu ki Ile Pirize.

⁴⁷ Yakai ku umawmase ku wamalra kikai tangimiane pelaela ki Abimileke,

⁴⁸ kwini lasu la sangiluku ku kwapingi kela ka lregelrege Zalemungu. Kwini lasu la malra ku kumugu pulebe ku vaeva ku maadrau ku ricingi ki angatu, si angeale, angeala la iya kwini ki lakwapingi.

⁴⁹ Kwini laumawmase la makitu pulebe ku vaeva ku tadradrau ku angatu, si tupapalra ki Abimileke, malra kwini ricingi ki angatu abate thalringulu ki barungulu daedae. Kwini lalasu la lama kwini ki barungulu, ku yadringi ki kepale Sekeme ku laumawmase la pacai makanaelre, ku sawvalai si labaibai ikaai ku takudrulu.

⁵⁰ La parukaiyana, ku Abimileke wakela Thebeze, lringulu kwini ki cekele, si kikaruburu malra kwini ki cekele.

⁵¹ Ikai kwini yakai ku taluvaale ku makecenge ka nitudaanane; ku laumawmase ki cekele makanaelre, adravane ka sawvalai ka ababai, paelre ki lakiacapili, makitua mubere mudaane. Kwini lalasu la elebe kwini lrawlrawdru, si lrabwale mwa cavalri.

⁵² Ku Abimileke la malra kwini ki daane, mwa ki lrawlrawdru si pwa lama kwini ki daane.

⁵³ Yakai ku tangea ku ababai ku wacilri ku vaeva ku tapasilribulribuane ka lrenege, la makakai ki awlruini, si cwake ki awlruini;

⁵⁴ kwini lasu la kisaswarau makakaai dawlu kwini ki tara ececenge ku sakikaruburuburaneini ka langukathabarane, si iya kai iniane, “Sudra kwini lrabu la papacai nakwane! Malrasaku, kiapapacai ki ababai luiya ku laumawmase.” Kwini langukathabarane ka taramarasikai iniane la ara vavale culrulu iniane, kwini lasu la pacai.

⁵⁵ Ku swa Iseraylri sa drele ki Abimileke sa pacainga, la makitu siwlri mubalriu.

⁵⁶ Kikai, ku Twaumase pawacugu ki Abimileke kwidra tapangimiane ku ngialisiane ki tamaini, asi lwiyane amani kwini lasu ku papacai ki tamapitulu ka labetakaneini.

⁵⁷ Ku Twaumase mialri pakwalri ki swa Sekeme ngwalai ki pasalrivane lini. Kudra pusu kaelaela ki Yuthame ka lalake ki Gidiunge la mialri ngimianga.