Tamagarange 6 - Ngudradreadrekadhane Ka Sisiu 魯凱語聖經

Gidiunge

¹ Ku swa Iseraylri la kirimunga pasalriu ki Tamatama, lakamani ku malra ki Tamatama liniane pwa ki alrima ki swa Midiange tarapitu ka caili.

² Ku swa Midiange sapupukwane ki swa Iseraylri, ku swa Iseraylri la kibalai ikai ki barungulu ka lregelrege ki la tali lregelrege ku takilakebane.

³ Luka tapaivaivadhane ki swa Iseraylri, ku swa Midiange la maelre ki swa Amaleke si kwini tara pagwagu ikai calragulragu ubulane ka zuku kela kikaruburu liniane.

⁴ Kikai labadha la ibalrealreanane liniane si cegecege ku balrawbau lini, la kabebetethe ki lataleke pakela kavai tali lrawdru Gaza. Kwini lalasu la ribici nguelre ku lakiu, lalwange si laruba, kadrwa ku nabebekelanenga ku suru lini ki swa Iseraylri ku lrika akaneane lini.

⁵ Kwini lalasu mia ki apapawku ku pangalane lini, mailuku ku lalwange, labalrawbau kalrungulrungu kela liniane; kudra lalrakeda lini mialri kai asipane ku kalrane. Kwini lalasu la mucekele, si kabebetethe ki cekele palraelre,

⁶ ku swa Iseraylri kai maka kiaecebe. La kitubi ki Tamatama.

⁷ Ku swa Iseraylri sa kitubi ki Tamatama ku akiparalubane kikaruburu ki swa Midiange,

⁸ ku Tamatama la sikawlu ku tangea ku yuginsia mwa liniane, si papia liniane pelaela kudra sapelaelane ka vaga ki Tamatama ka Twaumase ki swa Iseraylri, la kawriva, “Kunaku nawailukaku numiane katwase ka Izipiti, si kidaili ki takipaaduriane ka kadaengane.

⁹ Patwaladhaku ki alrima ki swa Izipiti malra numiane palribulu pulatadre; kunaku la mialriaku palribulu numiane kidaili ki alrima kwini ki aswala ikai kwini ki swa Kanange, sa katwatwase numi arwacucubungu si pakatwase liniane, la malra kwini kadaengane lini baai numiane.

¹⁰ Napeaelaelanga naku numiane, amaniaku ku Tamatama ka Twaumase numi; kunumi madha sukusukubu ki twaumase ki aswala ikai kwini ka swa Amuri. Ai kai numi kialalra nakwane.”

¹¹ Sakabilrilinga, ku sasiakawlu belenge ki Tamatama la kela ki cekele Upera, nene ikai tailebe ki tharialupu ka angatu ki tai Yuase; kwini Yuase yai swa Abiezere ka zuku. Ku lalakeini ka Gidiunge la icengecenge kibubuli ikai ki tatubavabavane silribulribu ku mugi, kai pathingale ki swa Midiange.

¹² Ku sasiakawlu ki Tamatama la ikai kwini adrelane iniane si kawriva iniane, “Garagarange ka sawvalai, ku Tamatama watapalra muswane!”

¹³ La kawriva ku Gidiunge, “Sinsi, alaiyasi ka watapalra ku Tamatama naiane, lanai kipadradresenge kilakikai amatikurwane? Ku cucungulane nai napeaelaela naiane, ku tapangimiane ki Tamatama sangiluku katwase Izipiti, kaikameane, kwini la pinangu Twaumasane ka puku ka palrealrebane lainunga? Ku Tamatama wacilri naiane, si malra naiane pwa ki alrima ki swa Midiange.”

¹⁴ Ku Tamatama la ngibangulu papia ki Gidiunge, kawriva iniane, “Kusu pakaelrea ku sakapukupukwanesu palribulu mukerenge ki swa Iseraylri kidaili ki swa Midiange. Amaniaku ka siakawlu muswane.”

¹⁵ La tubalre ku Gidiunge, “Tamatama, anaku maka dulru palribulu ki swa Iseraylri? Swakaiyaku ki turawramurunga ka zuku ka Manase; laka kadrwa ku takitukucingalrananeli ikai ki tacekecekelaneli.”

¹⁶ La kawriva ku Tamatama, “Lri tara tapalraku muswane. Lri pakadwaisu pamalebe ki swa Midiange, mia ki pamalebe ki tangeangea ka umawmase.”

¹⁷ La tubalre ku Gidiunge, “Lwiyasi la kikiragadhaku muswane, ala badhaili ku sakipawtenganeli, si pathingale ka ngiakakamanisu ka Tamatama kawriva nakwane kikai.

¹⁸ Madha katwatwase kidaili nakwane, nau malrana ku la akaneane si baai muswane.” Ku Tamatama la tubalre, “Lri mukalavaku muswane.”

¹⁹ Ku Gidiunge la thingelra ku vaeva ku tikiane ka kiu, la malra ku mangeale ka kukingi ku milrikinku pia ku kaika nipawsemakane ka pange. Kwini lasu wamalra ku butulu pasukai ki cepenge, la pikai ki palungu ku sasulrwane, si iluku baai ki yakai tailebeane ki tharialupu ka angatu ka sasiakawlu belenge.

²⁰ Ku sasiakawlu ki Twaumase la kawriva iniane, “Malra kwini labeate si kaika nipawsemakane ka pange pubelenge kai ki lrenege, la pwa gugu kwini sasulrwane pubelenge.” Ku Gidiunge la pangimia.

²¹ Ku sasiakawlu ki Tamatama la sege ku alrimaini malra ku ukudru, kwini tali ringaringau ki ukudru sa pungupungu kwini ki beate si pange, la kainganai twalai ki lrenege ku apwi kelrabe, lama ki beate si pange; kwini sasiakawlu la kai adrelanenga.

²² Ku Gidiunge sa thingale kwini dreleini ala ka sasiakawlu ki Tamatama, la kathathiburu mia kwidra si iya kai, “Abebeelengenga ka Tamatama, anaku maka macacucubungu madradrele ki sasiakawlusu.”

²³ Ku Tamatama la kawriva ki Gidiunge, “Asu kasulivalivate! Madha mukulukuludru. Kaisu lri pacai.”

²⁴ Ku Gidiunge la pikai kwini pasikai ki Tamatama cegecege ku taluvale ku tapatarumaramarane, la sunagane “Patarwamara ku sulivatane ka Tamatama”. Kikai tapatarumaramarane yakaiyana ki tali Upera ki Abiezere ka zuku.

²⁵ Kwini sakamaungu, ku Tamatama la pelaela ki Gidiunge, “Malra iluku ku sawvalai ka lwange si drumane ka tarapitunga ka caili ka sawvalai ka lwange ki tamasu si iluku, la buruku kwidra cegecegeini pasikai ki twaumase ka Baale, thiabe pulebe ku tadri ka yathili ki tapatarumaramarane ka ulrudru ki ababai ka twaumase ka Asera.

²⁶ La cegecega ikai ki lrelrelrege pasikai ki Tamatama ka Twaumasesu ku taluvale ku kiatulrepenge nipasudalepane ka tapatarumaramarane, la arakai kwini thiabesu pulebe ka Asera ulrudru tuangatu, la malra kwini sakadrusa ka sawvalai ka lwange pubelenge si tu Lama ka lrisi.”

²⁷ Ku Gidiunge la iluku ku tamangeale ku sasiakawlu, paluludu ku cunu ki Tamatama iniane katwase pia. Kwini lasu mwakuludru ki wacekecekeleini si laumawmase ki cekele, la kai lreme pia ikai ki vaiyane, lakamani sakamaungunga pangimia.

²⁸ Sakakaiyane sakamialrealre, sa ngidrakalenga ku laumawmase ki cekele, la drele ku tapatarumaramarane ki Baale si nipikaiyane thili ku ulrudru ka Asera la tara kipakaburukunga, kudra sakadrusa ka sawvalai ka lwange la pibelenge ki bavane ka tapatarumaramarane si kilamalamanga.

²⁹ Kwini laumawmase la makitu makivagavaga, “Aneane kikai paiya kai?” Kwini lalasu la silape si thingale ala ka lalake ki Yuase ka Gidiunge kamani ku paiya.

³⁰ Kwini lalasu la kawriva ki Yuase, “Malra ki lalakesu pulatadre, nai papacai iniane! Kai waburuku kai tapatarumaramarane ki Baale, la thiabe kadrulu ku yathili ki tapatarumaramarane ku ulrudru ka Asera.”

³¹ Ku Yuase la tubalre kwini ki gwariacane kivaga iniane ka laumawmase, “Tangitalikaiyane ki Baale kidrikisi kawriva si kidredredreme palakebe iniane amia numi? Luka aneane ku pasiakai iniane kidrikisi kawriva, lu kaina kaliare lri tara paacai. Lwiyasi ku Baale ala ka twaumase, nai ngipapalakebe! Asi lwiyane kiaburuku kwini takipatarumaramaraneini!”

³² Twalainga kwini, ku laumawmase la pasi Yeru Baale ki Gidiunge. Asi lwiyane ku Yuase amia kai, “Ani ka Baale ku ngiapapalakebe, takipatarumaramaraneini ka kiaburuku!”

³³ Kikwini, ku swa Midiange, Amaleke, si lazuku ka yaububulane la madredresenge, la talubalre ka kadravane Yuredange, ikai valru Yezerile tutakwapingane.

³⁴ Ku Ri ki Tamatama la ikai ki Gidiunge, la ngirapa kwini lasu, dawlu ki zuku ki Abiezere tupapalra iniane.

³⁵ Kwini lasu la sikawlu mwa ki zuku ki Manase, dawlu liniane kela tupapalra iniane. Kwini lasu la mialri sikawlu mwa ki zuku ki Asere, Zibulungu si Napetali; kwini lalasu la mialri makitu kela maelrelre.

³⁶ Ku Gidiunge la kawriva ki Twaumase, “Lri arakaiyaku muswane palribulu ki swa Iseraylri naamiasu nakwane.

³⁷ Ala kikai, lri sararaku ku laubale ki kiu pikai ki tavelavelatane nai ki mugi, lwiyasi luka mialrealrenga laka kathane ku laubale ki kiu ku walamwane, ku daedae laka meameale, lri thingalaku ala ka lri arakaisu nakwane palribulu ki swa Iseraylri.”

³⁸ La ngimia singibila sanaka taiyaneini. Ku Gidiunge la ngidrakale sakamialrealre, la malra si pe kwini ki ubale ki kiu, ku nipeane ku lamu la suete ki akuvaeva ki kisi.

³⁹ Ku Gidiunge la iyanga kai ki Twaumase, “Ala madha kalisilisi nakwane, ala palrainganaili kingivaaleana kitubi, si pelana arakai kikai ubale ki kiu palalava kingivale. Kikai ani ka amaninga kai ubale ki kiu ka meameale, lani ka lawlamwanenga kai daedae.”

⁴⁰ Kwini sakamaungu, ku Twaumase singiakai pangimia. Sakakaiyane ki mialrealre, ala ka meamealane kwini ubale ki kiu, ku daedae laka lawlamwanenga.