Tamagarange 4 - Ngudradreadrekadhane Ka Sisiu 魯凱語聖經

Diburahe si Berake

¹ Sa pacainga ku Ihude, ku swa Iseraylri la pasaalriunga ki Tamatama,

² Lakamani ku Tamatama malra liniane baai pwa ki alrima ki talialalai ki swa Kanange ka Yabingi ka warathudu cekele Hazure. Ku tamatama ki Yabingi amani ku Sisera, la sulasulai ikai ki sakamaelanane ka umawmase ka Harusethe.

³ Ku Yabingi piakai ku bangate ka idai ku sakikaruburuburane ku palridingi; kwini lasu matiangeange ka malilisi turamuru, wadredrepete ki swa Iseraylri taramapusale ka caili. Sakabilrilanenga ku swa Iseraylri la kitubi ki Tamatama ku akiparalubane.

⁴ Yakai ku tangea ka ababai ka yuginsia ka sia Dibura; kwini alisu labaibai ki Lapiduthe, yacengecenge ka tamagarange ki swa Iseraylri.

⁵ Ikai kabicelrakane ki lregelrege Iparaime si Bithele la ikai ku vaeva ku abare. Ku Dibura taikaikaiyane kwini ki lrilriane ka abare; ku swa Iseraylri la makitu mwa kwini ki turathudanane iniane.

⁶ Yakai saka minakavalane, kwini alisu la sikawlu ku umawmase mwa ka Napetali ka Kedese cekele dawlu ki Barake ka lalake ki Abinuame, si kawriva iniane, “Ku Tamatama ka Twaumase ki swa Iseraylri wadrekase muswane, ‘Kusu patwaladha ki zuku ki Napetali si Zibulungu sarubu ku takudrai ku umawmase, si sangiluku liniane mwa ka lregelrege Tabure.

⁷ Lri ilukaku ki Sisera ka tamatama ki Yabingi mailuku ku palridingi si kwapingi ikai drakerale Kisunge kikaruburu muswane, ai lri malraku iniane pwa ki alrimasu.’ ”

⁸ Ku Barake la tubalre, “Lu tupapalrasu nakwane, lri mwaku, lu kaisu tupalra nakwane, kainaku lri mwa.”

⁹ Ku Dibura la kawriva, “Unu, lri tupalraku muswane; ai lu pamalebesu lrika kadrwa ku akimatikaiyanesu, asi lwiyane ku Tamatama lri malra ki Sisera baai pwa ki alrima ki tangea ka ababai.” Ku Diburahe si Barake la karedele papia ka Kedese.

¹⁰ Ku Barake la sarubu ki zuku ki Zibulungu si swa Napetali mwa ka Kedese, takudrai ku umawmase ku twapapalra iniane. Ku Dibura la tupalra iniane.

¹¹ Sakamani kwidra, ku Hebere ka swa Keni la ikai kwini ki adethe ka Kedese kwini ki tharialupu ka angatu ka Zananime cegecege ku balrawbau. Kwini lasu lakatwase kidaili ki swa Keni; kwini lalasu mwabaibalrithi ki Huba ka sakadane ki Musi.

¹² Ku Sisera sa thingale ku Barake ala ka matwasenga mwa ka lregelrege Tabure,

¹³ la dawlu pakatwase ku ta bangate ka idai ku palridingi si sanaka kwapingi, pakatwase liniane twalai sakamaelanane ka umawmase ka swa Harusethe mwa ka drakerale Kisunge.

¹⁴ Ku Dibura la kawriva ki Barake, “Ila aru cucubunga, ku Tamatama wasangililuku muswane! Kaikameane, ku Twaumase wamalranga ki Sisera baai pwa ki alrimasu.” Ku Barake la sangiluku ku takudrai ku umawmase twalai lregelrege Tabure katwase mulrawdru.

¹⁵ Ku kwapingi ki Barake sa ngidrakalenga kikaruburu, ku Tamatama la malra kwini ki palridingi ki Sisera si lakwapingini pakalrithavulu. Ku Sidera la mulebe ki palridingi, si tinudadavace katwase mubere.

¹⁶ Ku Barake la katwase kurisi ki kwapingi lini si palridingi, pakela ka badhanane ka Harusethe. Ku kwapingi ki Sisera la kipapacai makanaelre, ka kadrwanga ku natangeanga ku waudripi.

¹⁷ Ku Sisera la katwase mubere mwa ki balrawbau ki Yaile ka labaibai ki Hebere ka swa Keni, asi lwiyane ku Yabingi ka talialalai ki Hazure si tai Hebere matalrailragi.

¹⁸ Ku Yaile la mulatadre kidredresenge ki Sisera, la kawriva iniane, “Tamatama, abwala mudaane ki balrawbauli, asi mukuludru.” Ku Sisera la mudaane; ku Yaile la malra iniane balai pilrilrikudru ki make.

¹⁹ Ku Sisera la kawriva iniane, “Ala paungulaili ku acilai, makadhamaku turamuru” la iya. Ku Yaile la mucaebe ku akuvaeva ki taciladhane ka lrangici ku mireke si baai paungulu iniane, ala sawlri iniane balai.

²⁰ Ku Sisera la kawriva ki Yaile, “Ala acegecega ikai lrawlrawdru ki balrawbau. Lwiyasi ikai ku umawmase ku kiavaga yakai ku umawmase ku yakai kikai iya, kadrwa iyaanga.”

²¹ Ku Sisera la kidulrunga turamuru, la tubakebakenga kasipelrenge ereke. Ku Yaile la malra ku vaeva ku pangulru si sakedrekedre ki balrawbau ka angatu, la ngiabaalai mwa ki thili ki Sisera, la malra kwini sakedrekedre ka angatu si kedrekedre pwa ki tali cigiane ki awlruini, la palregese kela cakena kedrekedre. Ku Sisera la pacai.

²² Ku Barake la kela saladha ki Sisera; ku Yaile la mulatadre kidredresenge iniane, la kawriva iniane, “Abwala mudaana, si drela kikai amani ku silasilapesu ka umawmase.” Ku Barake la kabibilrili iniane mudaane, la drele ki Sisera wapacainga ikai daedae, la ikai ku sakedrekedre ku angatu ku walregese ki awlruini.

²³ Kwi vai kwini, ku Twaumase la papamalebenga ki swa Iseraylri ki Yabingi ka talialalai ki swa Kanange.

²⁴ Twalainga kikai, ku swa Iseraylri la kagaragarangenga, si akacinga ki Yabingi ka talialalai ki swa Kanange, pakela ku ta amudane iniane.