Tamagarange 19 - Ngudradreadrekadhane Ka Sisiu 魯凱語聖經

Swa Lrivi si lasiasilanganeini

¹ Saka kadrwana ku atalialalai ki swa Iseraylri, yakai ku tangea ku swa Lrivi la ikaikai kavai swa adaili ka lregelrege ka Iparaime. Kwini lasu la silasiasilangane ku tangea kudra swa Bithelrihime ka Yuda.

² Kikai ababai la kirimu kalisi, la katwase siwlri mutavanane mwa ka Bithelrihime la ikai kwini tarasupate ka dramare.

³ Sakabilrilane kwini swa Lrivi nau tara mwa silape iniane la iya, nau mwa kawriva lani siwlri mwa nakwane amia. Kwini lasu la iluku ku tangea ku sasiakawluini, si drusa ku ruba si mwa. Kikai alisu la pudaane iniane; kwini tama ki lasiasilanganeini la kiraragai pasudalru iniane,

⁴ la kakeecenge ruthuku iniane asurwana, lakamani kwini lasu la makatulruluana ka vai ikai kwini. Kikai ladrusa la ikai kwini kanekane, ikaikai.

⁵ Saka samakasupatele ki mialrealre, kwini lalasu sa ngidrakale, la padulru ku akatwasane; ai kwini tama ki lasiasilanganeini la kawriva iniane, “Kaneana kai akaneane! Lasu sapukwane, ala katwase.”

⁶ Kwini tadrusa la nene si kaneana. Kwini tama ki lasiasilanganeini la kawriva, “Ala suladhana makavale, si kisupisupilriana!”

⁷ Kwini swa Lrivi la ngidrakale nau katwase iya, kwini tama ki lasiasilanganeini la peelana ruthuku iniane, kwini lasu la sulainga makavale.

⁸ Saka samakalrimale ki mialrealre, kwini swa Lrivi la padulru ku akatwasane; kwini tama ki lasiasilanganeini la iyanga kai, “Ala kaneana, lukavaiyanenga la katwasa!” Kwini tadrusa la kanekane.

⁹ Kikai umawmase si lasiasilanganeini si sasiakawluini sa kipadulrunga ku akatwasane, ku tama ki lasiasilanganeini la iyanga kai, “Drela, kikai lri padaalrunga si ka miauawbunga, maesaesai sulaiyana! Lri padalrunga si lai kadradrimiti, la ikaiyana kai si kisupilriana. Lwiya lukamialrealre lasu katwasenga mubalriu.”

^10-11 Ai, kwini lasu kai mwabangalrenga sulainga, la taruelre ki lasiasilanganeini katwase. Kwini lalasu mailuku ku drusa ku ruba pasuete ku amece. Kwini lalasu sa kela Yebuse (amani Yerusalrime) padethenga, la kadradrimitinga, ku sasiakawlu la kawriva ki tawki, “taisaadranga ikai kai, ta ikaainga Yebuse sulai makavale ki awngane!”

^12-13 Ai ku tawki la iya kai, “takai isadra ikai kudra kaika kadaengane ki swa Iseraylri; takatwasana, la mwa ka Gibia ku wamwata Rama sulai.”

¹⁴ Kwini lalasu la lribate Yebuse, si pacungulu katwase. Kwini lalasu la kela kwini ki swakai ki zuku ki Biniyamingi ka Gibia, ku vai la lriwgunga;

¹⁵ Kwini lalasu la mucekele, pasana ikai kwini sulai. Kwini lalasu sa kelanga cekele, la ikai kwini ki kalatadrane si nene, ai kadrwa ku wamalra liniane tarumara putavanane si pasulai.

¹⁶ Kikwini kwidra, la ikai ku tangea ku tarudrawdrange ku twalai angangade ka lri ubalriu, la lribalribate kikwini. Kwini lasu nayakaikai ka lregelrege Iparaime, kikainga la ikai Gibia. (Kai laumawmase kai Gibia swakai ki zuku Biniyamingi.)

¹⁷ Kikai tarudrawdrange la drele ikai ku walribalribate si ikai kalatadrane, la kivaga iniane, “Twalaisu inu? Lri papiasu inu?”

¹⁸ Kwini swa Lrivi la tubalre, “Twalalai nai ka Bithelrihime ka Yuda, kikai lri mubalriu nai, mwa ka tali lregelrege ka Iparaime, laka kadrwa ku tarwamara naiane pasulai.

¹⁹ Yakai kai sapakanane nai ki ruba, kwaku, lasiasilanganeli, si lasasiakawluli mialri ikai ku akaneane nai ku lapange si bava. Ku arakaiyane nai maiyakaikaai.”

²⁰ Kwini tarudrawdrange la kawriva, “Ani bwala mwa naiyanane! Lri sirapalaku numiane; madha sulasulai ikai kai kalatadrane.”

²¹ Kwini lasu la iluku liniane mutavanane, la pakabucuku ki ruba. Kwini badhabadha la makitu tawdrapalenga, si kanenga ku aga.

²² Kwini lalasu sa icengecenge kirararagai, la kirimu kela ku lagurucuki lringulu kai ki daane, si bangebangebange ki lrawlrawdru, la iya kai ki tarudrawdrange, “Kwini ki twapalra muswane munumianane ka umawmase pulatadra, lri mwa nai liniane makakirimu!”

²³ Kwini tarudrawdrange la mulatadre si iya kai liniane, “Talragi, maadha piyaiya kwini! Asingithanga ngilisiane, si pia kikai ngialisiane ka kakudhane. Kai lasu badhabadhali.

²⁴ Drela, kawvai lasiasilanganeini, la ikai kai lalakeli, laka tawvaileketeana, kikai lri baadhaku numiane liniane, ku tapia kwini iya numi kiavanga numi, ai madha piapia ku ngilisiane kikai ki lasu!”

²⁵ Ai kwini lalasu la kai kilalra. Kwini swa Lrivi la pwa pulatadre ki lasiasilanganeini baai liniane. Kwini lalasu la ulucu iniane, tareale kai pisadra tusinalreme iniane, pakela sa lri kaliarenga ala pakatwase iniane.

²⁶ Sakalialiare, kikai alisu la siwlri mutavanane, la tubakebake ikai ki lrawlrawdru kwini ki tarudrawdrange; kwini tawaneini yadaane. Sakaliarenga, kwini alisu la apeceana ikai kwini.

²⁷ Ku tawaneini sa ngidrakale la muelebe, nau katwase iya, la drele kwini ki lasiasilanganeini apece ikai cucubungu ki daane, ku alrima la tale papia ki lrawlrawdru.

²⁸ La iya kai kwini lasu, “Ngidrakala, ila takatwase!” Ai kai twabalre. Kwini lasu la malra kwini ki kinawmasaneini pubelenge ki ruba, si papia ki samamwa balriu katwase.

²⁹ Sa kela balriu, kwini lasu la malra ku vaeva ku lrabu, si teketeke pau 12 ku kinawmasane ki lasiasilanganeini, la pavavala ki tai 12 ka zuku ki swa Iseraylri.

³⁰ Ku la wadrele ku laumawmase la makitu iya kai, “Kadrwana ku kilalra nai ku paramia kikai ku tangimiamiane! Twalai ku takatwasane ki swa Iseraylri ka Izipiti, kadrwana ku ngimiyaiya kikai! Lri tara marasikaaita! Ala ta madrekadrekase ku lrika apangimianeta!”