Tamagarange 21 - Ngudradreadrekadhane Ka Sisiu 魯凱語聖經

Wasilape ku lrika taelrelre ki swa Biniyamingi

¹ Ku swa Iseraylri sa ikai ka Mizepa isarubu nakiaketekete ki Tamatama iya kai, “Lutumane kai nai lri pakithareve ki lalake nai mwa ki swa Biniyamingi.”

² Kaiasasane, ku swa Iseraylri wamwa ka Bithele, nene ikai cucubungu ki Twaumase pakela ki maungu, la akwadrau tubi,

³ “Tamatama ka Twaumase ki swa Iseraylri, ani kirimwaini ikai ku ngimiyaiya kikai? Kai swa Iseraylri ani akivalane kikai zuku ki Biniyamingi?”

⁴ Sakakaiyane ki mialrealre, ku mapapangale la ngidrakalenga, la pikai kwini cegecege ku taluvale ku tapatarumaramarane, si patarumara ku Lama ka lrisi si Sulivatane ka lrisi.

⁵ Kwini lalasu la kivaga, “Ikai ki lazuku ki swa Iseraylri, aneaneana ku kai wakela Mizepa icucubungu ki Tamatama isarubu?” (Kwini lalasu nakiaketekete, kudra kai wamwa Mizepa lri kipapacai.)

⁶ Ku swa Iseraylri pakai ki sakacekele lini ka swa Biniyamingi kudra kaika akamudane ku umawmase lini si ngitatasiwlriwlri, la iya kai, “Kaikameane akivalane ku taingeane ku zuku ki swa Iseraylri,

⁷ lri pangitumaneta si pasikai ki tedranenga ka swa Biniyamingi silape ku lrika taelrelre lini? Kiaketeketengata ki Tamatama ku kaika apakitharevane mwa liniane ki lalalaketa.”

⁸ Kwini lalasu la makitu kivavaga kwidra kai wakela Mizepa isarubu ka zuku ki swa Iseraylri, ala thingale ka Yabi ka swa Gileade kadrwa kanatangeanga ku wakela kipaelre sa iruburubu;

⁹ sa sunaganagane ki kwapingi, kadrwa ku natangeanga ku swa Yabi ku yakai kwini.

¹⁰ Kwini mapapangale la sikawlu ku ta 12,000 ku magarange, drekase liniane, “Lu mwa ka Yabi, la malra papacai ki laumawmase, adravane ka labaibai ka lalavavalake demedema papacai.

¹¹ Papacadha sanaka sawvalai, la mialri kudra marudrangenga ku labaibai pwa papacai.”

¹² Kwini lalasu la pikai kwini ki laumawmase ki Yabi kidringai ku ta 400 ku tawvaileketeana, la malra liniane iluku mwa ka takwapingane ka Selu kavai Kanange.

¹³ Ala kirimu, kwini yasarubu siakawlu ku umawmase mwa kikawriva ki swa Biniyamingi ka yakai ki alrisapesape ka Rimungu, pathingale ka palraingi makakadalru.

¹⁴ Sa siwlringa ku swa Biniyamingi, ku swa Iseraylri la malra kwini waudripi ki akipakwalriane ka laababai ki swa Yabi baai liniane, ai kaiyana makakelrete.

¹⁵ Ku mapapangale la ngwalai ki swa Biniyamingi kipakwalri ku kidremedreme lini, asi lwiyane ku Tamatama ikai kwini ki lazuku ki swa Iseraylri maulrau ku vaeva ka zuku.

¹⁶ Kwini lamarudrange ki mapapangale la kawriva, “Kadrwanga ku ababai ikai ki swa Biniyamingi, lri pangitumaneta silape ku lrika taelrelre lini?

¹⁷ Kikai tai 12 ka zuku ki swa Iseraylri kai pikakwa akivalane; tatara kidremedreme ku apangimianeta palakebe ki zuku ki Biniyamingi.

¹⁸ Ai kaita lri maka pakithareve ki lalaketa mwa liniane, asi lwiyane kudra kiaketeketengata si pusu kudra pakiathareve mwa ki swa Biniyamingi.”

¹⁹ Sakabilrilinga, kwini lalasu la kidredreme, “Ikai Selu yakai ku kalalrisiane ki Tamatama ki caicaili; kikai caili lalri kelanga.” (Kwini Selu yakai tali dradha ka Bithele, tali lrawdru ki Lebuna, tali talrawane ki madradrau ka kadalranane ikabicelrakane ki Bithelrihime si Sekeme.)

²⁰ Kwini lalasu la kawriva ki swa Biniyamingi, “Lu mwa ki babudwane kibalai,

²¹ la dradrela. Lu mulatadrenga kwini latawvailekete ki swa Selu ka kiapaelre ki twalrisisi dralradralrai, kunumi la kainganadha mutaluvaivai ki babudwane, la malra ravase nguvavaeva ku taelrelre numi, la iluku iniane mwa ka talikaiyane ki Biniyamingi.

²² Lwiyasi la kela kwini tama si lataka lini silape si kikawriva numiane, lri dulru numi iya kai liniane, ‘Ala palrainga naiane, nai rakete liniane! Asi lwiyane kikai kai nai ka patwalai ki takikaruburane ravase liniane si malra sitaelrelre; la kai numi ka pakiathareve naiane. Lakamani kikai kwidra, ku pasalrivane kai yakai numiane.’ ”

²³ Kwini swa Biniyamingi la singikai ku takiyane si pangimia. Kwini lalasu la patwalai kwini ki wadralradralrai ka swa Selu ngisasilape ku tangea malra sitaelrelre, la iluku katwase. Kwini lalasu la siwlri mwa ki kadaengane lini, si tupela tucekele, sutelrainga ikai kavai.

²⁴ Sakamani kwini, kudra drumane ku swa Iseraylri la mialri katwase, makitu siwlri mwa ki lazuku lini, wacekecekele, lakadaengane lini.

²⁵ Kikwini ki cailinga, ku swa Iseraylri la kakadrwana ku talialalai lini; ku laumawmase ngiasasingikai ku kidremedreme lini ku nautumane iya.