Tamagarange 8 - Ngudradreadrekadhane Ka Sisiu 魯凱語聖經

Pamalebe ki swa Midiange

¹ Ku swa Iparaime la kawriva ki Gidiunge, “Sa kikaruburusu ki swa Midiange, asu kai dawlu naiane? Asu pia kikai naiane?” Kwini lalasu la pangicaeme kaelaela ki Gidiunge.

² Ku Gidiunge la pelaela liniane, “Ku adulrwaneli kai lri maka kiramau ku tapangimiane numi; kunumi ka swa Iparaime ku siludunga numi ku labudu silrialribate ki tathaithaithariri ka budu nai ka swa Abiezere!

³ Ku Twaumase wamalra ki tinutamatamane ki swa Midiange ka Urebe si Zebe pwa ki alrima numi; ku tapangimianeli tumane pakiramau?” Kwini lalasu sakilalra kikai vaga ki Gidiunge la kai kirimunga kalisi.

⁴ Ku Gidiunge wasangiluku ku ta 300 ku umawmase kela kadravane Yuredange, talubalre ki drakerale; adravane kwini lalasu makitu kidulrunga, thadalraneana saladhaladha ki badha.

⁵ Kwini lalasu la kela Sukuthe, ku Gidiunge la kawriva kwini ki laumawmase ki cekele, “Ala baadha ki lakwapingili ku pange, kai lalasu kiadulrunga turamuru. Kikai wasaladhaladhaku ki talialalai ki swa Midiange ka Zeba si Zalemuna.”

⁶ Ai ku tarasangililuku ki swa Sukuthe la kawriva, “Lri tumane nai baai ku akaneane ki kwapingisu? Kwini kaisu maka pwalrana ki Zeba si Zalemuna!”

⁷ Ku Gidiunge la kawriva, “Lu mia kwini! Ku Tamatama lu malranga ki Zeba si Zalemuna baai nakwane, lri arakaiyaku ku cecenekane ka angatu calragulragu lrumai numiane.”

⁸ Ku Gidiunge la aru cucubungu katwase, kela Penuile, la papia ki swakai kwini kathadaalrane ku kitubini. Kwini swakai kwini ku tatubalreane lini la mararaamau ku tatubalreane ki Sukuthe.

⁹ Lakamani kikai, ku Gidiunge la kawriva liniane, “Lri tara udringadringadhaku siwlri, lu kamaninga kwini, lri burukaku kikai cekele!”

¹⁰ Kwidra, ku Zeba si Zalemuna ku kwapingi lini taelre ikai Karekure. Palraelre kwini ki calragulragu ubulane kathanenga kudra la tedrane ka papilapiladhanenga ka kwapingi ikai ku ta 15,000, ku wapacainga ta 120,000.

¹¹ Ku Gidiunge la luludu ki babiabila ki tali talrawane Nuba si Yugebiha kwini kadalranane katwase papucucubungu, si pangitutuluku kikaruburu ki kwapingi lini.

¹² Ku tadrusa ku talialalai ki Midiange, Zeba si Zalemuna, mwaberenga; la saladha ku Gidiunge liniane, si ravase liniane, kwini lalasu la sarawnga kasuburu.

¹³ Ku lalake ki Yuase ka Gidiunge sa kelanga twalai ki takikaruburane, ngwakakai kwini ki salralriwgu ka Hirese,

¹⁴ la pwalra ku tangea ku langukathabarane ki swa Sukuthe, la kivavaga iniane. Kwini lasu la pacase kudra la nagane ki tarasangililuku ki swa Sukuthe si laciwru baai ki Gidiunge, paelreelrenga ta 77.

¹⁵ Ku Gidiunge la mwa ka Sukuthe, la kawriva kwini ki laumawmase ki cekele, “Ngwalringauana numi kudra nakai ka taparalubane numi naiane? Kaisu wamalra ki Zeba si Zalemuna amia numi, lakamani kwidra kaika baai numi naiane ku akaneane ki mwabaisinga ka kwapingi. Kikai asasane drela kunumi, kikai lalasu yakai kai!”

¹⁶ Ku Gidiunge la arakai ku cecenekane ka angatu calragulragu ubulane lrumai pathavungu kwini ki tarasangililuku ki swa Sukuthe;

¹⁷ la mialri pakaburuku kwini ki cekele ki Penuile, si papacai kwini ki laumawmase cekele.

¹⁸ Ku Gidiunge la kivavaga ki Zeba si Zalemuna, “Kudra papacai numi ikai Tabure ku umawmase ngitwatumane ku tangimiamiane?” Kwini lalasu la tubalre, “Ngiamia muswane, mia ki lalake ki talialalai makanaelre.”

¹⁹ Ku Gidiunge la kawriva, “Kwini lalasu retesane nai, thadalrane kudra twalalake naiane. Lri kiketeketaku ki Tamatama, lwiyasi ka kai numi papacai liniane, kainaku lri papacai numiane.”

²⁰ Ku Gidiunge la kawriva ki eapeini ka lalake ka Yethere, “Lu pwa papacai liniane!” Ai ku Yethere makiwcu, kai kirimu sudru ku lrabu, asi lwiyane kwini lasu vavalakeana.

²¹ Ku Zeba si Zalemuna la kawriva ki Gidiunge, “Kamania ka pwalrima! Kathanesu ka yakai ku puku.” Ku Gidiunge la papacai liniane, la malra kwini yakai ki lre ki lrakeda ku sapangiragelanane iluku.

²² Sakabilrilanenga, ku swa Iseraylri la kawriva ki Gidiunge, “Ala kamania ku tararathurathudu naiane; kusu si lamwabaibalrithi muswane anikamani ku tararathudu naiane, asi lwiyane kikai amanisu ka palribulu naiane pakidaili ki swa Midiange.”

²³ Ku Gidiunge la kawriva, “Kainaku lri kamani ku tararathudu numiane, la mialri kai lalakeli kai lrika tararathudu numiane. Ku Tamatama lrika amani ka warathudu numiane.”

²⁴ Kwini lasu la iya kai, “Ku akitubianeli numiane vaeva, ala badhaili kwini la malra numi kwini lalridingi.” (Ku swa Midiange mia ki swa calragulragu ka laumawmase, ka silrilridingi ku kingi.)

²⁵ Ku mapapangale la tubalre, “Palraingi nai baai muswane.” Kwini lalasu la sagai ku vaeva ku palimemelre, kwini laumawmase la malra kwini ravase lini ku lridingi cilri pubelenge.

²⁶ Ku Gidiunge kwini sarubuini ku lridingi ku telregane wadaruru ki mapusale ka kukingi, la ikai ku drumane ku la sangiragelanane ki talialalai ki swa Midiange, sisilu, thilalatadhane ka laimai, la ikai ku saulrungane ki lrakeda.

²⁷ Ku Gidiunge la arakai kikai lakingi darepe ku vaeva ku samiamiange, la pikai ki cekeleini ka Upera. Sakabilrilanenga ku swa Iseraylri la makitu cilri ki Twaumase, si mwa kwini sukubu kwini ki samiamiange; kikai lakamaninga kudra paualrubange ki Gidiunge si wacekecekeleini.

²⁸ Lakamiyaiya kikai, ku swa Iseraylri la pamalebe ki swa Midiange, kai maka pawkuludrunga liniane. Ku Gidiunge ku taikaiyane kawmasane, kwini lacekele masulivaliivate taramasupatele ka caili.

Tapacadhane ki Gidiunge

²⁹ Ku Gidiunge sa tulrepengenga isadranga ku awnganeini si siwlringa mubalriu, ikai tavanane.

³⁰ Kwini lasu tamapitulu ku lalalakeini, asi lwiyane takalra turamuru ku lataelrelreini.

³¹ Kwini lasu la ikaiyana ku labaibaini ikai Sekeme; kwini alisu la mialri tulalake ku sawvalai, ku Gidiunge la sunagane iniane pasi Abimileke.

³² Ku lalake ki Yuase ka Gidiunge la alikai ku niakeini, si kidralreke ikai tali Upera ki Abiezere ka zuku, yakai ki takidralrekane ki tamaini ka Yuase.

³³ Sapacainga ku Gidiunge, ku swa Iseraylri la kidailinga ki Twaumase, si mwa ki Baale. Kwini lalasu wamalra tutwaumase lini ki Baale Berithe.

³⁴ Kai sukusukubunga ki Tamatama ka amani kudra napalribulu liniane kidaili ki la ngiathalringulu liniane ka labadha.

³⁵ Kwini lalasu la mialri kai ngwalalainga kudra natapangimiane ki Gidiunge ki swa Iseraylri kudra mathariri ku awngane si tuthariri ki wacekecekeleini.