Tamagarange 18 - Ngudradreadrekadhane Ka Sisiu 魯凱語聖經

Mika si zuku ki Dange

¹ Kikwini kwidra, kadrwa ku talialalai ki swa Iseraylri. Ku zuku ki Dange la silape kudra lrika aikaiyanenga lini sutelrai ku kadaengane, asi lwiyane kwini lalasu kadrwana ku kibaai lini ku kadaengane twalai ki swa Iseraylri.

² Kwini zuku ki Dange la patwalai ki zuku lini palraelre pilri ku talrima ku magarange kikaruburu, si sikawlu liniane katwase ka Zura si Isetawle, mwa lrilriu ku lakadaengane. Kwini lalasu la kela ka lregelrege ka Iparaime, si ikai ki daane ki Mika.

³ Kwini lalasu la kilalra kwini ki yacengecenge ka swa Lrivi ku lingau ki taavavaganeini la mwa kivaga iniane, “Yakaisu kai tumatumane? Aneane ku wailuku muswane kela kai?”

⁴ Kwini lasu la tubalre, “Amani ka Mika ka wakelrete; si paabarakalai nakwane, la pawlrawlrawlrau nakwane.”

⁵ Kwini lalasu la iya kai kwini ki lasu, “Ala kitubia ki Twaumase, kikai takelane nai lrilriu lulri maka pangimia nai lutumane.”

⁶ Kwini barakalai la tubalre, “Madha kakalithi, ku Tamatama yakai ki kadadalranane numi siraparapale numiane.”

⁷ Kikwini talrima sa katwasenga. Kwini lalasu la kela ka cekele Laise, la drele kwini ki laumawmase ka kadrwa ku upungane, mia ki swa Sidune, marathudu, suteelrai, kadrwa ku rivwane ki umawmase; ku kadaengane la cebe ku lataleke ngiesadhane. Kwini lalasu madadaili ki swa Sidune turamuru, kadrwa ku la tutalragi lini ku umawmase.

⁸ Kikai talrima sa siwlringa mu Zura si Isetawle, ku la sakacekele lini la makitu kivavaga liniane manemane ku drele numi iya,

⁹ kwini lalasu la tubalre, “Ila, tamwa ka Laise kikaruburu! Makawalrilriunga nai kikavai, mathariri turamuru. Kirarimwa, madha ka taikaiyane kikai ka kadrwa ku tumatumane, ila tamwa ravase kwini kadaengane!

¹⁰ Lu mwanga numi kikavai lri drele numi kwini ki laumawmase kadrwa ku takirimwane ngipapalakebe; kikavai swadradradrau ka kadaengane, twataleke turamuru, yakai sanaka manemanenga. Ku Twaumase wamalranga si baai mitane.”

¹¹ Ku zuku ki Dange la ngirarukudru ku ta 600, katwase Zura si Isetawle.

¹² Kwini lalasu la katwase, la ikai kwini tali sapakalriwgu ka Kiriathe Yerime ka Yuda tutakwapingane, lakamani kikai kiapasi takwapingane ki Dange.

¹³ Kwini lalasu padrumulru, la kela ka lregelrege ka Iparaime ki Mika.

¹⁴ Kwini talrima ka walrilriu ka Laise la kawriva ki papalra lini, “Wathingale numi? Kawvai yakai kai taluvale ka daane, yadaane kai vaeva kai samiamiange, nicabwane pabelenge ka gingi, la ikaiyana kai drumane kai lasamiamiange si vaeva ka Ipude. Kikai ala kidredrema, ku apangimianeta?”

¹⁵ Kwini talrima ka walrilriu la mudaane ki daane ki Mika, si kivaga kwini ki swa Lrivi.

¹⁶ Kikwini kwidra, kudra ta 600 ku ngiararukudrunga ku lakwapingi ki zuku ki Dange la acegecege ikai lrawlrawdru.

¹⁷ Sa acegecege ikai lrawlrawdru kwini ta 600 ka lakwapingi, kwini talrima ka walrilriu la mudaane, malra kwini nicabwane ara gingi ka samiamiange si drumane ka lasamiamiange si Ipude.

¹⁸ Kwini lalasu sa mudaane ki daane ki Mika la malra kwini la satulrisilrisiane, ku barakalai la kivaga liniane, “Watumatumane numi?”

¹⁹ Kwini lalasu la tubalre, “Icelreba! Tupapalra naiane, la abarakalai naiane si takivagane. Lu abarakaladhane ki swa Iseraylri ikai ki taingeane ka maretetese makadrwadrwa ki taingeangeane ka wacekecekele!”

²⁰ Ku barakalai sa kilalra la kiraragai turamuru, la iluku ku Ipude, nicabwane ara gingi ka samiamiange si drumane ka lasamiamiange si tupapalra liniane katwase.

²¹ Kwini lalasu la ngibangulu si lri katwasenga, la pakaswalalala ki lalalake ka labaibai, lalwange si lalawbubulu.

²² Kwini lalasu sa katwase ki Mika kaina ukuthainwana ki kadalranane, ku Mika la sarubu ki la pasiagiagisi lini mulatadre si saladha. Kwini lalasu la padali ki zuku ki Dange,

²³ la tawtau liniane. Ku zuku ki Dange la ngibangulu si kivaga ki Mika, “Manemane? Kikai laumawmase tara tumatumane?”

²⁴ Ku Mika la tubalre, “Kikai waravase numi ki barakalaili si lasamiamiange, kadrwanga ku manemaneli, manemane anu iyana?”

²⁵ Kai swa Dange la iya kai ki lasu, “Madha kawriva turamuru, amani lwiyasi, pakagirimucusu kai ki laumawmase kai lalasu, lri kikaruburu muswane, kusu lai pacaisu si lawacekecekelesu.”

²⁶ Kai swa Dange la pacungulu katwase; ku Mika la drele kwini lalasu ka tagagarange, kai lri maka dulru liniane, la katuasenga siwlri mubalriu.

^27-28 Kai swa Dange samaka ravase ki barakalai si lasamiamiange ki Mika la mwanga kikaruburu ki Laise. Kwini Laise si Bitherehube tara yakai kwini ki valrwalru, amani kwidra marawrawrathudu suteelrai ka cekele. Kai swa Dange la papacai ki laumawmase ki cekele, si lama ki cekele. Laka kadrwa ku palribulu liniane, asi lwiyane kwini Laise madadaili ki Sidune paramuru, kwini lalasu laka kadrwa ku tutalragi lini ki druma. Kai swa Dange la tupela kwini ki cekele tucekele, si ikaikai kwini.

²⁹ Kwini lalasu la arakai ku nagane ki lalake ki cucungulane lini ka Yakubu sunagane kwini ki cekele pasi Dange iya, wamalra kwini ki Laise ka cekele pabalrithi pasi Dange.

³⁰ Kai swa Dange la malra pasutelrai kwini ki lasamiamiange, la sikawlu ki agane ki Musi ka lalake ki Geresume ka Yunathange tubarakalai ki zuku ki Dange. Ku lagagane ki Yunathange abarakalai ikai kwini pakela kudra takiravasane ki zuku ki Dange.

³¹ Ku Alrivilrivi ka balrawbau ki Twaumase ku taidrengerane ikai Selu, kudra lasamiamiange ki Mika kiapikaiyana ka Dange.