Tamagarange 16 - Ngudradreadrekadhane Ka Sisiu 魯凱語聖經

Ku Samesunge yakai Gaza

¹ Yakai saka minakavalane, ku Samesunge la mwa ka Gaza ka cekele ki swa Pelisitine, la madradrele kudra tangea ka pairairange ka ababai, la mwa tadrusa apece.

² Ku swa Gaza sa thingale ka yakai cekele ku Samesunge la kela lringulu kwini, si taleare lepenge ikai ki taelelebane ki cekele. Kwini lalasu kai wamwa pwalra, kiadremeedreme iya kai, “Tamukalava pakaliare ala tapapacai iniane.”

³ Ai ku Samesunge waapece pakela ki kabiceacelrakane la ngidrakale, la malra suburu kabebetethe ki saelelebane ki cekele, adravane ka sapatalwane ki saelelebane si dradrukurane patuelre wasuburu, la malra angeale nguelre, si iluku mwa kavai dethe Hiburungu ka lregelrege.

Samesunge si Delrila

⁴ Sakabilrilinga, ku Samesunge la ikai ka vaalru Sureke kadalame ku tangea ka ababai, ku nagane sia Delrila.

⁵ Yakai ku talrima ku kiacapili ki swa Pelisitine la kela kidrele ki Delrila, la kawriva iniane, “Arakaiya ku salrilrigilanesu kithiathingale ki Samesunge, ku lrika apelaelane muswane, ani sapukwanenga, lri pangitumane nai si akaci iniane, lrepelrepe kerenge iniane, lani kiruthukunga. Lu mia kikai, si thingalesu kunai ka tangeea lri baai nai muswane ku 1,100 ka gingi.”

⁶ Ku Delrila la kivaga ki Samesunge, “Pelaelaili, asu sapukwane turamuru. Yakai ku apangimiane madu, malra lrepelrepe kerenge muswane, si maka ruthuku muswane?”

⁷ Ku Samesunge la kawriva, “Kwini lalasu lu arakai ku kaiyana ka mameale ku pitu ku bavane ka calrisi lrepelrepe nakwane, lri miaku ki langumawmase ka kadrwanga ku puku.”

⁸ Kwini lakiacapili ki swa Pelisitine la malra ku pitu ka kaiyana ka mameale ka bavane ka calrisi si baai ki Delrila, kwini alisu la malra lrepelrepe ki Samesunge.

⁹ Kwini alisu ala ka wadawlunga ku umawmase ikai daane ukalavalava. Kwini alisu la karaleale, “Samesunge! Wakelakela ka swa Pelisitine!” Ku Samesunge sa kirimu ngikudukudu, kwini salrepelrepane ka calrisi la mia ki saizare ka calrisi samwa ki apwi, makakai kababetake. Sa ngimia kwini, kwini lalasu laka thadalrane kai maka thingale kwini puku ki Samesunge luka twalai inu.

¹⁰ Ku Delrila la kawriva ki Samesunge, “Twamwamulracesu nakwane, si lrulrucuku nakwane! Pelaelaili, ku umawmase lri pangitumane madu ala maka kerenge muswane?”

¹¹ La kawriva ku Samesunge, “Arakaiya ku kaika niarakaiyaneana ku bavane ka calrisi si malra lrepelrepe kerenge nakwane, lri miaku ki langumawmase ka kadrwa ku puku.”

¹² Ku Delrila la malra ku bavane ku calrisi si lrepelrepe iniane, ala tawtau, “Samesunge, wakelakela ka swa Pelisitine!” Yakai ku umawmase ku walepengenga ikai daane ukalavalava. Ku Samesunge la babetake ku yakai ki alrima, mia ki wabetake ki kakulai ka valrai.

¹³ Ku Delrila la kawriva ki Samesunge, “Twamwamwamulraceananasu nakwane, si lrulrulrucuku nakwane! Pelaelaili, lri pangitumane madu la lrepelrepe kerenge muswane?” La kawriva ku Samesunge, “Lwiyasi la malrasu kai pitu kai nikadapiane kai isiuli paelre ki satinutinunane, la malra ku sakedrekedrane kedrekedre pasutelrai, lri miaku ki langumawmase ngupukwane.”

¹⁴ Ku Delrilahe pasakaereke iniane, la malra kwini pitu ka nikadapiane ka isiu paelre ki satinutinunane, la alra ku sakedrekedrane pwa pasutelrai, ala tawtau, “Samesunge, wakelakela ka swa Pelisitine!” La pacunu ku Samesunge, la aru vavale patwalai ki satinutinunane bilibili kwini isiuini.

¹⁵ Ku Delrila la kawriva ki Samesunge, “Kaisu twakapatengatengane nakwane, madalamaku muswane la iyananasu! Kingitulrulungasu tumwamulrace nakwane, kaisu peaelaela nakwane ku tasapukuananesu turamuru.”

¹⁶ Ku Delrila laka takivagavagane lukavaivaivai, kwini alisu lakai icelrecelrebe la kawpungunga turamuru,

¹⁷ ala kirimu malra kwini nisekeseketane si pelaelanga ki Delrila, kwi lasu la kawriva, “Kai isiuli kadrwana ku takigulrugulrane, asi lwiyane sa kitulalakaku patarwamara nakwane baai ki Twaumase. Lwiyasi la kimwalra kai isiuli, lri ngupukuanenga naku, mia ki langumawmase kalralrupi turamuru.”

¹⁸ Ku Delrila sa thingalenga ki Samesunge malranga pelaela kudra sekeseketeini ku vaga, la sikawlu ku wamwa pelaela ki lakiacapili ki swa Pelisitine, “Abwala ngusivaalanga kela; kai lasu peaelaelanga nakwane kudra sekeseketeini, kwini lalasu la keelanga, si mailuku ku gingi kainganai.”

¹⁹ Ku Delrila la pasakaereke ki Samesunge pikai ki vagisini, ala dawlu ki umawmase, pwakaciane ku pitu ku nikadapiane ku isiu ki Samesunge. Sa ngilribatenga, ku Delrila la pakwalri ki Samesunge, asi lwiyane kwini alisu wathingalenga kwini ki lasu ala ka tenganenga ka kadrwanga ku pukuini.

²⁰ La tawtau ku Delrila, “Samesunge, wakelakelanga ka swa Pelisitine!” Sapacunu ku Samesunge, la kidredreme, “Ala nau mia ku tapangimiamiane sana ngikudukudaku lri makakaiyaku si ngukerengane la iyaiya.” Ai kwini lasu kai pwalringaunga ala ka kiadailinga ku Tamatama iniane.

²¹ Ku swa Pelisitine la pwalra iniane, si malra gativathe kwini drusa ku macaini, si iluku iniane mwa ka Gaza, la arakai ku lriwlu ka kicikici kerenge iniane, si pasilribulribu iniane ikai takiememengane.

²² Ai ku isiu ki Samesunge aru cebeceebe kadrau.

Tapacadhane ki Samesunge

²³ Ku lakiacapili ki swa Pelisitine la yelrelre tulrisisisi, papia ki twaumase lini ka Dagunge; kwini lalasu la senai, “Ku twaumaseta wabaainga mitane ki badhata ka Samesunge!”

^24-25 Kwini lalasu sa icengecenge ku peravane lini, la karaleale, “Ta pulatadra ki Samesunge, nai pwa tusinalrelreme iniane.” Ku Samesunge la kipulatadre ki takiememengane; kwini lalasu la tumwamulrace iniane. Acegecega la iya iniane ikai ki kabicelrakane ki drusa ka ulrudru. Kudra mapapangale sadrele ki Samesunge la makitu senai drengedrengere ki twaumase lini si iya kai, “Ku badha ka Samesunge mabebetethe ki kadaengane nai, la papacai ku takaalra ku umawmase; ku twaumase wamalranga baai pwa ki alrima nai!”

²⁶ Ku Samesunge la kawriva kwini ki wabibibili ki alrimaini ka lavavalake, “Ala pasulrapaili kwini ulrudrulringa kai ki biu; lri sutalwaku.”

²⁷ Ikai kwini ki biu swaete si madrikidrikisi ku laumawmase, ku talrima ku kiacapili ki swa Pelisitine la ikai kwini. Ikai talrugulrugane ki cavalri ki biu lri ikaai kau ta 3,000 ku lasawvalai ku lalabaibai, dredredrele ki Samesunge lu kitumeameamelrace.

²⁸ Ku Samesunge la inulri, “Abebeelengenga ka Tamatama, kiatubiaku ngulringavaili! Twaumase, kiatubiaku sanguvavaalanga patarumara nakwane ku puku, baadhanaili ku asangu valaneanali bilri ku tagativathane ki macali ki swa Pelisitine.”

²⁹ Ku Samesunge la kebere kwini ki drusa ka ulrudru ki biu, tara kebere ku alrimaini kwini ki kaulrudrane,

³⁰ si tawtau, “Ala nau tara paacai karededele ki swa Pelisitine la iya!” Kwini lasu la pakaelre ku sakapukupukwananeini papucucubungu lrudrulu, la kaburuku mulebe ku biu, si drepete ki talrima ka kiacapili si laumawmase makanaelre. Sapacai ku Samesunge kudra papacaini ku laumawmase makakalra ki papacaini sapanianianiakeana.

³¹ Ku betakane si wacekecekele ki Samesunge la kela malra ku kinawmasaneini, si iluku pubalriu, la dralreke pikai ki takidralrekane ki tamaini ka Manua ikai kwini ki kabicelrakane ki Zura si Isetawle. Ku Samesunge ku taatamagarangananeini ki swa Iseraylri taramapusale ka caili.