Tamagarange 7 - Ngudradreadrekadhane Ka Sisiu 魯凱語聖經

Ku Gidiunge pamalebe ki swa Midiange

¹ Yakai saka minakavalane, ku Gidiunge si kudra twapapapalra iniane makanaelre sakamialrealre la ngidrakalenga, si pikai ki babiabila ki tuturu ka Harude cegecege ku takwapingane lini. Ku taikaiyane ki kwapingi ki Midiange la ikai ki valrwalru, italikai ki tali dradha lini, adethe ka lrelrelrege ka Mure.

² Ku Tamatama la kawriva ki Gidiunge, “Takaalranga turamuru kikai laumawmase kai twapapapalra muswane; lwiyasi la paakaciaku liniane ki swa Midiange, kwini lalasu arakai nai ku puku nai pamalebe lai lri iya.

³ Kusu la pelaela ki mapapangale, ‘Aneane ku mwakuludru, ani katwase siwlri mubalriu; lri asusuru nai ikai kikai lregelrege Gileade.’ ” Ala sa iya kwini la ikai ku ta 22,000 ku umawmase ku matwase siwlri mubalriu, ai yakai ku ta kudraiyana ku umawmase ku asurwana.

⁴ Ku Tamatama la kawriivanga ki Gidiunge, “Kikai twapapapalra muswane tapangaleana turamuru. Iluka liniane pwa ka babiabila ki aciacilai; lri ikaiyaku kikavai pasikai muswane apatatukudha liniane. Lwiyasi la pelaelaku muswane kikai umawmase kai lri tupalra muswane lrika amani ku wadulru tupalra muswane, kwini lasu lri dulru tupalra; lwiyasi kai lri maka tupalra kikai umawmase lu iyaku, kai lri maka tupalra kai lasu, kwini lasu kai lri maka tupapalra.”

⁵ Ku Gidiunge la alra kwini ki twapapalra iniane ka laumawmase iluku pwa babiabila ki acilai; ku Tamatama la kawriva iniane, “Kusu malra kwini ki mia ki tawpungu pangududu ungulu ku acilai si kudra ki wapidruru ungulu ku acilai ku umawmase malra patatukudha.”

⁶ Lri ikaai ku ta 300 kudra ara alrima si ungulu, ku drumane la makitu pidruru ungulu.

⁷ Ku Tamatama la kawriva ki Gidiunge, “Lri arakaiyaku kikai la ara alrima si ungulu kai acilai ka ta 300 ka umawmase si palribulu numiane, malra ki swa Midiange pwa ki alrima numi; kwini ki drumane pakatwasanga liniane pawbalriu.”

⁸ Ku Gidiunge la pasurunga kwini ta 300 padrangalru kwini ki la sarakaiyane ka lawbubulu si larapa ka lawngu, masivagavagadha mubalriu la iya kwini ki drumane. Kudra taikaiyane ki takwapingane ki swa Midiange la ikai tai lrawdranane liniane ki valrwalru.

⁹ Ikai kwini ki vaivai sakamaungu, ku Tamatama la drekase ki Gidiunge, “Ngidrakala! Si mwa mulrawdru kikaruburu ki takwapingane ki swa Midiange; lri malraku liniane pwa ki alrimasu.

¹⁰ Lwiyasi ka kadrwa ku garangane numi kikaruburu, kusu paswala iluku ki sasiakawlusu ka Pura mulrawdru mwa ki Midiange.

¹¹ Lasu kilalalra kwini makawrivariva lini, lri ikai kudra garanganesu mwa kikaruburu.” Ku Gidiunge la mailuku ki sasiakawluini mulrawdru mwa kwini ki babiabila ki takwapingane ki badha.

¹² Ku Midiange, Amaleke si swakai tali calragulragu kudra lazuku alraelre kwini ki valrwalru; mia ki twaredelane ka apapawku ku pangalane; kudra lrakeda lini ki kalrane mia ki enai babiabila ki laveke ku kalrane.

¹³ Sa darurunga ku Gidiunge, la kilalra ikai ku umawmase ku peaelaelaela ki redelaneini ka kwapingi kudra sipini sakamaungu. Kwini lasu amia kai, “Wasipiaku ku vaeva ku maadrau ku mugi ka pange la mutukwi mudaane ki takwapinganeta ka swa Midiange, si lrudrulu ki balrawbau, la mukadrulu ku balrawbau, si isarare ikai ki daedae.”

¹⁴ Kwini redelaneini la tubalre, “Kwini yai lrabu ki Gidiunge ka lalake ki Yuase ka swa Iseraylri kadrwa ku drumane ku patharevane; ku Twaumase wamalra ki Midiange si kuta ka lakwapingi demedeme pwa ki alrima ki lasu.”

¹⁵ Samaka kilalranga kwini sipi kwini ki umawmase si swacengenga, ku Gidiunge la pidruru si sukubu ki Twaumase. Kwini lasu la siwlri mwa ki takwapingane ki swa Iseraylri, la iya kai liniane, “Ngidrakala! Ku Tamatama wamalranga ki swa Midiange pwa ki alrima numi!”

¹⁶ Ku Gidiunge la malra kwini ki rathuduini kwini ta 300 tu taitulrwane ku kemiane, la pasa vavaeva liniane ku rapa si kindralumu, la piadringi ki kindralumu padalai ku taliwlare.

¹⁷ Kwini lasu la pelaela liniane, “Lu darurungaku ki babiabila ki takwapingane ki badha, kunumi la dredrelaili, lu pangitumanaku, kunumi tupapalraili pangimia.

¹⁸ Kunaku si redelaneli lu ngirapapa nai, kunumi ikaiya kwini ngithalringulu ki takwapingane makitu ngirapa, si karaleale iya kikai, ‘Pasikaiya ki Tamatama! Pasikaiya ki Gidiunge!’ ”

¹⁹ Ku Gidiunge si kwidra sangilukuini kudra taidai ku umawmase, sakaiyana ka kabiceacelrakane, sa maubalribalrithinga kudra wakadrenge ku kwapingi, la daruru kwini ki babiabila ki takwapingane. Kwini lalasu la pangirapa, lrumai pakacacwake kwini ki kindralumu;

²⁰ kwini drumane ka taidrusane ka kemiane la patwalrau ku tapangimiane. Kwini lalasu ara viri cidingi ku taliwlare, ku vanale la ecenge ku rapa, si makakawkau, “Pasikaiya ki Tamatama papacai ki badha! Pasikaiya ki Gidiunge papacai ki badha!”

²¹ Kwini lalasu la ikai kwini ngithalringulu ki takwapingane kadrekadrenge ku taikaiyane lini; kudra labadha la makitu amamanga karaleale katwase mawbebere.

²² Kwini ta 300 ka umawmase ki Gidiunge sa pangirapapa, ku Tamatama la pamapapacapacai kwini ki labadha. Kwini lalasu la katwase mubere papia tali Zerera, mubere daruru kavai Bithe Sita si adethe kavai Tabathe ka Abele Mehula.

²³ Ku swa Napetali, Asere si Manase palraelre ka swa Iseraylri la kidawlu kela saladha ki swa Midiange.

²⁴ Ku Gidiunge pasiakawlu ku umawmase mwa ka lregelrege ki Iparaime alraelre, si kawriva liniane, “Bwala mulrawdra kikaruburu ki swa Midiange. La lepenga ikai ki tatalubalrebalreane ka kadravane Yuredange, pakela kavai Bithebara, telenge kai patalubalre ki swa Midiange.” Ku swa Iparaime la isarubunga, la lepenge kwini ki tatalubalrebalreane ka kadravane Yuredange, pakela kavai Bithebara.

²⁵ Kwini lalasu la ravase ki tadrusa ka tamatama ki swa Midiange ka Urebe si Zebe. Kwini lalasu la papacai ki Urebe pikai ki alrisapesape Urebe, la papacai ki Zebe pikai ki tathalrethalreane ki bava ka tali sapakalriwgu ka Zebe. Kwini lalasu la pacungulwana saladha ki swa Midiange, si malra ku awlru ki Urebe si Zebe iluku mwa ka kadravane Yuredange tali talrawane si baai ki Gidiunge.