Tamagarange 2 - Ngudradreadrekadhane Ka Sisiu 魯凱語聖經

Ku sasiakawlu ki Tamatama yakai ka Bukime

¹ Ku sasiakawlu ki Tamatama twalai Gilegale mwa ka Bukime, la kawriva ki swa Iseraylri, “Wailukaku numiane katwase ka Izipiti, si iluku numiane mwa kudra puvagangali ki cucungulane numi ka kadaengane. Naamiaku kikai, kainaku lri ulrau kudra tamakaketeketaneli numiane;

² kunumi lutuumane kai numi lri maka kiketekete ki swakai kwini ki laumawmase. Kunumi mwalra suburu kwini tapatarumaramarane lini. Ai, kai numi maka singiakai ku vagali, la thivalrau numi pia kudra kaika palraingili.

³ Lakamani, lri pelaelaku numiane, lu katwase numi arwacucubungu, kainaku lri pakatwase kwini ki swakai kwini ku laumawmase. Kwini lalasu lri abadhanga numiane; ku twaumase lini lri lrilrigili numiane mwadringi ki salravathane.”

⁴ Ku sasiakawlu ki Tamatama samaka kawrivanga, ku swa Iseraylri la makitu karaleale tubi,

⁵ lakamani kwini kadaengane pasi Bukime. Kwini lalasu la ikai kwini patarumara ki Tamatama.

Wapacai ku Yesua

⁶ Ku Yesua la pawvagavagai ki swa Iseraylri, kwini lalasu makitua siwlringa mwa ki kibaai lini ka kadaengane.

⁷ Ku Yesua sa ikaiyana kawmasane, ku swa Iseraylri makitua marasikaikaiyana ki Tamatama; sa pacainga kwini lasu, kudra wadreleana ku tapasikaiyane ki Tamatama ki swa Iseraylri kudra la palrealrebane sanaka takaunganeini kudra laciwru sa ikaiyana, ku swa Iseraylri mialri kathadalraneana marasikaikai ki Tamatama.

⁸ Ku sasiakawlu ki Tamatama ka Yesua ka lalake ki Nunge saka tara 110 ku cailini la pacai;

⁹ kai mapapangale ki swa Iseraylri la dralreke ki lasu pikai ki kibaaini ka kadaenganeini, ikai ka Timenathe Sera ka tali lregelrege Iparaime ki tali dradha ka lregelrege Gase.

¹⁰ Kwini yakai kwini ki zidai ku laumawmase sa makitu pacainga, kwini mwabaibalrithi ku laumawmase la sakawlrawnga ki Tamatama si ku tapasikaiyane ki kawkawluini patuelre ku laawngane ki swa Iseraylri.

Ku swa Iseraylri wacilri ki Tamatama

¹¹ Sakabilrilinga, ku swa Iseraylri la pasalriunga ki Tamatama, si pathagilinga sukubu ki Baale.

¹² Kwini lalasu wacilringa ki wailuku liniane katwase ka Izipiti ka Tamatama ka Twaumase ki cucungulane lini, mwa sukubu ki drumane ka twaumase, kamani kikwini ki latwaumase ki ngiathalringulu ka lacekele kudra sukusukubu lini, la pakagirimucu ki Tamatama.

¹³ Kwini lalasu la kidaili ki Tamatama, si sukubunga ki Baale si Asetarete.

¹⁴ La ngwalai kikai, ku Tamatama la kalisi turamuru ki swa Iseraylri, la malra liniane baai kwini ki lri ravase liniane pikai ki alrima lini, wabaai ki ngiathalringulu ka labadha, kai swa Iseraylri la kai dulrunga kiecebe ki badha.

¹⁵ Kai swa Iseraylri lu katwase kikaruburu, ku Tamatama la singikai ku takiketeketaneini kiecebe liniane. Kwini lalasu la kipadradresenge ku maadrau turamuru ku akipakwalriane.

¹⁶ Sangimia kikai, ku Tamatama la sikawlu ki tamagarange ku lri rathudu kela sangililuku liniane, si palribulu liniane kidaili ki lri kela kikaruburu liniane.

¹⁷ Ai kai swa Iseraylri la kai kilalra kwini ki latamagarange, wabaebalre ki Tamatama, si katwase sukubu ki drumane ki twaumase. Ku cucungulane lini paluludunga ku drekase ki Tamatama, ai kikai la mwabaibalrithinga kai tarathainu si kai singikaikainga paluludu.

¹⁸ Lu sikawlu ku Tamatama ku tangea ka tamagarange si baai liniane, ku Tamatama la tapalra kwini ki tamagarange, ikai kwini ki tapanianiakaneini palribulribulu ki mapapangale kidaili ki badha. Ku Tamatama ngwalai ku takipakwalriane lini, kudra tubitubi ku takitusinalremeane lini si kirimu kakalithi liniane,

¹⁹ ai, sana pacai kudra tamagarange, kwini mapapangale la tupeelanga ku tangimiamiane lini, ikainga ki ngialisiane ku kakwakudhane, si ka maparawramuru ki cucungulane lini. Kwini lalasu la mwa marasikai ki drumane ka twaumase, kai cilri kudra ngialisiane kelrathane ku kakwakudhane.

²⁰ Lakamani kwidra ku Tamatama la papianga ki swa Iseraylri kaelaela, iya kai, “Kikai paiyanga kikai mapapangale cilringa ki drekaseli ka palululudu ki cucungulane lini ka tamakaketeketane, kai kilalra nakwane,

²¹ lai kainaku lri pakatwase kudra yakainga kwini sa pacainga ku Yesua ku lazuku.

²² Lri arakaiyaku liniane kilrialringau ki mapapangale ki swa Iseraylri, dredrele liniane luka miyaiya ki cucungulane lini paluludu kikai kadadalrananeli.”

²³ Lakamani kikai, ku Tamatama ku palraingi kikai ki laminzuku asurwana ikai kikai ki kadaengane, kai wamalra liniane si baai ki Yesua, sa pacainga ku Yesua la kai makakai malra pakatwase liniane.