Tamagarange 3 - Ngudradreadrekadhane Ka Sisiu 魯凱語聖經

Kiasuru ikai Kanange ka minzuku

¹ Ku Tamatama la ikai ku nipasurane ku laminzuku ikai kikai ki kadaengane, pakai ku akilrialringavane kwini ki kadrwa ku takilringavane ku tamakakaruburane ikai Kanange ka la swa Iseraylri.

² Ku tangadrane amani ku abulrwane ki mwabalribalrithi ka swa Iseraylri ku akicakwanane kikaruburu, inilringa kwidra kaiyana wamwa ki takikaruburuburane ka laumawmase.

³ Kudra nipasurane amani ku latamatama ki tailrimane ki cekele ki swa Pelisitine si patuelre ki swa Kanange, swa Sidune, si kwini yakai lregelrege Baale Heremungu kela ki tangutikianane ka Hamathe ki Lebanungu lregelrege ka umawmase Hivi.

⁴ Ku Tamatama ku pasuru kikai laminzuku pakai ku akilrialringavane ki swa Iseraylri, si dredrele liniane lulri maka pasalaladha kudra drekase ki Tamatama ki cucungulane lini baaini pangukai ki Musi.

⁵ Ku swa Iseraylri lakamani ku ikai lini ki swa Kanange, Hite, Amuri, Perizi, Hivi si Yebuse;

⁶ kwini lalasu la mathaetharevenga kikai ki laumawmase, si sukubunga ki latwaumase lini.

Uthenile

⁷ Ku swa Iseraylri marimurunga ki Tamatama ka Twaumase lini; kwini lalasu pasalriu iniane, katwase sukubu ki Baale si Asera.

⁸ Ku Tamatama la kalisi ki swa Iseraylri, si malra liniane pwa ki alrima ki talialalai ki swa Mesuputamia ka Kusange Risathaime. Kwini lalasu tara valru ka caili kisikawkawlu ki Kusa Risathaime.

⁹ Sakabilrilane kwini lalasu la kitubi ki Tamatama, ku Tamatama la sikawlu ku tangea ku umawmase kela palribulu liniane. Kikai umawmase amani ku Uthenile; kikai lasu lalake ki Kenaze ka agi ki Kalebe.

¹⁰ Ku Ri ki Tamatama la mulebe mwa iniane, kwini lasu la atamagarange ki swa Iseraylri. Ku Uthenile la katwase kikaruburu; ku Tamatama la malra ki talialalai ki Mesuputamia pwa ki alrimaini, la paakaci iniane.

¹¹ Kikai swakai kai la kasulivaliivate taramasupatele ka caili, pakela kudra tapacadhane ki Uthenile.

Ipude

¹² Ku swa Iseraylri la pasaalriwnga ki Tamatama. Lakamani, ku Tamatama la paka magagarange ki talialalai ka Igelunge ki swa Muabe ki swa Iseraylri.

¹³ Ku talialalai ka Igelunge la maelre ki swa Amune si Amaleke, si pamalebe ki swa Iseraylri, malranga kwini abare ka cekele Yeriku.

¹⁴ Ku swa Iseraylri la kisikawkawkawlu ki Igelunge tara 18 ka caili.

¹⁵ Sakabilrilanenga ku swa Iseraylri la kitubi ki Tamatama, ku Tamatama la sikawlu ku tangea ku umawmase kela palribulu liniane. Kikai umawmase amani kai Ihude; kikai lasu lalake ki Gira ka zuku ki Biniyamingi, kai lasu maviri. Ku swa Iseraylri la sikawlu ki Ipude mwa bulri ku saceacebe si baai ki talialalai ka Igelunge ki swa Muabe.

¹⁶ Ku Ihude la tulrabu ku dramu ka lrabu, ku lragiane pararamau ka mituru, la pakerenge pikai ki vanale ki drapale, si balai pitaiadringane ki laimai,

¹⁷ la iluku ku saceacebe baai ki Igelunge; kwini lasu mabitulru turamuru.

¹⁸ Ku Ipude sa patarumaranga ku acebeini ki Igelunge, lu mubalrivanga la iya kwini ki wabulri ku saceacebe ku laumawmase.

¹⁹ Kwini lasu la siwlriwlri ikai kwini nipapacasane ka lrenege adethe ka Gilegale, la siwlriwlri mwa ka Igelunge, la iya kai iniane, “Talialalai, yakai kai taingeane kai akibubulianeli pelaela muswane.” Kwini talialalai la drekase kwini ki maecebe iniane ka tarakadrenge, “Kunumi katwasa!” Kwini lalasu la katwase muthili.

²⁰ Ikai kwini, ku talialalai la tangeangea nene ikai ki cakarane cavalri; ku Ihude la mwa adethe, la kawriva iniane, “Yakai kai twalai ki Twaumase kai vaga ka apelaelane muswane.” Ku talialalai la ngidrakale.

²¹ Ku Ihude la arakai ku viri sudru ku balaini pikai ki vanale ki drapale ku dramu si culrulu ki barange ki talialalai.

²² La lregese ku dramu matala tawbubane, ku beate la kacipinga ki dramu, ku dramu lalregese ki drelreke. Ku Ipude la pasurunga pikai ki barange ki talialalai ku dramu,

²³ la katwase mulatadre, la pwa elebe ku lrawlrawdru, si sawsi,

²⁴ la katwase kwini. Ku taramarasikaikai sa kela, la drele ka nisawsiane ku lrawlrawdru, lau yalricungu la iya kwini ki talialalai.

²⁵ Kwini lalasu la kawlainga mukalava, ku talialalai la kai muelelebe ku lrawlrawdru, la malra ku sukusuku si muelebe ki lrawlrawdru, kwini lalasu la drele kwini tamatama lini ala apecenga ikai daedae, si pacainga.

²⁶ Ku Ihude sa mukalavalava kwini la taramarasikaikai la katwase mubere. Kwini lasu ngwakakai kwini ki papacasane ka lrenege, si mubere mwa ka Seira.

²⁷ Sa daruru ka lregelrege Iparaime kavai Seriahe, kwini lasu la ngirapa dawlu ki swa Iseraylri katwase mwa ki takikaruburane, si ngikakamani sangiluku ki swa Iseraylri mulrawdru lregelrege,

²⁸ la drekase liniane, “Bwala tupapalraili! Ku Tamatama wamalranga ki badha numi ka swa Muabe baainga numiane.” Kwini lalasu la tupapalra ki Ipude mulrawdru lregelrege, malra kwini tatalubalrebalreane kadravane Yuredange, si telenge ki swa Muabe, kai patalubalre liniane ku naaneanenga.

²⁹ Sakavai kwini, kwini lalasu papacai ku kudrai ka tagagarange ka kwapingi ki swa Muabe, kadrwa ku natangeanga ku mwabere.

³⁰ Kwini ki vai, ku swa Iseraylri pamalebe ki swa Muabe. Ku swakai kwini la kasulivaliivatenga taramavalrulu ka caili.

Samegare

³¹ Sapacainga ku Ipude, ku Samegare ka lalake ki Anate la kamani ku atamagarange. Kwini lasu arakai ku vaeva ku cecenekane ku salrumalrumadhane ki lwange si papacai ki ta 600 ku umawmase ki swa Pelisitine, si palribulu ki swa Iseraylri.