Tamagarange 5 - Ngudradreadrekadhane Ka Sisiu 魯凱語聖經

Senai ki Diburahe si Barake

¹ Kwini vai kwini, Ku Dibura si Barake ka lalake ki Abinuame wasenai kikai senai:

² Drengedrengera ki Tamatama! Ku swa Iseraylri malritheethe ku kiakaruburu, ku mapapangale ngiakakamani sigange akwapingi.

³ Latalialalai, kunumi kilalra! Latamatama, kicacaligira! Lri papiaku ki Tamatama paurugange senai, senadha drengedrengere ki Tamatama ka Twaumase ki swa Iseraylri.

⁴ Tamatama, sana kidailisu lregelrege Seire, sana twalaisu Idume ngidrakale, walingilingi kai kadaengane, waudale subelebelenge, ku ememe wagugu ku udale.

⁵ Ikai cucubungu ka yakai Sinai ka Tamatama ka Twaumase ki swa Iseraylri, ku la lregelrege malalingilingi.

⁶ Ikai ki zidai ki Samegare ka lalake ki Anate, ikai ki vai ki Yaile, ku tara thathakai kai ngwakakainga kikai, ku badhabadha walragawnga katwase.

⁷ Dibura, ku lacekele ki Iseraylri kiacilringa, kadrwa ku natangeanga ku umawmase, pakela ku takelanesu; la kelasu atiatina ki swa Iseraylri.

⁸ Pabalrithi ki latwaumase ku swa Iseraylri, ikai ki cekele la makarururuburunga. Ikai ki tasupate ka kudrai ki kwapingi ki Iseraylri, kadrwa ku navaevanga ku alathare ku navaevanga ku idiri.

⁹ Kai kidremedremeli papia ki tarapadrekadrekase ki kwapingi ki swa Iseraylri, papia ki ngiakakamani sigange akwapingi ki swa Iseraylri. Drengedrengera ki Tamatama!

¹⁰ Kunumi ka ngwakaikai ki lrawlrapungu ka ruba, wanene ikai ki rigi, ka wadadadavace makitu pelaela pasalraelre.

¹¹ Kilalra, ku yakai thili ki dralremedreme mwalrwalru ku labaibai akilalrane ku makakaraleale ku sakiararagai; kwini lalisu matiakaikai ku tapamalebeane ki Tamatama, twalrisisisi ku taakaciane ki swa Iseraylri. Ku kawkawlu ki Tamatama makitwa papia taelelebane ki cekele makakaraleale ku sakiararagai:

¹² Dibura, ngiradhekana! Thudura! Senadha, drumulra papucucubungu! Barake ka lalake ki Abinuame, ngidrakala! Iluka kwini ki la ravasesu!

¹³ Kudra tengatengane pangimia ku kidremedreme ku umawmase wamwa ki lakiacapili lini; ku kawkawlu ki Tamatama mwacucubungu iniane si kipadulru ku akikaruburane.

¹⁴ Kwini lalasu twalai Iparaime kela, mwa ka valrwalru, kabibilrili ki zuku ki Biniyamingi. Yakai ku tarapadrekadrekase ki kwapingi twalai Makire ngibwale; yakai ku kiacapili ki kwapingi twalai Zibulungu mulrawdru.

¹⁵ Ku latamatama ki Isakare twapalra ki Dibura kainganai; wakela ku Isakare, la kela ku Barake; kwini lalasu makitua tupalra iniane mwa valrwalru. Ai ku zuku ki Riwbingi la makaela ku kidremedreme; kwini lalasu malrilrilrikiana.

¹⁶ Kwini lalasu anika taasurane salrilrikudru ki lakiu? Lri kilalra ku sadawlane ki tara agu ki kiu? Unu, ku zuku ki Riwbingi maelane ku kidremedreme; kwini lalasu malrilrilrikiana.

¹⁷ Ku zuku ki Gade yakai tali talrawane kadravane Yuredange; ku zuku ki Dange asuru ibelenge ki varukuru. Ku zuku ki Asere yakai babiabila ki laveke; kwini lalasu asurwana ikai babiabila.

¹⁸ Ai ku zuku ki Zibulungu walreme ki apacadhane ngicacilri ku niake; ku zuku ki Napetali yakai tamakaruruburane palraaingi kikaruburuburu.

¹⁹ Ikai Tanake ka babiabila drakerale Migidu, ku latalialalai makitwa kikaruburu. Ku latalialalai ki swa Kanange kiakaruburu; kwini lalasu la kai mailuku ku lagingi katwase.

²⁰ Ku sapakataleare ka tariau twalai subelebelenge paralubu, walribate subelebelenge kikaruburu ki Sisera.

²¹ Ku acilai Kisunge ngiabawbalrulu. Ku lriau wamalra aludru liniane. Lri aru padrumulraku, si kecengane arwa cucubungu!

²² Kikwini ku rigi lri ngipapalai, ku tapudrapalane wabengebengethe.

²³ Ku sasiakawlu ki Tamatama subelebelenge amia kai, puswa ki Miruze, pangicaema pusu ki swakai kwini ka laumawmase. Kwini lalasu kai wakela paralubu ki Tamatama, kaika wakela paralubu iniane kikaruburu ki magarange ka badha.

²⁴ Ku Yaile ka labaibai ki Hebere ka swa Keni, ikai ki labaibai makikilrilrigunga; ikai ki yakaikai ki balrawbau ka labaibai makikidrengedrengedrengerenga.

²⁵ Ku Sisera paungulaili ku acilai amia iniane, la baai iniane ku mireke; arakai ku tinukucingalrane ku kisi pasukai ku esebe ka mireke si baai iniane.

²⁶ Ku Yaile ku thili ku alrimaini wamalra ku angatu ka sakedrekedre ki balrawbau, ku thili ku alrima la malra ku pangulru ki daikusange; kwini alisu la pangulru ki Sisera, si pakacwake ki awlruini, la palregese ki tali cigiane ki awlruini.

²⁷ Ku Sisera la ngiwkucu, tubakebake, si apece ikai lebe ki drapale ki Yaile; sa lukwane ku Sisera, la tubakebake si pacai.

²⁸ Ku tina ki Sisera la ngulribange masiasirare; kwini alisu salrilrikudru ki nitulrialribangane dredredrele. Kwi alisu la kivaga, ku palridingini ani ngiabalai kai siwlriwlri? Ku rigini anikai kelakela?

²⁹ Kudra la talrilrigili ku lalialini la tubalre; kwini alisu la mialri ngikakawrivariva:

³⁰ Kwini lalasu lri tara ka waribiribici ku lawbubulu, si mavalavalavala ku la ravase lini, ku tangea ku kwapingi kiabaai ku tangea ku tadrusa ku ababai. Ku Sisera wamalra ku papacasane ka laimai; kwini lasu wailuku ku nipacasane ku vurisiki si baai ki taelrelre ki talialalai.

³¹ Tamatama, ku labadhasu ani ka thadalrane kamudu makanaelre! Ku latalrailagisu ani mia ki vai thelare! Kikwini swakai kwini la kasulivalivatenga taramasupatele ka caili.