Tamagarange 17 - Ngudradreadrekadhane Ka Sisiu 魯凱語聖經

Lasamiamiange ki Mika

¹ Yakai ku tangea ku umawmase ka sia Mika, la ikaikai ka tali lregelrege ka Iparaime.

² Kwini lasu la kawriva ki tinaini, “Yakai ku kwaupa ku 1,100 ka gingisu, la kilalraku sa pususu kwini ki tarakupawpa. Ani drela, yakai nakwane kai gingi, amaniaku ka wamalra.” Kwini tinaini la kawriva, “Lalakeli, ku Tamatama ani subulrubulru muswane!”

³ Kwini Mika la malra kwini 1,100 ka gingi sawlri ki tinaini. Ku tinaini la iya kai, “Pakai ku asawlriane ku naika akipuswane ki lalakeli, pasingiakidremedremaku patarumara ki Tamatama kikai gingi, si papacase ku vaeva ku angatu tusamiamiange, la cabu arakai ku gingi kwini tali belenge. Kikai wabadhaku muswane kai gingi.”

⁴ Ku Mika la malra kwini gingi. Sawlri baai ki tinaini, kwini tiatina la malra ku 200 ku gingi. Si baai ki taratugingigingi, papacase arakai ku angatu ku vaeva ku samiamiange, ku tali belenge la cabu arakai ku gingi. Kikai samiamiange la malra pikai ki daane ki Mika.

⁵ Ku Mika yakainga ku biuini, la daarepenga ku lasamiamiange si vaeva ku Ipude, si kelrete pakamani ki lalakeini abarakalai.

⁶ Kwini kwidra ku swa Iseraylri kadrwana ku talialalai, ku laumawmase la ngisasingikaikai ku kadaalame lini ku atumanane lini.

⁷ Kisasilange kwini saka paramia kwini, ka Bithelrihime ka cekele ki swa Yuda la ikai ku tangea ku yacengecenge ka swa Lrivi;

⁸ Kwini lasu la katwase ki cekele Bithelrihime, nau mutali drumane iyaiya. Sa ikai kadalranane, kwini lasu la kela ka Iparaime lregelrege, mwa ki daane ki Mika.

⁹ Ku Mika la kivaga iniane, “Twalalaisu inu?” Kwini lasu la tubalre, “Swa Lriviaku, ka twalai ka Bithelrihime ka Yuda; wasilasilapaku ku aikaiyane.”

¹⁰ Ku Mika la iya kai, “Ikaiyangaili kai! La kamania ku takivaganeli si ka barakalaili; ki caicaili lri badhaku muswane ku mangeale ku gingi, lai lri baadhaku muswane ku lalaimai si lataleke.”

¹¹ Kikai yacengecenge ka swa Lrivi la palraingi ku asurunga ikai ki Mika, ku Mika laka maru lalakengaini sirapale iniane.

¹² Ku Mika la paabarakalai iniane, kwini lasu la ikaikaainga ki Mika.

¹³ Ku Mika la iya kai, “Kikai kwidra yakai ku tangea ku swa Lrivi ka barakalaili, ku Tamatama lri tara pangiradhekane nakwane!”